Coko ma tung’ tung’ ma cwaluwa i mer man i tic ma beco

NIAI i rundi ma con, dhanu pa Yehova gibed gicokiri karacelo i ayi m’upangere ma ber. Ku lapor, i Israel ma con, jumaco ceke gibed gicidho wang’ adek i Yerusalem pi nitimo agba ma dit. (Poi. 16:16) I rundi ma kwong’a ke, Jukristu gibed gicokiri nja, akecane i udi mir umego. (Flm. 1, 2) Tin bende, watie kud anyong’a nitimo coko ma tung’ tung’ mi cokiri man coko ma dongo. Pirang’o jutic pa Mungu gibed gicokiri karacelo? Thelembe ma dit utie nia coko tie thenge ma pire tek mi thier mwa.​—Zab. 95:6; Kol. 3:16.

² Bende, coko mwa ma tung’ tung’ bebedo ku kony ni dhanu ceke m’ucokiri i igi. I rundi ma con, Yehova ugam ung’olo ni nyithindho mir Israel nia i oro mir abiro, i saa mir agba mi otbak ma kubang’ oro, jumaco, jumamon, awiya, man umondo ceke gicikiri nicokiri karacelo kaka ma Yehova ung’io ‘kara giwinj, man gimak ng’eyo lworo Yehova Mungu, man giketh cwinygi kum timo lembe ceke mi cik.’ (Poi. 31:12) Ubenen kamaleng’ nia thelembe mange ma pire tek mi cokiri karacelo utie kara ‘Yehova uponj’ dhanu. (Isa. 54:13) Coko bekonyowa bende kara wang’eyara, watiel cwinywa, man wanwang’ teng’oteng’ i kindwa.

COKO MA TUNG’ TUNG’ MI COKIRI

³ I ng’ei Pentekoste mi oro 33 R.M., julub gibed gicokiri karacelo man gibed gimiiri i ponji mi jukwenda, man ‘ku ba rupiny ku ba rupiny, gibedo asu ku cwinygi m’uripo acel i hekalu.’ (Tic. 2:42, 46) I ng’eye, Jukristu gibed gimediri nicokiri karacelo pi niworo Mungu, man i saa maeno, gibed gisomo giragora ma tipo uyuyo i wie, man bende waraga ma tung’ tung’ ma jukwenda ku julub mange gigoro. (1 Kor. 1:1, 2; Kol. 4:16; 1 Tes. 1:1; Yak. 1:1) Cokiri ubed urwo bende karacelo. (Tic. 4:24-29; 20:36) Saa moko, ju ma gitimo tic mi misioner gibed gikoro lembe ma gikadhu i ie i tic migi. (Tic. 11:5-18; 14:27, 28) Jubed juyaru bende i ponji mir ukungu mi Biblia man kite ma lembila ma tung’ tung’ upong’o ko. Jubed jumio telowic iwi kura ma Jukristu gicikiri nibedo ko man kite ma giromo nyutho ko nia gimoko kikiki i kum Mungu. Jubed jutielo cwiny dhanu ceke nia gibed jurwei lembanyong’a ma weg amora.​—Rum. 10:9, 10; 1 Kor. 11:23-26; 15:58; Ef. 5:1-33.

