Nyo dini ceke rom? Nyo gin ceke giterojo i bang’ Mungu?

Lembe ma Biblia udwoko

Ungo, dini ceke tie ngo rom. I Biblia, wanwang’u lapor mi dini ma tung’ tung’ ma foyo ngo i Mungu. Dini maeno ginwang’iri i ungu ario.

Ungu mi 1: Niworo mungu m’araga

Biblia uwacu nia niworo mungu m’araga utie “gin ma ie nanu” man “ma kuloka mbe i iye.” (Yeremia 10:3-5; 16:19, 20) Yehovaa Mungu ugam ung’olo ni thek mir Israel ma con kumae: “Kud ibed ku mungu mange ndhu an.” (Ai 20:3, 23; 23:24) Kinde ma nyithindho mir Israel gicaku woro mungu mange, ‘ng’eicwiny pa Yehova uopo’ i kumgi.​—Wel 25:3; Lembe mi Julawi 20:2; Jupoklembe 2:13, 14.

Tin de Mungu tie ku nen ma rom eno iwi woro mungu m’araga ma “julwong’ogi ya mungu.” (1 Jukorintho 8:5, 6; Jugalatia 4:8) Eng’olo ni dhanu ceke ma gimito niwore nia giwek nidikiri ku ju ceke ma gin’i dini mi ndra, eyero kumae: “Wuai woko kud i kindgi, man wubed tung’.” (2 Jukorintho 6:14-17) Ka nwang’u dini ceke tie rom man gitero dhanu i bang’ Mungu, dong’ ke pirang’o Mungu ung’olo lembe maeno?

Ungu mir 2: Niworo Mungu mandha i ayi m’efoyo ngo

Saa moko, nyithindho mir Israel gibed giroyo i thier migi, yioyic man timo ma gicoko i bang’ ju ma giworo mungu m’araga, ento Yehova ujukogi pi kero ma gibino timo pi nijebo dini mandha ku mi ndra. (Ai 32:8; Poi mi cik 12:2-4) Yesu ujuko judong dini mi rundi pare pir ayi ma gibino woro ko Mungu; pilembe gibino weg umbili: gibino nyutho yo woko nia gitie jurudini ma ke lundo giweko “lembe ma pigi tek lee mi Cik calu ve pokolembe m’atira, kisa man bedopwe.”​—Matayo 23:23.

Rom rom kumeno bende tin, dini m’ucungo iwi lemandha kende re ma tero dhanu i bang’ Mungu. Lemandha maeno nwang’ere i Biblia. (Yohana 4:24; 17:17; 2 Timoteo 3:16, 17) Dini ma ponji migi ukoc ku lembe mi Biblia, gibewingo wi dhanu bor kud i kum Mungu. Ponji ma pol ma dhanu paru nia uai i Biblia, calu ve ponji mi Trinita, ng’eyong’ec ma tho ngo, mac ma kuthum, jucokogi i bang’ ju ma giworo mungu mi ndra. Dini moko ci m’ubemewo ponji ma kumeno tije mbe, pilembe ebeweko cik pa Mungu, ento ebeponjo lemkei mi dini.​—Marko 7:7, 8.

Mungu udagu umbili mi jurudini. (Tito 1:16) Pi nikonyo dhanu kara gicor ceng’ini i vut Mungu, dini ucikere nicwalugi gitii ku gin ma gibeponjo i kwo migi ma kubang’ rupiny, ento ecikere ngo nibedo gin moko ma gitimo pilembe nia ebekwayere. Ku lapor, Biblia uwacu kumae: “Tek ng’atu moko ubeparu nia e jaradini ma ke egwoko ngo dhoge, eca nwang’u ebewondo adundene gire man woro m’eworo ko Mungu de tije mbe. Kum i wang’ Mungu ma Wegwa, dini m’umbe cilo ni e: Nigwoko nyithikic ku montho i masendi migi man nigwokiri i kum cilo m’i ng’om.” (Yakobo 1:26, 27; korolembe mi there.)