Wamed bodho mwa i tic mi rweyo lembanyong’a​—Bed ilok bodho peri

PIRANG’O PIRE TIE TEK: Jukristu ma juwiro ku tipo karacelo ku rombe mange gibelwong’o kwond dhanu ceke ‘ugam pii mi kwo’ mi mananu. (Ny 22:17) Pii maeno mi lapor ubenyutho yub ceke ma Yehova umaku pi nilaru dhanu ma woro cik pare kud i dubo man tho. Dong’ pi nikonyo dhanu mi suru man dini ma tung’ tung’, ukwayu wayer igi “lembanyong’a ma nja” i ayi ma copo mulo adunde ng’atuman acel acel.​—Ny 14:6.

KITE MA JUROMO TIMO KO:

• Ng’ii thiwiwec man giragora ma copo mulo adunde dhanu mi teritwar peri. Icopo tio ku kite ma waromo weco ko ku dhanu, kunoke bodho moko mange m’idaru tio ko m’uwok ma ber. Ku lapor, paru man giragora ma kani ma copo mulo adunde dhanu? Nyo lembe moko timere ma dhanu zoo ubeweco i kume nindo maeni? Thiwiwec ma kani ma copo telo nen pa ng’atu ma co kunoke ma dhaku?

• I kind wec peri icopo royo moth kunoke lembe moko mange ma jung’iyo ko i beng’wu.​—2Ko 6:3, 4

• Ng’ii ku girasoma man video ma nwang’ere i sanduku mi jamtic mi ponjo Biblia ku dhanu, kara ituc nirweyo ni ng’atu moko ci m’unyutho nen ma ber

• Toki girasoma man video i dhok mi dhanu mi teritwar peri

• Tii ku thiwiwec m’urombo ku yeny pa ng’atu m’irweyo ire. (1Ko 9:19-23) Ku lapor, icopo yero ang’o ka ng’atu m’irweyo ire uyero iri nia wedi pare moko utho nindo ma ceng’ini?

KETH JUNEN VIDEO, MAN I NG’EYE DWOK WANG’ PENJI M’ULUBO E:

• Paru ma kani ma jarwei ung’io niweco i wie ku jawinj pare?

• Lembang’o ma nwang’u ubino timere i kwo pa jawinjne?

• Giragora ma kani ma nwang’u umaku jarwei eno utii ko, man ke pirang’o?

• Ibed iloko bodho peri nenedi kara dhanu mi teritwar peri gijol lembanyong’a yot yot?