⁴ I rundi ma tin de, coko mi Jukristu belubo lapor mi coko ma jukwenda gibed gitimo. Wabeworo juk ma tipo uyuyo i wie ma nwang’ere i Juebrania 10:24, 25, m’uyero kumae: “Dong’ iwa pidu piwa (watiel cwinywa i kindwa) . . . , man ku wawek cokra giwa karacelo, ma calu kura mi jumoko, ento ajuka dong’ wajukra; man ma sagu apila, ka waneno cenguni dhingo.” I nindo maeni mi kajik ceng’ man ma lembe tek i ie, watie ku yeny lee mi tielocwiny ma wanwang’u ka wabecokara karacelo nja kara wamedara nibedo tek i thenge mi tipo man wagwok bedoleng’ mwa saa ceke. (Rum. 1:11, 12) Wa Jukristu wabekwo i kind dhanu m’ugondiri man ma juco. Wadaru kwero cen timo ma Mungu udagu man awanya ma reco mi ng’om maeni. (Flp. 2:15, 16; Tit. 2:12-14) Ku lemandha, kaka mange mbe ma waromo bedo i ie ber magwei nisagu bedo i kind dhanu pa Yehova. (Zab. 84:10) Man gin mange mbe ma romo mio iwa kony lee nisagu ponjo Lembe pa Mungu man nyamu ie. Dong’ wakewecu iwi coko ma tung’ tung’ ma juyiko piwa.

COKO MI THUM PA YENGA

⁵ Thenge ma kwong’a mi coko mi thum pa yenga tie korolembe m’ucungo iwi Biblia ma jumio pi dhanu ceke, ento asagane pi ju ma nyen; jumoko m’i kindgi nwang’u fodi gibino wang’ ma kwong’a i coko mwa. Korolembe maeno mi dhanu ceke utie ku kony lee pi nipong’o yeny mi tipo mi dhanu ceke mi cokiri, ju ma nyen ku jurwei bende.​—Tic. 18:4; 19:9, 10.

⁶ Yesu Kristu, jukwenda pare, man Jukristu mange gibed gimio korolembe mi dhanu ceke i ayi ma rom ku korolembe ma jubemio i cokiri ma tung’ tung’ mi dhanu pa Yehova tin eni. Ma jiji mbe, Yesu ubino japonji ma dit nisagu zoo i ng’om keni. Dhanu uyero pire kumae: “Ng’atu ma foduweco kumeca mbe.” (Yoh. 7:46) Yesu ubed uweco calu ng’atu ma tie ku dito man ponji pare ubed uwang’u i dhanu lii. (Mat. 7:28, 29) Dhanu ma giketho lembe pare i adundegi, ginwang’u bero lee. (Mat. 13:16, 17) Jukwenda bende gilubo lapor pare. Tic mi Jukwenda 2:14-36, utie ku korolembe ma mulo adunde ma Petro umio i nindo mi Pentekoste mi oro 33 R.M. Korolembene ucwalu juwinj pare i timo. I ng’eye, jumoko gidoko juyic yo ng’ei ma giwinjo korolembe ma Paulo umio i Athene.​—Tic. 17:22-34.

⁷ Tin bende, dhanu milioni dupa gibenwang’u kony lee nikadhu kud i korolembe mi dhanu ceke ma jubed jumio kubang’ yenga i cokiri ma tung’ tung’ man bende korolembe dupa ma bekadhu i coko ma dongo. Korolembe ma tung’ tung’ maeno konyowa kara kud wawil ki i kum ponji mi Jukristu man kara wacung nging’ nging’ i tic mi Ker. Ka wabelwong’o dhanu ma gimaru lemandha man dhanu mange ceke m’umbe akoyakoya, wabikonyogi lee mandha kara gituc ning’eyo cuu ponji mir ukungu mi Biblia.

⁸ Korolembe eno beweco iwi lembe ma tung’ tung’. Thiwiwecne moko bekoro i ponji mir ukungu mi Biblia man lembila, mange ke beweco iwi cik mir ukungu man juk mi Biblia iwi kwo mi juruot man gamiri, iwi peko m’aradu gibenyego ko, man kura ma Jukristu gicikiri nibedo ko. Korolembene moko ujengere iwi tic ma wang’uic ma Yehova utimo. Mange ke beweco iwi lapor mi yioyic, mi tegocwiny, man mi gwokobedoleng’ mi dhanu moko ma Biblia uweco pigi, man ponji ma wacopo nwang’u tin eni i kum lapor migi.

