Dik cingi i kum Yesu ma Jatela mwa

1. Yeny pa Yehova utie ang’o tini?

ETIE yeny pa Mungu nia tin lembanyonga mi Ker urweyere i ng’om zoo. (Mark. 13:10; 1 Tim. 2:3, 4) Eno tie tic pa Yehova, man etie tic ma pire tek lee m’eketho i the telowic pa Wode m’emaru. Cwinywa tek nia i the telowic pa Yesu, tic mi rweyo lembanyong’a bitimere tap calu ma Yehova umito ma fodi ajiki utundo ngo.​—Mat. 24:14.

2. Wabineno lembang’o i thiwiwec maeni?

² I thiwiwec maeni, wabineno ayi ma Yesu ubetiyo ko ku “jamiru mandha man ma riek” pi nimiyo cam mi tipo man nitelo wi julubne pi tic ma dit mi rweyo lembanyong’a nisagu m’i wang’e zoo. (Mat. 24:45) Wabineno bende gin ma ng’atuman m’i kindwa copo timo pi nidiko cinge ku Yesu man ku jamiru mandha.

YESU UBETELO WI TIC MI RWEYO LEMBANYONG’A

3. Jumiyo dito ma kani ni Yesu?

³ Yesu ubetelo wi tic mi rweyo lembanyong’a. Wang’eyo nenedi? Nyanok i wang’ nidok i polo, ecoko julub pare girombo kugi iwi got Galilaya. Eyero igi kumae: “Judaru miyo dito ceke ira, i polo kud i ng’om bende.” Edok eyero ndhundhu i ng’eye kumae: “Wucidhi, man wuketh dhanu m’i thek ceke udok julub.” (Mat. 28:18, 19) Pieno, kud i kind gin ma jumiyo ditone ni Yesu, moko utie nitelo wi tic mi rweyo lembanyong’a.

4. Pirang’o wacopo bedo ma cwinywa tek nia Yesu ubetelo asu wi tic mi rweyo lembanyong’a?

⁴ Yesu uyero nia tic mi rweyo lembanyong’a man mi ketho dhanu udok julub bitimere i “thek ceke,” man ebibedo karacelo ku julubne “i nindo ceke nitundo i kajik mi ng’om.” (Mat. 28:20) Wec maeno ubenyutho nia tic mi rweyo lembanyong’a bitimere i the telowic pa Yesu cil i nindo ma tin.

5. Wabetimo ang’o kara lembila mi Zaburi 110:3 upong’i?

⁵ Lworo unego ngo Yesu nia jurutic bibedo nyanok i nindo mir ajiki mi ng’om maeni. Eng’eyo nia wec ma e mi lembila mi Zaburi bitimere: “Dhanu peri gimiri gigi ku berocwiny i ceng’ mi tego peri.” (Zab. 110:3) Tek in de ibed irweyo lembanyong’a, eno nyutho nia ibediko cingi ku Yesu man jamiru mandha pi nipong’o lembila maeno. Ticne ubemedere i wang’e, re peko de tie.

6. Peko acel ma kani ma tin jurwey lembanyong’a mi Ker gibenwang’iri ko?

⁶ Peko acel ma jurwey lembanyong’a mi Ker gibenwang’iri ko tin utie jai. Ju m’ujai i kum yiyoyic, judong dini man judongo pa gavmenti gidaru mewo rwonglembe mi vupo dupa i kum tic mwa. Tek wedi mwa, dhanu ma wang’eyara kugi man jurutic wadwa giyiyo vupone, gicopo diyowa nia wawek nitimo ni Yehova man wajig nirweyo lembanyong’a. I ng’om moko, judegi mwa gibesendowa, gitwiyowa, man giroyowa kadok i kol. Lembe ma dhanu ubetimo eno ubewang’u iwa ngo, kum Yesu ular uyero nia “thek ceke de bidaguwu pi nyinga.” (Mat. 24:9) Adegi ma dhanu udagu kowa ubenyutho kamaleng’ nia wabenyayu anyong’a i Yehova. (Mat. 5:11, 12) Wonabali re m’ucwalu dhanu unyai ragedo i kumwa. Re tego pare romo ngo ku pa Yesu! Ku kony pa Yesu, lembanyong’a udaru rweyere ni dhanu mi thek ceke. Wakenen gin m’unyutho lembuno.

