Kampany ma segi pi nicaku ponji mi Biblia ku dhanu i dwi mir 9

I kind dwi mir 9, wabitiyo ku nyathibuku Icopo kwo kud anyong’a rondo ku rondo! pi nicaku ponji mi Biblia ku dhanu ceke ma wabiweco kugi; man wabitimo ticne kud amora. Jurwey gicopo ng’iyo nitimo tic pa jayab yo ma jakony man nidwoko saa 30 m’ukwayere. Dong’ wabitimo nenedi kara wadikara i kampany ma segi maeni?

• I rombo ma kwong’a: Tii ku lembe ma nwang’ere i dende ma yor i ng’eye mi nyathibuku pi nimiyo ava i kum dhanu, man tim kero inyuth igi pi ponji mi Biblia. Kud iwil ku dhanu ceke ma gilar ginyutho nen ma ber i wang’e, uketho i iye dhanu m’ibed iliewo. Kadok nwang’u gilar gikwero ponji mi Biblia i wang’e de, saa moko nyo ayi ma nyen ma watelo ko wi ponji mi Biblia man nyathibuku ma nyen romo telo nen migi. Wacikara ngo niweko nyathibuku ni ng’atu m’umbe i pacu man ukwayu ngo waroy nyathibukune i kind barua ma wabeoro ni dhanu ma gilar ginyutho ngo nen ma ber i wang’e. Komite mi tic mi cokiri romo maku yub ma jubibetimo ko coko mi rweyo lembanyong’a i kind dwi ma kampanyne bitimere i iye.

• Yore mange mi timo: Ka cokiri mwu tiyo ku prezantwar man tek nyathibuku Icopo kwo kud anyong’a rondo ku rondo! utiye i prezantwarne, kor ni dhanu ceke ma gibifoyo nyathibukune nia jumiye ni ng’atu m’ujolo ponji mi Biblia, ma ponjine ke watime m’umbe cul. Nyuth ni ng’atune i adundo kite ma watimo ko ponji mi Biblia, kunoke icopo maku yub mi nyutho lembene ire i ng’eye bende. Janen wi tic mi rweyo lembanyong’a romo maku yub kara juor jurwey ma jubodho gicidh gisay dhanu ma copo jolo ponji mi Bibia i kabedo ma julworo iye lwor i theritwar mi cokiri migi. Icopo kwayu bende nicaku ponji mi Biblia ku jutic wedu kunoke ku dhanu m’iweco kugi kinde m’iberweyo i saa mi pangu ngo.

Yesu ung’olo iwa nia ‘waketh dhanu udok julub’ man “waponjgi.” (Mt 28:19, 20) Dong’ wek kampany maeni ma segi ukonywa kara watund i kum lembakeca maeno ma nwang’u wabetiyo ku nyathibuku Icopo kwo kud anyong’a rondo ku rondo!