Idaru wok kakani i yo peri m’ibecidho ko i batizo?
KWO MI JUKRISTU
Tim ng’iong’ic mi timo ni Yehova
Kan itie aradu ma jarwei lembanyong’a ma fodi ulimo ngo, kunoke itie japonj Biblia, nyo idaru ketho lembakeca mi limo batizo? Pirang’o ukwayu ilim batizo? Nithieriri ni Yehova man nilimo batizo, ketho wacaku bedo ku winjiri ma ceng’ini kude. (Zb 91:1) Man gicopo ketho waboth bende. (1Pe 3:21) Dong’ icopo tim’ang’o kara ithier kwo peri man ilim batizo?
Kenwang’ in giri nia in’i lemandha. Ka penji moko tie m’usendo wii, tim sayusac pi ninwang’u dwokowang’e. (Rm 12:2) Kenen nia nyo lembe moko tie m’ukwayu itim alokaloka i ie, man ng’ei nia alokaloka m’itimone utie pi ninyayu anyong’a i Yehova. (Rie 27:11; Ef 4:23, 24) Bed ikwaye ekonyi. Ng’ei nia Yehova bimio iri tego man ebikonyi ku tego mi tipo pare ma leng’. (1Pe 5:10, 11) Ng’ei bende nia kero m’ibetimo tie mananu ngo. Nitimo ni Yehova utie gin ma ber m’usagu zoo i kwo!—Zb 16:11.
NEN VIDEO MA THIWIE TIE YO MA TEROJO I BATIZO, MAN I NG’EYE, DWOK WANG’ PENJI M’ULUBO E:
Jumoko uvoyo peko ma kani pi nilimo batizo?
Icopo medo yioyic peri nenedi kara ithier kwo peri ni Yehova?
Ang’o m’ugam ucwalu jumoko kara gitim lembe ma tung’ tung’ m’ukwayere pi nilimo batizo?
Ju ma ging’io nitimo ni Yehova gibenwang’u mugisa ma kani?
Nithieriri man nilimo batizo thelembene tie ang’o?