⁹ Kara wanwang’ kony lee i korolembe mi dhanu ceke, kwayu wacik ithwa cuu, wayeny giragora ma jakorlembe ulwong’o, man walube cuu kinde m’ebesomo man ebekoro ie. (Lk. 8:18) Tekene watimo kumeno, wabimedara nicungo ma tek i kum lembe ma wabeponjo man wabikethe i timo.​—1 Tes. 5:21.

¹⁰ Ka wend jukorlembe utie lee i cokiri, m’umbe jiji jucopo mio korolembe kokoro kubang’ yenga. Kara cokiri kud ubed ukos korolembe, jucopo belwong’o bende saa moko jukorlembe ma welo niai kud i cokiri mange ma ceng’ini. Ento ka wend jukorlembe tie nok, jucopo bemio korolembene i mukero moko ci ma copere.

¹¹ Thenge mir ario mi coko mi thum pa yenga tie ponji mi Otkur ma Wiw. Jubed jutimo ponjine i ayi mi penji ku dwokowang’e, man ejengere iwi thiwiwec ma nwang’ere i Otkur ma Wiw mi ponji. Nikadhu kud i ponji mi Otkur ma Wiw, Yehova ubemio iwa cemo mi tipo i nindone.

¹² Thiwiwec mi ponji mi Otkur ma Wiw beweco wang’ ma pol iwi kite mi tio ku cik mir ukungu mi Biblia i kwo mwa ma kubang’ ceng’. Ponjine mio tego ni Jukristu kara giceriri i kum “tipo m’i ng’om” maeni man i kum timo m’ucido. (1 Kor. 2:12) Nikadhu kud i Otkur ma Wiw, wanwang’u lero m’ubecikumedere niwok iwi ponji mir ukungu mi Biblia man bende iwi lembila, kara wang’ei lemandha i saane man wamedara niwotho i yo mi weg bedopwe. (Zab. 97:11; Rie. 4:18) Ka wabecokara man wabedikara i ponji mi Otkur ma Wiw, eno copo konyowa kara wabed kud anyong’a pi genogen mi ng’om ma nyen pa Yehova ma bedopwe bibedo i ie. (Rum. 12:12; 2 Pet. 3:13) Nidikara karacelo kud umego ku nyimego mwa konyowa bende nicego nying’ tipo i kwo mwa man medo ava mi timo ni Yehova kud amora i kumwa. (Gal. 5:22, 23) Coko tielo yioyic mwa kara wamedara niciro amulaic man waketh ‘ther ukungu lembe ma ber pi rundi ma bibino, man kara wanwang’ kwo ma en e kwo mandha.’​—1 Tim. 6:19; 1 Pet. 1:6, 7.

¹³ Wacopo timo ang’o pi ninwang’u kony i kum yub maeno m’umakere pi nimio iwa cemo mi tipo? Wacikara niyiko cokone i wang’e, kendwa kunoke karacelo ku juruot mwa, wacikara nisomo giragora ma junyutho, man i saa mi coko, nidwoko wang’ penji ku wec mwa giwa. Ka wabetimo lembuno zoo, lemandha bituc niguro ulage cuu i adundewa, man jumange bende gibinwang’u teng’oteng’ ka gibewinjo kite ma wabetuco ko pi yioyic mwa i coko. Bende, ka wabewinjo dwokowang’ penji mi dhanu mange kilili, kubang’ yenga wabinwang’u kony lee i ponjine.

COKO M’I KIND YENGA

¹⁴ Kubang’ yenga, cokiri bedikiri karacelo i Ot Ker pi nitimo coko acel ma nyinge tie Kwo man tic mwa mi Jukristu. Coko maeno utie ku thenge adek ma juyiko pi nikonyowa kara wabed jutic pa Mungu ma ‘giromo kakare.’ (2 Kor. 3:5, 6) Jubed juwodho program man lembe ma jubiponjone i Buku mi coko mi Kwo man tic mwa mi Jukristu ma bewok kubang’ dwi. Bukune tie bende ku paru ma waromo tio ko pi niweco ku dhanu i tic mi lembanyong’a.

