Ginwang’u lembe ma ber m’usagu zoo
JUKRISTU milioni dupa ging’iyo niweko timo foc mi Noeli. Gidog giwinjiri nenedi i ng’ey ng’iyong’ic migine? Nyo ginwang’u nia ve gibekoso piny moko ma cande ubenegogi? Nyo awiya migi nwang’u nia jubediyogi? Kenen dwokowang’ lembe ma Jumulembe pa Yehova moko mi ng’om ma tung’ tung’ gimiyo.
Eve
Niparu pi Yesu Kristu: “Saa ma fodi adoko ngo Jamulembe pa Yehova, abed acidho i kanisa wang’ acel acel ma gwei. Acidho de cing’ Noeli kunoke cing’ Paska. Kadok kumeno de, abed aparu ngo pi Yesu Kristu i andha. Eni dong’ atimo ngo foc mi Noeli nyanok de, re lundo acidho i coko mi Jukristu nja wang’ ario kubang’ yenga man bende aponjo jumange ku lembe ma Biblia ubeyero iwi Yesu!”—EVE, AUSTRALIE.
Reuben
Anyong’a ma junwang’u ka jumiyo piny ni ju mange: “Ka jumiyo ira giramiya moko, anyong’a nega mi tuko ngo, asagane ka nwang’u aparu ngo nia acopo nwang’u pinyne. Afoyo lee dit ka jumiyo ira piny rek! Bende, ka cal m’akubo ubenyang’u jumange, lembene nyang’a bende mi tuko ngo.”—REUBEN, IRLANDE DU NORD.
Emily
Nikonyo ju ma n’i yeny: “Wabed wamaru nitedo cam ni ju m’uberemo. Saa mange watero igi thiwe, mukathi kunoke giramiya moko ci ma copo nyang’ugi. Lembene nyang’uwa pilembe waliewo dhanu maeno i saa ma wafoyo de wan.”—EMILY, AUSTRALIE.
Wendy
Nidikiri karacelo ku wedi mwa: “Kinde ma wabedo karacelo ku wedi mwa, awiya mwa ging’eyo uminwego migi ma tung’ tung’, wayugi, kwarugi man umaru migi de m’umbe peko moko nyanok de. Watimo ngo lembuno i nindo moko ma segi. Eno uketho watime ngo kud adici man wedi mwa de ging’eyo nia waliewogi pilembe wamarugi.”—WENDY, CAYMAN ISLANDS.
Sandra
Kwiyocwiny: “Ju ma nok kende re ma paru pi kwiyocwiny i nindo mi foc mi Noeli pilembe ve nia jubed jutimo lembe dupa dit i nindo maeno. Ento, calu m’aponjo lembe ma Mungu ung’olo pi dhanu, awinjara para ma ber pilembe ang’eyo nia i nindo m’ubino awiya para gibikwo ku mutoro.”—SANDRA, ESPAGNE.