Wer mi Ker mio iwa tegocwiny

Paulo giku Sila gipaku Mungu ku wer kinde ma gibino i ot kol. (Tic 16:25) I rundi mwa eni bende, Jukristu wadwa gibed giwer kinde ma gibino i kambi ma Junazi ubed usendo i ie dhanu i Sachsenhausen i ng’om mir Allemagne. Umego ku nyimego ma gibino i ng’eca i ng’om mi Sibérie bende giwer. Lapor maeno ubenyutho nia wer utie ku copo mi mio tegocwiny ni Jukristu ma gibenwang’iri iwang’ ragedo.

Ing’ei nindo ma nok, dhok mange dupa bende binwang’u buku mi wer ma nyen ma thiwie tie, Wawer ku mutoro ni Yehova. Kinde ma wabinwang’u buku eno, waromo ponjo wer mi ie i saa mi thier mwa mi juruot kara wamakgi maber ku wiwa. (Ef 5:19) Ka watimo kumeno, tipo maleng’ bilund konyowa nipoi ikum werne kinde ma amulaic biwok i wiwa. Wer mi Ker copo konyowa kara waketh wiwa kilili ikum genogen mwa. Giromo mio iwa tego mi ciro kinde ma wabenwang’ara iwang’ amulaic. Re kadok wabenwang’ara ngo iwang’ amulaic de, wec ma mit mi wer cwaluwa niwer ku mutoro mandha, nikum anyong’a mir adundewa. (1Ke 15:16; Zb 33:1-3) Dong’ watim kero mwa ceke nitio maber ku wer mwa ma tung’ tung’ mi Ker!

NEN VIDEO MA THIWIE TIE UN CANTIQUE INSPIRÉ PAR LES PRISONNIERS, MAN ING’EYE, DWOK WANG’ PENJI MAE:

• Lembe makani m’ugam ucwalu umego Frost nithungo wer?

• Wer ugam umio nenedi tegocwiny mi ciro ni umego ma gibino i kambi mi masendi i Sachsenhausen?

• Wer mi Ker copo nimio iri kero i lembe makani ma tung’ tung’ mi kwo peri ma nja?

• Iromo maru niponjo man nimaku ku wii wer makani mi Ker?