KWO MI JUKRISTU
Lembe ma wacopo timo kara waketh coko mi rweyo lembanyong’a ubed ber
Calu coko mwa mange, coko mi rweyo lembanyong’a bende utie giramiya ma Yehova umiyo iwa en kara wacwalara i mer man i tic ma beco. (Eb 10:24, 25) Cokone ucikere nitimo dakika abic kunoke abiro, ma i dakikane jubitimo lembe ma e: Nikpero ungu ma tung’ tung’, ninyutho theritwar m’unguman birweyo i iye, man rwo. (Tek jular jutimo coko moko i wang’e, coko mi rweyo lembanyong’a bilund bedo adundo nisagu.) Ukwayu jatel wi cokone uyik lembe moko ma copo konyo dhanu ceke ma gibidikiri i tic mi lembanyong’a cing’ nica. Ku lapor, ceng’ soko nwang’u umego ku nyimego ma pol gijigo rweyo lembanyong’a yenga m’ukadhu, pieno ecopo bedo ber nia jatel wi cokone uyik cuu mandha lembe m’ukwayu ewec i wiye. Lembe moko mange ma kani ma pigi copo bedo tek nia juwec i wiye?
Kite ma waromo weco ko ku dhanu ma nwang’ere i Buku mi coko mi kwo man tic mwa mi Jukristu
Kite ma jucopo tiyo ko ku lembe moko ma betimere nja kunoke lembang’eya m’uwok ma nyen pi nicaku the wec
Kite ma jucopo dwoko ko wang’ jai ma bewok wang’ ma pol
Kite ma jucopo dwoko ko wang’ penji pa ng’atu m’uyiyo ngo nia Mungu nuti, ng’atu m’uyiyo nia piny ulokere aloka, ng’atu ma weco dhok mange, kunoke ng’atu moko ma n’i dini ma fodi unyay ungo akeca i theritwar mwu
Kite ma jucopo tiyo ko ku thiwiwec ma bewok i jw.org, i JW Library®, kunoke kite ma jucopo tiyo ko ku Biblia
Kite ma jucopo tiyo ko ku jamtic moko m’i sanduku mwa mi jamtic mi ponjo Biblia ku dhanu
Kite ma jucopo rweyo ko lembanyong’a i ayi ma tung’ tung’ calu ve, nirweyo ku telefon, kiewo baruwa, nirweyo kaka ma dhanu bepong’ i iye, nidok i liew kunoke nitelo wi ponji mi Biblia
Nimiyo poyowic moko iwi lembe ma jucopo timo pi nigwoko bedomoth, yotkum, nibedo ku kura ma ber, nibedo ku nen ma ber, kunoke lembe mange m’urombo ku maeno
Ponji moko kunoke video ma nwang’ere i nyathibuku Miiri zoo i somo piny man i ponji
Kite m’icopo miyo ko amora man icopo konyo ko ng’atu m’uberweyo kude
Giragora moko ma copo bedo ber pi tic mi lembanyong’a; kunoke niweco iwi lembe moko ma ber ma jurwey moko ginwang’iri ko i tic mi lembanyong’a