Penji Mi Jusom
Nyo wec ma jakwenda Paulo uyero ma nwang’ere i 1 Jukorinto 15:29, ubenyutho nia con Jukristu moko gibed gilimo batizo kaka ju m’utho?
Ungo, pilembe Biblia kadi buku mange de unyutho ngo nia gibed gitimo lembe maeno.
Kite ma juloko ko giragora maeno i Biblia ma pol, uketho dhanu moko paru nia i rundi ma kwong’a jubed julimo batizo kaka ju m’utho. Ku lapor, Biblia Maleng’ (Catholic edition) uwacu nia, “[ka] jucyero jumutho ngo, pirang’o ma jumio batisimo pi jumutho?”
Kewinj lembe ma jururieko moko ario ma giponjo lembe iwi Biblia giyero pi lembe maeno. Dr. Gregory Lockwood uwacu nia gin moko acel de mbe i Biblia kunoke i buku mange, m’unyutho nia jubed jumio batizo ni ng’atini kaka ng’atu m’utho. Jararieko mange ma nyinge Gordon D. Fee ke ukiewo kumae: “Biblia kadi buku mange de uweco ngo pi batizo ma kumeno. Kadok buku mi Lembariba ma Nyen de uweco ngo pire. Jubed jutimo ngo kit lembe ma kumeno i kanisa mange de kadok i dini m’udok ucaku ndhu ndhu i ng’ei tho mi jukwenda.”
Biblia uwacu nia julub pa Yesu ‘giketh dhanu m’i kind thek ceke udok julub, gimii igi batizo . . . , [man] giponjgi nia giwor gin ceke’ m’eng’olo igi. (Mat. 28:19, 20, NWT) I wang’ nidoko jalub m’ulimo batizo, ng’atini ucikere niponjo lembe iwi Yehova giku Yesu, eyigi man ewor lembe ma ging’olo. Ng’atu m’utho copo timo ngo lembuno; kadok Jakristu ma kwo de copo timo ngo lembene kaka ng’atu m’utho.—Ekl. 9:5, 10; Yoh. 4:1; 1 Kor. 1:14-16.
Dong’ eno Paulo umito yero ang’o?
Jukristu moko mi Korinto gibed gikwero nia cer upe. (1 Kor. 15:12) Paulo unyutho igi kamaleng’ nia gibino wondiri. Ekoro igi nia ‘etho ku ba rupiny.’ Paulo utho ku ba rupiny nenedi ma ke lundo ebino kwo? Eng’eyo nia kadok peko m’ebino nwang’ere ko kubang’ ceng’ binege anega de, cwinye bino tek nia ebicer ku kum mi tipo calu Yesu.—1 Kor. 15:30-32, 42-44.
Jukristu mi Korinto gicikiri ning’eyo nia, calu gitie Jukristu ma juwiro ku tipo, gibikadhu kud i masendi dupa man tho i wang’ cer migi. Calu gilimo batizo “i Kristu Yesu” gilimo batizo “i tho pare” bende. (Rum. 6:3) Eno nyutho nia calu Yesu, gin bende gibinwang’iri ku peko man tho kan i ng’eye gibicer pi nicidho i polo.
Oro ma kadhu ario i ng’ei ma Yesu limo batizo i pii, eyero ni jukwenda pare moko ario kumae: “Baputisi . . . m’amaku wubimaku bende.” (Mk. 10:38, 39) Eno Yesu bino weco ngo iwi batizo m’emaku i pii, ento emito yero nia, ebigwoko bedoleng’ pare nitundo i tho kadok kud i kind peko. Paulo ukiewo nia Jukristu ma juwiro ku tipo ‘gibisendri ku [Kristu], kara juyunggi karacelo kude.’ (Rum. 8:16, 17; 2 Kor. 4:17) Pieno gin de gibitho kara gicer pi nicikwo i polo.
Nimakere ku lembe maeno, kite ma cuu ma jucopo loko ko wec ma Paulo uyero ni e: “Pieno, ju ma gibelimo batizo pi nibedo ju m’utho e gibitimo ang’o? Tek cer mi ju m’utho umbe, dong’ ke pirang’o gibelimo batizo pi nibedo ju m’utho?” (NWT).