Pirang’o Jumulembe pa Yehova gitimo ngo foc mi Noeli?
Paru ma cuu ngo ma dhanu tie ko
Vupo: Jumulembe pa Yehova gitimo ngo foc mi Noeli pilembe giyiyo ngo Yesu.
Lemandha: Watiye Jukristu. Wayiyo nia both utiye nikadhu ndhu kud i bang’ Yesu Kristu kende.—Tic mi Jukwenda 4:12.
Vupo: Ubepoko kind juruot ku ponji ma nia kud gitim foc mi Noeli.
Lemandha: Wadieng’ lee ku juruot, man watiyo ku Biblia pi nikonyogi nibedo i acel.
Vupo: Wumbe ku cwiny mi miyo piny ma jumiyo ni dhanu i Noeli, niketho kwiyocwiny i ng’om, man nitimo berocwiny ni jumange.
Lemandha: Kubang’ ceng’, wabed waii nitimo berocwiny man nibedo ku kwiyocwiny ku dhanu mange. (Lembrieko 11:25; Jurumi 12:18) Ku lapor, kite ma watimo ko coko mwa man kite ma warweyo ko lembanyong’a urombo ku telowic ma Yesu umiyo, m’uyero kumae: “Wunwang’u mananu, wun de wumii mananu.” (Matayo 10:8) M’umedo maeno, wakonyo dhanu giketh wigi zoo i kum Ker pa Mungu, pilembe en re m’etiye genogen mandha ma bimiyo kwiyocwiny iwi ng’om.—Matayo 10:7.
Pirang’o Jumulembe pa Yehova gitimo ngo foc mi Noeli?
Yesu ung’olo iwa nia wabed wapoy pi tho pare, ento pi nindo mi nyoliri pare re ngo.—Luka 22:19, 20.
Jukwenda pa Yesu man julub pare mi rundi ma kwong’a gitimo ngo foc mi Noeli. Buku moko (New Catholic Encyclopedia) uyero nia “timo foc mi Noeli ucaku i ng’ey oro 243 [N.N.Y.],” niwacu rundi ma kadhu dak acel i ng’ey tho mi jukwenda ma tokcen.
Lembe moko acel de mbe m’unyutho nia Yesu unyolere i nindo 25 mi dwi mir 12; man ke nindo mi nyoliri pare ma tap ca de jukiewo ngo i Biblia.
Wang’eyo nia foc mi Noeli foyo ngo i Mungu pilembe ulage man timo m’i iye uai i bang’ jukafiri.—2 Jukorintho 6:17.
Pirang’o ukwayu ngo i dik cingi ku jumange i foc mi Noeli?
Kadok nwang’u dhanu ma dupa ging’eyo nia jukafiri re m’ucaku the foc mi Noeli, bende nia Biblia de ucwaku ngo focne, re asu gibemediri nitime. Dhanu ma kumeno gicopo penjiri kumae: Pirang’o ukwayu ngo Jukristu gidik cingi i foc maeno? Pirang’o ukwayu gikoc ku jumange?
Biblia ubetielo cwinywa nia wan giwa wapar cuu mandha, ma watii ku ‘copo mwa mi paru i lembe.’ (Jurumi 12:1, 2) Eponjowa nineno lemandha ni gin ma pire tek. (Yohana 4:23, 24) Pieno, kadok nwang’u wang’eyo kite ma jumange gibed gineno kowa de, re watiyo mwa asu ku cik mir ukungu mi Biblia nik’ebed nia lembene ketho wanen rac i wang’gi de.
Kadok nwang’u wang’iyo wan giwa nia wabetimo ngo foc mi Noeli de, re waworo twero pa ng’atuman acel acel iwi lembuno. Wacero ngo dhanu mange nitimo foc mi Noeli.