Tim kero ilim batizo: etie lem ma pire tek lee!

Yesu uponjo nia Jukristu gicikiri nilimo batizo. (Som Matayo 28:19, 20.) Re batizone julimo nenedi? Man lembang’o m’ukwayu itim i wang’ nilimo?

1. Jucikiri nilimo batizo nenedi?

Wec ma nia “batizo,” uai kud i wec mi dhu Jugiriki ma thelembene tie “niroyo vuc” i the pii. Pieno, kinde ma Yesu ubelimo batizo, juroye en zoo emwony i pii mi kulo Yordan; i ng’eye Biblia uyero nia “eai malu kud i pii.” (Marko 1:9, 10) I bang’ Jukristu mandha bende, ka ng’atini ubelimo batizo, juroyo kume zoo mwony vuc i pii.

2. Limo batizo nyutho ang’o?

Ka ng’atini ubelimo batizo, nwang’u ebenyutho nia edaru thiero kwo pare ni Yehova Mungu. Juromo thieriri nenedi ni Yehova? I wang’ nilimo batizo, ng’atini lar rwo en gire i bang’ Yehova, man i rwone, eng’olo nia ebitimo ire nja ku nja. Bende, eng’olo ni Yehova nia ebitimo ire kende man nia yeny pa Mungune re m’ebiketho ni gin ma kwong’a i kwo pare zoo. Ka ng’atini utimo kumeno, nwang’u eng’iyo “nikwerere gire” man ‘nimedere nilubo tok’ Yesu man ponji pare. (Matayo 16:24) Ka ng’atini uthierere man elimo batizo, edoko jarimb Yehova ma ceng’ini mandha man bende jarimb jurutic pare.

3. Lembe m’ukwayu itim i wang’ limo batizo

I wang’ limo batizo, pire tie tek nia ilar iyikiri. Nenedi? Ubekwayu ikeponj lembe iwi Yehova man itim kero nibedo ku yiyoyic ma tek i iye. (Som Juebrania 11:6.) Kinde ma yiyoyic man ng’eyong’ec peri iwi Yehova ubemedere, mer m’imare ko bende bimedere. Lembuno biroyo i ii ava mi rweyo pire ni dhanu mange man ibicaku kwo nimakere ku cik pare. (2 Timoteo 4:2; 1 Yohana 5:3) E kinde ma dong’ ibewotho “i ayi m’uromo ku Yehova” man ‘ibenyayu anyong’a i iye i lembe ceke,’ icopo maru nithiero kwo peri ni Mungu man nilimo batizo.​—Jukolosai 1:9, 10.a

MED NYANG’ PERI

4. Ponji ma waromo nwang’u i kum lembe ma Biblia uyero iwi batizo pa Yesu

Som Matayo 3:13-17 pi ning’eyo kite ma batizo pa Yesu ugam ukadhu ko. I ng’eye, wuwec iwi penji m’ulubo e:

• Nyo Yesu ulimo m’etie nyathin ma noki?

• Elimo nenedi? Nyo jukonjo kunoke jutono pii atona i wiye?

I ng’ei limo batizo, Yesu ucaku tic ma pire tek ma Mungu umiyo ire iwi ng’om keni. Som Luka 3:21-23 man Yohana 6:38, man i ng’eye wuwec iwi penji m’ulubo e:

• I ng’ei limo batizo, Yesu uketho tic ma kani i kabedo ma kwong’a i kwo pare?

5. Kud ilwor, icopo tuc nilimo batizo

Ku kwong’a, nithiero kwo ni Yehova man nilimo batizo copo nen ni lembe ma pek akeca. Re, nok nok kan ibemediri niponjo lembe iwi Yehova man ibeng’eye cuu, ibigam nwang’u nia itie ayika nimaku yub maeno ma pire tek. Dhanu moko de nuti ma gitimo kumeno. Pi ning’eyo ju moko m’i kindgi, nen VIDEO.

VIDEO: Kite mi doko ku winjiri ma ceng’ini ku Yehova (1:11)

Som Yohana 17:3 man Yakobo 1:5, man i ng’eye wuwec iwi penji m’ulubo e:

• Lembang’o ma copo konyo ng’atini kara eyikere pi batizo?

1. Wathiero kwo mwa ni Yehova nwang’u wabeng’olo ire i rwo nia wabitimo ire rondo ku rondo

2. Kinde ma wabelimo batizo, nwang’u wabenyutho ni dhanu ceke m’ubenenowa nia wadaru thiero kwo mwa ni Mungu

6. Ka walimo batizo, wadoko acel m’i kind juruot pa Yehova

Ka walimo batizo, wadoko juruot acel karacelo kud umego ku nyimego mi ng’om zoo ma gibetimo ni Mungu i acel. Kadok watie dhanu mi suru, dhok, man kabedo ma tung’ tung’ de, re wan ceke watie ku yiyoyic ma rom man wabeworo cik ma rom mi Biblia i kwo mwa. Som Yakobo 2:23 man 1 Pethro 2:17, man i ng’eye wuwec iwi penji m’ulubo e:

• Ka ng’atini ulimo batizo, winjiri pare ku Yehova man ku jurutic pare mange doko nenedi?

I ADUNDO

Yesu uponjo nia Jukristu gicikiri nilimo batizo. Re i wang’ limo batizone, kwayu ng’atini ular utim kero nibedo ku yiyoyic ma tek i Yehova, ecak nikwo nimakere ku cik pa Mungu, man ethier kwo pare gire ni Yehova.

Penji mi poyowic

• Julimo batizo nenedi man pirang’o pire tek nilimo?

• Limo batizo nyutho ang’o?

• I wang’ nithiero kwo mwa man nilimo batizo, kwayu walar watim ang’o?

TIM SAYUSAC

Batizo tie ang’o, man etie ngo ang’o? Som thiwiwec ma e pi ning’eyo.

“Batizo tie ang’o?” (Thiwiwec mi jw.org)

Nen lembe ma tung’ tung’ ma ng’atini copo timo i wang’ limo batizo.

“Mer m’imaru ko Yehova bicweli nilimo batizo” (Otkur ma Wiw, dwi mir 3, 2020)

Jalwo moko umaku yub mi limo batizo pilembe enwang’u en gire nia eni tie lemandha. Som pire i gazeti ma e:

“Gimito anen an gira lembe ma Biblia ubeponjo” (Otkur ma Wiw, nindo 1, dwi mir 2, 2013)

Som thiwiwec ma e pi nineno nia pirang’o ecopere nilimo batizo man pi ning’eyo lembe m’ukwayu itim i wang’ nilimo.

“Nyo acikara nilimo batizo?” (Penji m’aradu gipenjiri ko. Dwokowang’ lembe ma konyojo, Buku mir 2 wic mi 37, mi français)