Ayi m’iromo tio ko ku Kite ma waromo weco ko ku dhanu

Niai dwi mir 1 oro 2018, jucaku kiewo kite ma romo weco ko ku dhanu i ng’ei Buku mi coko mi Kwo man tic mwa mi Jukristu. Wacopo tio kude nenedi?

Ka jumio iri thengponji i coko: Iromo tio ku penji, giragora man pi nindo ma cen, ma jukiewo i Kite maromo weco ko ku dhanu. Re eno nyutho ngo nia wec m’ibiyero ucikere nirombo tap tap ku wec mi video mi Kite ma waromo weco ko ku dhanu. Icopo tio ku bodho, caku wec man nyamu i lembe i ayi m’ukoc ku mi video. Bende, icopo mio girasoma ma nwang’ere i sanduku mwa mi ponjo Biblia ku dhanu, kadok nwang’u juweco ngo pire i telowic mi thengponji peri de.

I tic mi rweyo lembanyong’a: Lembe ma nwang’ere i Kite ma waromo weco ko ku dhanu juyiko kara umii iwa paru. Ka ng’atini unyutho nen ma ber man emaru eng’ei lembe dupa, wucopo meduru kude ku lembe ma nwang’ere i thenge mi Liew. Icopo yiko kum wec ma nwang’ere i Kite ma waromo weco ko ku dhanu kunoke iromo tio ku bodho mange m’ukoc. Nyo wec kunoke giragora ma jutio ko i dwi m’ukadhu copo telo nen mi dhanu lee i teritwar mwu? Nyo lembe moko m’utimere i beng’wu nindo ma ceng’ini eni, utelo nen mi dhanu mi kabedo m’ikwo i ie? Icopo tio ku Kite ma waromo weco ko ku dhanu i ayi ma tung’ tung’, re lembakeca peri ubed nitimo ‘gin ceke pi lembanyong’a,’ kara iwec ku dhanu.​—1Ko 9:22, 23.