¹⁵ Thenge mi kwong’o mi coko maeno tie Lonyo ma nwang’ere i Lembe pa Mungu, man ekonyowa ninyang’ ma ber akeca iwi lembe ma Biblia uweco i wigi man niponjo kite ma waromo tio ko ku lembenegi. Thenge maeno bebedo ku korolembe, som mi giragora, man wec ma karacelo ku juwinj, m’ujengere zoo iwi som mi Biblia ma kubang’ yenga. Buku mi coko mi kwo man tic utie bende ku cal ma tung’ tung’ man penji moko ma wacopo nyamu igi pi nikonyowa kara wanyang’ ma ber i lembe ma jukoro i Biblia. Ayi maeno ma juluro ko lembe mi Biblia i thucne konyowa lee i kwo mwa ma kubang’ ceng’ man i ponji mwa, kara wabed ma ‘waromo kakare, ma wayikara ndhu kum tic ceke ma ber kubang’gi kubang’gi.’​—2 Tim. 3:16, 17.

¹⁶ Thenge mir ario mi coko maeno tie Miiri zoo i tic mi rweyo lembanyong’a. Juyike pi nimio ni dhanu ceke kaka mi nwang’u bodho man mi medo bodhone i lembanyong’a man i ponji. M’uweko thengponji mir awiya mi somo, jubed juneno man juweco iwi video m’unyutho kite ma waromo weco ko ku dhanu. Thenge maeno mi cokone konyowa nibedo ku ‘leb mi ju ma juponjo kara wang’ei maram jujengo ko ng’atu m’uol ku lembe.’​—Isa. 50:4.

¹⁷ Thenge mir adek mi coko maeno utie Kwo mi Jukristu, man i ie, jubed juneno kite mi tio ku cik mir ukungu mi Biblia i kwo ma kubang’ ceng’. (Zab. 119:105) Thenge acel ma dit mi Kwo mi Jukristu utie Ponji mi Biblia mi cokiri, man ebed ebedo penji ku dwokowang’e calu mi ponji mi Otkur ma Wiw.

¹⁸ Kubang’ dwi, ka Buku mi coko mi Kwo man tic utundo, jatel wi tic mi guriri mi judong cokiri kunoke jadit cokiri m’ubekonye, ng’io ie cuu mandha man epoko thenge pa ng’atuman. Kubang’ yenga, jadit cokiri acel ma tie japonji ma cuu man ma guriri mi judong cokiri uyio, timo calu jawikom mi coko. Tic pare uketho i ie nitimo kero kara coko ucaki man uthum i saane, nifoyo man nimio juk ni ju ma gitie ku thengponji mir awiya mi somo.

¹⁹ Ka watie ku ng’iyo mi yikara pi coko mi Kwo man tic, man ka wabed wacokara man wadikara i ie nja, watuc ninwang’u ng’eyong’ec mi Lembagora, wanyang’ i cik mir ukungu mi Biblia, man wanwang’u tegocwiny mi rweyo lembanyong’a, man bodho mi ketho dhanu gidok julub. Kadok ju ma fodi gilimo ngo batizo de gicopo nwang’u kony ka gibedikiri karacelo kud umego ku nyimego mange man bende gibewinjo wec ma tung’ tung’ ma gierojo i thenge mi tipo. Kara wayikara ma ber pi cokone man pi coko mange, wacopo tio ku Watchtower Library, JW Library^®, KAPANG BUKU I INTERNET Watchtower^™ (kan utie i dhok peri), man girasoma ma nwang’ere i kapang buku mi Ot Ker. Kapang buku mi Ot Ker eno bebedo ku girasoma ceke ma nuti mi Jumulembe pa Yehova, Index des publications des Témoins de Jéhovah kunoke Guide de recherche pour les Témoins de Jéhovah, man bende lok ma tung’ tung’ mi Biblia, concondance, diksioner, man girasoma mange ma copo konyo. Ng’atu moko ci copo tio ku kapang buku eno i wang’ coko kunoke i ng’eye.

