Kur ajiki mi ng’om maeni ma cwinyi tek

Ceng’ini eni, cirocir pa Yehova m’ebenyutho pi ng’om maeni bijik. Jubinyotho dini mi vupo, ungu moko mi thek biloy ku masendi iwi dhanu pa Mungu, man Yehova binego jutimrac i Armagedon. Jukristu gibekuro lembe ma dongo maeno kud ava.

I andha, wang’eyo ngo nia masendi ma dit bikadhu i ayi ma nenedi tap. Ku lapor, wang’eyo ngo nia ebicaku tap awene. Wang’eyo ngo nia judong gamba gibiwacu nia ang’o m’ubecwalugi ninyotho dini. Wang’eyo ngo nia masendi ma thek bikelo iwi dhanu pa Mungu bigalu rukani, kunoke gibisendogi nenedi. Bende, wang’eyo ngo nia Yehova bitiyo kud ang’o dhe pi ninyotho jutimrac i Armagedon.

Ento Biblia unyutho iwa gin ceke m’ukwayu wang’ey, kara wakur lembe ma bitimere i nindo m’ubino ma cwinywa tek. Ku lapor, wang’eyo nia wabekwo i nindo ma tokcen mi “kajik ceng’.” (2Tm 3:1) Wang’eyo nia “jubijwigo” nindo mi nyoth mi dini mi vupo kara dini mandha kud unyothere. (Mt 24:22) Wang’eyo nia Yehova bibodho dhanu pare. (2Pe 2:9) Man wang’eyo nia Ng’atu ma Yehova ung’iyo pi ninyotho jutimrac tie Ng’atu ma pwe man ma won tego. Pieno ebibodho udul ma dit i saa mi Armagedon.​—Ny 19:11, 15, 16.

M’umbe jiji, lembe ma bitimere i nindo m’ubino biketho “dhanu gibiyenyo tho ni lworo.” Ento tek wabesomo man wabeparu kilili iwi kite ma Yehova ubodho ko dhanu pare con, man lembe m’edaru nyutho iwa pi nindo m’ubino, wacopo ‘cungo atira man wating’o wiwa malu,’ ma cwinywa tek nia gony mwa udhingo ceng’ini.​—Lk 21:26, 28.