Tii ku video kinde m’ibetelo wi ponji mi Biblia

Giranena konyo ng’atu m’unene ninyang’ man nipoi i kum lembe m’eponjo. Yehova ma tie Japonji Madit m’usagu zoo de utio ku giranena pi nimio ponji ma dongo. (Th 15:5; Yr 18:1-6) Yesu bende utio ku giranena kinde m’ebino ponjo dhanu. (Mt 18:2-6; 22:19-21) Video, ma tie acel m’i kind giranenane, umio adwogi ma beco i kind oro m’ukadhu. Nyo ibed itio cuu ku videonegi kinde m’ibetelo wi ponji mi Biblia?

Juyiko video apar ma copo konyowa kinde ma wabetelo wi ponji mi Biblia ku nyathibuku Lembanyong’a m’Uai i Bang’ Mungu! Wang’ mapol, thiwi videonegi ubed urombo ku penji acel m’i kind ma jukiewo ku rangi ma col bii i nyathibuku maeno. Nyathibukune ma nwang’ere i jw.org utie ku kaka moko ma poyo wiwa ka m’umito wanyuth ie video. M’umedo maeno, video mange de nuti ma waromo tio ko ku girasoma ma tung’ tung’ mi sanduku mi jamtic mi ponjo Biblia ku dhanu.

Nyo wubeponjo thiwiwec moko ma nyang’ i ie copo bedo tek ni japonj Biblia? Kunoke nyo japonj Biblia ubekadhu kud i peko moko ma segi? Sai video ma copo konye i jw.org man i Televizio JW. Wucopo neno videone wukude man wucopo weco i wie karacelo.

Kubang’ dwi, jubed juwodho video ma nyen. Pieno, kinde m’ibenenogi, par kite m’iromo tio ko kugi pi niponjo dhanu mange.