COKO MI TIC MI LEMBANYONG’A

²⁰ I saa ma tung’ tung’ i kind yenga man i thum pa yenga, ungu mi jurwei gibed gitimo i adundo coko mi tic mi lembanyong’a. Wang’ ma pol jubed jutimo coko maeno i udi mir umego kunoke i kabedo moko mange m’uromo pire. Jucopo bende nitimo cokone i Ot Ker. Nibedo kud ungu ma thindho thindho ma gibed gicokiri i kabedo ma tung’ tung’ ma cokiri berweyo i ie, konyo jurwei nicidho yot yot i coko mi tic mi lembanyong’a man i ticne. Eno konyo bende kara jupok jurwei pio pio man kara gicidh i kabedo ma gibirweyo i ie m’umbe galu. Janen wi ungu mi lembanyong’a copo bende nidieng’ cuu akeca ku jurwei ma gini i ungu pare. Kadok etie ber nibedo kud ungu ma becokiri kaka ma tung’ tung’ de, re lembe moko copo kwayu nia ungu dupa gicokiri karacelo. Ku lapor, tekene wend jurwei ma gibed giwok i lembanyong’a i kind yenga bebedo nok, ecopo bedo ber nidiko ungu ma tung’ tung’ karacelo kunoke nicoko dhu ungu zoo i ot Ot Ker kunoke i kabedo mange m’uromo pire. Kumeno, jarweiman binwang’u ng’atu m’ecopo rweyo kude. Bende, cokiri copo nwang’u nia etie ber nitimo coko mi lembanyong’a i Ot Ker i ceng’ ma dongo kunoke i nindo mi foc mi ng’om. Kunoke cokiri copo ng’io nicoko dhu jurwei ceke i ng’ei ponji mi Otkur ma Wiw pi coko mi tic mi lembanyong’a.

²¹ Kan ungu becokiri kaka ma tung’ tung’, janen wi unguman re ma telo wi coko mi tic mi lembanyong’a. Ento i nindo moko, janen wi ungu mi lembanyong’a copo kwayu jang’eye kunoke umego mange m’uromo re m’utel wi coko maeno. Jatel wi coko mi lembanyong’a ucikere niyiko paru moko m’ukwayere man ma romo konyo i tic mi lembanyong’a. I ng’ei poko jurwei, umego acel mio rwo. I saa maeno, jurwei gibicidho wang’ acel i tic mi lembanyong’a. Coko maeno timo dakika 5 nicidho 7, ento ecikere nibedo adundo magwei ka jubetime i ng’ei coko moko mi cokiri. Coko mi lembanyong’a ucikere nimio tielocwiny, juk, man telowic m’ubekwayere ni ju ma gibewok i lembanyong’a. Jucopo poko ju ma nyen kunoke jumange ma gicopo bedo ku yeny mi kony karacelo ku jurwei ma gidaru ning’iyo ma ber pi nitendogi.

YUB M’UMAKERE PI COKO I COKIRI MA NYEN KUNOKE MA THINDHO

²² Ka wend dhanu m’ubedoko julub ubemedere, wend cokiri bende medere. Wang’ ma pol, jaliew mi twodiri re ma oro karatasi i bethel pi nikwayu jucak the cokiri ma nyen. Re saa mange, ungu ma thindho thindho gicopo nwang’u nia etie ber nia judikgi i kum cokiri ma tie ceng’ini kugi.

