**Wamed bodho mwa i tic mi rweyo lembanyong’a—Kite mi mio buku Biblia ponjo (Qu’enseigne la Bible) ni dhanu**

Pirang’o pire tie tek nitimo kumeno: Buku Biblia ponjo, tie jamtic mir ukungu i sanduku mwa mi jamtic mi ponjo Biblia ku dhanu. Ento, i wang’e niponjo Biblia ku ng’atu moko ku buku maeno, walar wamii ire bukune. Pieno, ng’atuman m’i kindwa ucikere nitimo kero nidoko jabodho mi mio ni dhanu, buku Biblia ponjo i tic mi rweyo lembanyong’a. (Rie. 22:29) Kite ma jucopo mio ko bukune tie dupa, ento jurwei gicikiri nitio ku kite ma gineno nia copo bedo ku matoke ma ber igi.

Kite ma juromo timo ko:

Penj penji ma telo nen, ma copo konyi nitero jawinj peri i wic m’urombo tap ku lembe ma wuweco i wie, ma nwang’ere i buku Biblia ponjo. Icopo bende ning’io penji acel i kind penji ma nwang’ere i caku pa wicman. Ing’ei m’iwinjo dwokowang’ lembe pa jawinj, som giragora m’urombo ku lembe ma wuweco i wie.
Kite mange m’icopo nitimo ko tie nitio ku penji mi mbaya ma tung’ tung’ ma nwang’ere i acaki, pi nitelo nen pa jawinj peri; ing’eye icopo ninyutho ire kaka ma junwang’u i ie dwokowang’ lembe mi Biblia i bukune. Ku lapor, icopo weco iwi peko moko m’uwok nindo ma ceng’ni, ma juyero pire i lembang’eya; icopo bende nikoro ire nia dhanu dupa gibino nipenjiri ku penji ma nwang’ere i mbaya mir 3. Kunoke icopo yero ni jawinj peri nia, ibeliewo judhugola peri pi ninyutho igi lembe ma ber ma bitimere i nindo m’ubino. Ing’eye, nyuth ire cal mi mbaya mir 4-5 man penje kumae: “Ikind lembang’ola ma e, ma kani m’imaru nia ubin utimere?” Yo mange m’icopo nitimo ko tie nikoro ni jawinj peri nia ibeliewo dhanu pi dakika ma nyanok, pi nikonyogi kara ginwang’ dwokowang’ penji ma dongo dongo mi kwo. Ing’eye, nyuth ire penji mi the mbaya mir 6, man penje enyuth penji m’utelo nen pare akeca.
Yer ire lembe atira atira wang’ acel, m’umbe nidhoko lembe. Icopo niyero kumae: “Wabenyutho ni judhugola mwa, jamtic ma e ma konyowa niponjo Biblia. Nyo idaru nineno buku maeni nindo moko? [Wek edwok wang’e.] Kan itie ku dakika moko nyanok kende, amaru nia anyuth iri kite m’icopo nitio ko ku buku maeni karacelo ku Biblia peri giri.”

I dwi maeni kepim nitimo kumae:

Wutim lanyuth moko i saa mi thier mwu mi juruot, iwi kite ma juromo mio ko bukune ni dhanu.
Kinde ma wuberweyo lembanyong’a, nyuth ni jurwei mange lembe m’ipangu nia ibiyero. (Rie. 27:17) Ka kite peri mi rweyo umbe ku matoke ma ber, wile ku kite mange.