Lwiny mir Armagedon tie ang’o?
Lembe ma Biblia udwoko
Armagedon utie lwiny ma tokcen ma bitimere i kind bimobim mi dhanu ku Mungu. Niai tin eni, bimobim mi dhanu ku ju m’ubediko cing’gi kugi gibejai ni Mungu man gibekwero nijwigiri i the bimobim pare. (Zaburi 2:2) Lwiny mir Armagedon bijigo bimobim mi dhanu.—Daniel 2:44.
Wec ma nia “Armagedon” nwang’ere wang’ acel kende i Biblia i Lembanyutha 16:16. Lembila ma nwang’ere i Lembanyutha ukoro nia “jubim m’i ng’om zoo” gibicoko dhoggi “karacelo i kaka ma julwong’o ku dhu Juebrania Armagedon,” pi nikiedo “lwiny mi ceng’ ma dit pa Mungu ma Jategokpo.”—Lembanyutha 16:14.
Jukani ma gibikiedo lwiny i Armagedon? Yesu Kristu bitelo wi udul mony mi polo pi niloyo judegi pa Mungu. (Lembanyutha 19:11-16, 19-21) Judegi maeno tie dhanu ma gibejai i kum bimobim pa Mungu man ma gibewore ngo.—Ezekiel 39:7.
Nyo lwiny mir Armagedon bitimere i Asia (Moyen-Orient)? Ungo. Lwiny mir Armagedon bitimere ngo i kabedo acel kende, ento ebitimere iwi ng’om zoo.—Yeremia 25:32-34; Ezekiel 39:17-20.
Armagedon, ma saa moko jukiewo “Har–Magedon” (i dhu Juebrania Har Meghiddohn), thelembene tie “got mi Megido.” Megido ubino adhura moko mir Israel ma con. Lembatada unyutho nia lwiny ma tung’ tung’ ma dongo ubed utimere ceng’ini kud adhura maeno uketho i iye lwinyne moko ma jukiewo pigi i Biblia. (Jupoklembe 5:19, 20; 2 Ubimo 9:27; 23:29) Ento Armagedon utie ngo nying’ kabedo moko ma nwang’ere ceng’ini ku Megido ma con. I Megido, got moko mbe ma copo coko dhu dhanu ceke ma gibikiedo i dhu Mungu; man kadok Poga mi Yezrel ma ni ceng’ini kude de copo coko ngo dhu dhanu maeno. Pieno, Armagedon unyutho cokiri ma thek mi ng’om zoo gibicokiri ko pi nikiedo wang’ ma tokcen i dhu bimobim pa Mungu.
Mungu bitiyo kud ang’o pi nikiedo i lwiny mir Armagedon? Wang’eyo ngo kite ma Yehova bitiyo ko ku tego pare, re copere ebitiyo ku jambali m’ebed etiyo ko con calu ve pei, digidi, pii, mac ku muganga, lukoth man thong’om. (Yob 38:22, 23; Ezekiel 38:19, 22; Habakuk 3:10, 11; Zekaria 14:12) Wi judegi pa Mungu binyothere man gibicaku negiri i kindgi, e saa maeno ju m’udong’ gibinyang’ nia karaman gibekiedo i dhu Mungu.—Ezekiel 38:21, 23; Zekaria 14:13.
Nyo ng’om bithum i lwiny mir Armagedon? Lwiny mir Armagedon binyotho ngo ng’om, pilembe ng’om utie kabedo ma dhanu bikwo i iye nja ku nja. (Zaburi 37:29; 96:10; Eklizia 1:4) Kakare ninyotho dhanu ceke ku wi ng’om, lwiny mir Armagedon bibodho dhanu abodha, pilembe i lwiny maeno “udul ma dit” ma gitie jutic pa Mungu gibiboth.—Lembanyutha 7:9, 14; Zaburi 37:34.
Saa moko Biblia betiyo ku wec ma nia “ng’om,” pi ninyutho dikiri mi dhanu ma gijai ni Mungu, ento ungo pi ninyutho ng’om ma wabekwo i wiye eni. (1 Yohana 2:15-17) Eno re ma tie ng’om ma lwiny mir Armagedon ‘bijigo.’—Matayo 24:3.
Lwiny mir Armagedon bitimere awene? Kinde ma Yesu ubino weco iwi “masendi ma dit” ma bithum ku lwiny mir Armagedon, ewacu kumae: “Ng’atu moko mbe m’ung’eyo nindo man saa maeno, nik’ebed jumalaika mi polo, kadi Wod, ndhu Wego kende.” (Matayo 24:21, 36) Re, Biblia unyutho nia lwiny mir Armagedon bitimere i saa mi bedonuti pa Yesu m’ucaku i oro 1914.—Matayo 24:37-39.