²³ Saa moko, cokiri ma thindho copo bedo kende kende ku nyimego. I cokiri ma kumeno, ka nyamego uberwo i cokiri kunoke ebetelo wi coko, ecikere niboyo wie aboya nimakere ku telowic mi Lembagora. (1 Kor. 11:3-16) Wang’ ma pol, ebibedo abeda i wang’ dhanu. Nyimego gimio ngo ponji i coko. Ento, gisomo lembe ma nwang’ere i girasoma ma dilo pa Yehova uwodho man gikoro ie, kunoke gicopo nitime i ayi mi wec ma karacelo ku juwinj kunoke lanyuth. Biro mi filial copo kwayu nia nyamego utii iwi barua moko man utel wi coko. I ng’ei nindo, tekene umego ma giromo pi nitimo tic maeno ginwang’iri, gin re ma gibimaku tije.

COKO MA DIT MI TWODIRI

²⁴ Kubang’ oro, jubed jumaku yub kara cokiri ma tung’ tung’ ma tie i twodiri ma rom gitim wang’ ario coko ma dit mi twodiri mi bang’ acel acel. Eno bebedo saa mir anyong’a ma mio kaka ni dhanu ceke m’ubino i coko maeno kara githei mer kud umego ku nyimego mi cokiri ma tung’ tung’. (2 Kor. 6:11-13) Pi nipong’o yeny ma tap mir umego, dilo pa Yehova beyiko thiwiwec m’ujengere iwi Biblia man theng programne ma tung’ tung’. Jumio ponjine i ayi ma tung’ tung’, calu ve korolembe, lanyuth ma tung’ tung’, lanyuth ma ng’atini ubeweco kende i ie, man penji. Ponji maeno ma wok i saane giero dhanu ceke ma gicokiri. I coko maeno ma dongo, julub ma nyen ginwang’u kaka mi limo batizo pi ninyutho nia githiero kwo migi ni Yehova.

COKO MA DIT MIR ADHURA

²⁵ Kubang’ oro, jubed jutimo coko acel ma dit ma coko dhanu lee nisagu. Coko maeno mir adhura betimo nindo adek, man ediko cokiri mi twodiri ma tung’ tung’. Filial ma thindho gicopo nwang’u nia etie ber nidiko cokiri ceke mi kabedo migi kara gitim coko ma dit mir adhura i kabedo ma rom. I ng’om moko, yub ma jubed jumaku pi timo coko maeno copo koc nimakere ku lembe mi ng’ombe kunoke nimakere ku telowic m’uai i dilo. I ng’ei oro moko, jubed jutimo coko ma dongo ma diko ng’om dupa kunoke coko ma dongo ma segi i ng’om moko ma jung’io, man umego ku nyimego elufu swa m’uai i ng’om ma tung’ tung’ gibino i coko maeno. I kind oro dupa m’ukadhu, dhanu ma pol gituc niwinjo lembanyong’a mi Ker ni kum tic ma Jumulembe pa Yehova gitimo pi niyawu pi coko migi maeno ma dongo.

²⁶ Dhanu pa Yehova ma gimiiri ire gineno coko ma dongo maeno ni saa mir anyong’a mi timo thier ni Yehova i acel. I coko ma dongone wanwang’u lero iwi lemandha. I cokone moko, jubed juwodho girasoma ma nyen ma watio ko pi ponji mwa giwa, pi ponji mi cokiri kunoke pi tic mi lembanyong’a. I program mi cokone, batizo de bebedo nuti. Coko ma dongo pigi tie tek dit pi nikonyowa kara wamedara i thenge mi tipo. Nikadhu kud i coko maeno ma dongo, waneno kamaleng’ nia dhanu pa Yehova i ng’om zoo gitie andha umego ku nyimego man gitie Jukristu mandha ma gibenyutho nikadhu kud i timo migi nia gitie julub pa Yesu Kristu.​—Yoh. 13:35.

