Pirang’o Jumulembe pa Yehova gitimo ngo foc mi Paska?
Paru ma cuu ngo ma dhanu tie ko
Vupo: Jumulembe pa Yehova gitimo ngo foc mi Paska pilembe nia gitiye ngo Jukristu.
Lemandha: Wayiyo nia Yesu Kristu utie Jalar mwa, man waii ku tego mwa ceke pi nikwanyu “ba tiende tap tap.”—1 Pethro 2:21; Luka 2:11.
Vupo: Wuyiyo ngo nia Yesu ucer.
Lemandha: Wayiyo nia Yesu ucer. Bende, eno utie ukungu mi yiyoyic mwa wa Jukristu man waketho nwoc iwi lembene i tic mwa mi rweyo lembanyong’a de.—1 Jukorintho 15:3, 4, 12-15.
Vupo: Wudieng’ de ngo nia awiya mwu gibekoso anyong’a mi timo foc mi Paska.
Lemandha: Wamaru awiya mwa lee, uketho wamiyara lee dit pi niponjogi man nikonyogi kara gibed ku mutoro i kwo migi.—Tito 2:4.
Pirang’o Jumulembe pa Yehova gitimo ngo foc mi Paska?
Foc mi Paska ujengere ngo nyanok de iwi Biblia.
Yesu ung’olo nia wabed wapoy pi tho pare, ento pi cer pare re ngo. Nimakere ku kalandrie mi Biblia, wabed waworo lembang’ola mi Poy pi tho parene kubang’ oro.—Luka 22:19, 20.
Wayiyo nia ulag Paska uai kud i lembsuru mi mungu mi nyodo, eno re m’uketho lembuno foyo ngo i Mungu. Ebekwayuwa nia wawor en’i kende, kum en e “Mungu ma janyeko,” man edagu thier m’utiye ku timo ma tung’ tung’ ma foyo ngo iye.—Ai 20:5; 1 Ubimo 18:21.
Kakare nilubo lembsuru mi dhanu, wayiyo nia ng’iyong’ic mwa ma watimo ko ngo Paska ujengere iwi Biblia; m’ubekwayuwa nia watii ku “rieko ma cu ku riu”. (Lembrieko 3:21; Matayo 15:3) Ka jumange gipenjowa pi yiyoyic mwa iwi Paska, wakoro pi lembene ma nwang’u wabeworo ko twero pa ng’atuman pi ng’iyong’ic mi gin m’ebitimo.—1 Pethro 3:15.