²⁷ Ka wabecidho i coko ma tung’ tung’ mi cokiri man i coko ma dongo mi twodiri ku mir adhura ma dhanu pa Yehova gibed gitimo, wanwang’u tego mi timo yeny pare. Bende, cokone copo gwokowa i kum lembe ma reco mi ng’om maeni ma romo nyotho yioyic mwa. Coko maeno ceke mio yung man pak ni Yehova. (Zab. 35:18; Rie. 14:28) Watie ku foyofoc lee ni Yehova pi coko ma tung’ tung’ m’eketho pi nimio cemo ni dhanu pare i thenge mi tipo i nindo maeni mi kajik ceng’.

CEMO MIR UTHIENO PA RWOTH

²⁸ Wang’ acel kubang’ oro, i nindo ma Yesu Kristu utho i ie, cokiri mi Jumulembe pa Yehova i ng’om zoo gibed gicokiri pi Poi pi tho pa Yesu, kunoke Cemo mir uthieno pa Rwoth. (1 Kor. 11:20, 23, 24) Eno tie coko ma pire tek nisagu mange ceke ma dhanu pa Yehova gibed gitimo i kind oro. Yesu ung’olo en gire nia wabed wapoi pi tho pare.​—Lk. 22:19.

²⁹ Nindo mi Poi pi tho pa Yesu urombo ku nindo mi Kadhukuwijo mi rundi ma con ma Biblia uweco pire. (Ai 12:2, 6; Mat. 26:17, 20, 26) Kadhukuwijo ubino nindo ma nyithindho mir Israel gibed gipoi ko kubang’ oro pi wok migi kud i Misiri i oro 1513 W.R.M. I oro maeca, Yehova uketho nia i nindo mir 14 mi dwi migi ma kwong’a, gicam nyathirombo mi Kadhukuwijo man giwok kud i ng’eca ma gibino i ie i Misiri. (Ai 12:1-51) Dong’ pi ninwang’u nindo maeno, jukwanu bang’ 13 niai ma dwi upor i ie man ebenen i Yerusalem i thum pa dwi mir adek kunoke i caku pa dwi mir ang’wen. Wang’ ma pol Poi pi tho pa Yesu bepodho tap i nindo ma kwong’a ma dwi ugudo i ie i thum pa dwi mir adek kunoke i caku pa dwi mir ang’wen.

³⁰ Yesu unyutho en gire ayi ma jucikiri nitimo ko Poi pi tho pare, i Matayo 26:26-28. Etie ngo lembe moko ma jutimo i ayi mir udu, ento etie cemo mi lanyuth ma ju ma came tie ju ma ginwang’u lwong’o mi cidho i polo pi nibimo karacelo ku Yesu Kristu. (Lk. 22:28-30) Jukristu mange ku dhanu mange ceke m’umaru lemandha gicikiri nicidho bende i Cemo mir uthieno pa Rwoth, pi nineno anena kende. Cidho migi i coko maeno nyutho nia gitie ku foyofoc pi yub ma Yehova Mungu umaku pi bero mi dhanu ceke nikadhu kud i bang’ Wode, Yesu Kristu. Nindo ma nok i wang’ Poi pi tho pa Yesu, korolembe ma segi mi dhanu ceke bebedo nuti pi niyawu kum dhanu pi coko maeno man pi nimio ava mi ponjo Biblia i kumgi.

³¹ Jumulembe pa Yehova gibed gikuro ku mutoro ma lee nindo mi cokiri karacelo, pilembe cokone cwaluwa i mer man i tic ma beco. (Ebr. 10:24) Jamiru mandha man ma riek ubetimo kero niyiko coko maeno pi nipong’o yeny mwa mi tipo. Jutic pa Yehova ceke man bende dhanu ceke m’umaru lemandha gicopo nwang’u kony lee nikadhu i yub maeno nwang’u gibecokiri nja karacelo. Jutic pa Yehova gibedo i acel ka gibenyutho foyofoc kud adundegi ceke pi lembe ma tung’ tung’ ma gibenwang’u nikadhu i dilo pare. Re m’usagu zoo, wapaku man wayungo Yehova.​—Zab. 111:1.