7. Ang’o m’ubenyutho nia andha lembila mi Lembanyutha 14:6, 7 ubepong’o?

⁷ Peko mange ma wa jurwey lembanyong’a wanwang’ara ko utie peko mi dhok ma tung’ tung’ ma jubeweco. I Lembanyutha ma jukelo ni jakwenda Yohana, Yesu ular uyero nia i rundi mwa eni, rwong lembanyong’a bivoyo peko maeno. (Som Lembanyutha 14:6, 7.) Nenedi? Wabemiyo kaka ni dhanu dupa kara giwinj rwonglembe mi Ker. Tin i wang’ ng’om zoo, dhanu copo somo girasoma mwa m’ujengere iwi Biblia i jw.org i dhok ma kadhu 1 000! Guriri m’utelowic uyiyo nia julok buku Icopo kwo kud anyong’a rondo ku rondo! ma tie jamtic mwa ma pire tek mi ketho dhanu udok julub, i dhok ma kadhu 700! Cam mi tipo utie bende nikadhu kud i video pi ju ma ithgi udhing’ man girasoma ma jusomo ku cing’ (braille) pi ju ma wang’gi utho. Wabeneno lembila mi Biblia ubepong’o andha. Dhanu mi “thek ceke” ubeponjo niweco “dhok ma leng’” mi Biblia. (Zek. 8:23; Zef. 3:9) Lembuno ceke ubetimere nikum telowic ma cuu pa Yesu Kristu.

8. Nitundo kawoni, adwogi ma kani ma wanwang’u i kum tic mi rweyo lembanyong’a?

⁸ Tin dhanu ma kadhu milioni 8 i ng’om 240 gin’i dilo pa Yehova, man kubang’ oro dhanu elufu swa ubelimo batizo! Ento m’usagu zoo, julub ma nyen maeno gironyo “ng’atu ma nyen,” niwacu kite mi Jukristu i kwo migi. (Kol. 3:8-10) Dupa m’i kindgi uweko timo mi lembsasa mi tarwang’, rop, akoyakoya man maru ng’om ma thugijo nisagu m’ukero. Lembila ma jukiewo i Isaya 2:4 ubepong’o tin i wigi; gibeponjo ngo kiedo lwiny kendo. Kite ma nyen ma waronyo uketho wabekonyo dhanu mange de ubin i dilo pa Mungu, man wabenyutho nia wabeworo telowic pa jatela mwa Kristu Yesu. (Yoh. 13:35; 1 Pet. 2:12) Lembuno ubetimere ngo gire kumeni, Yesu re m’ubemiyo iwa kony ma watie ku yenyne.

YESU UNG’IYO JAMIRU MANDHA

9. Nimakere ku Matayo 24:45-47, Yesu ular uwacu nia lembang’o ma bitimere i nindo mi kajik ceng’i?

⁹ Som Matayo 24:45-47. Yesu ular uwacu nia i nindo mi kajik ceng’, ebiketho “jamiru mandha man ma riek” pi nimiyo cam mi tipo. Eno ubenyutho nia jamiru eno bitimo tic ma tek i rundi mwa eni. De andha ebetimo kumeno. Yesu jatela mwa utiyo kud ungu ma nok mi dhanu ma co ma juwiro ku tipo, pi nimiyo cam mi tipo ni dhanu pa Mungu man ni jumage tap “i saane.” Jumaco maeno ma juwiro gineniri ngo nia gibimo wi yiyoyic mi jumange. (2 Kor. 1:24) Tung’ ku maeno, ging’eyo nia Yesu Kristu re m’utie “jatelwic man jego” mi dhanu pare.​—Isa. 55:4.

10. Kud i kind buku ma junyutho i cal no, ma kani m’ukonyi nicaku wotho i yo mi kwo ma rondo ku rondo?

¹⁰ Niai i oro 1919, jamiru mandha uwodho girasoma ma tung’ tung’ pi nikonyo dhanu ma nyen m’ubed umaru niponjo lemandha i Lembe pa Mungu. I oro 1921, ewodho buku La Harpe de Dieu pi niponjo dhanu mange ku ponji mir ukungu mi Biblia. Kubang’ nindo m’ubecidho, judok juwodho girasoma mange bende. Kud i kind buku m’ulubo e, ma kani m’ukonyi ning’eyo man nimaru Wegwa m’i polo? Nyo ubino “Que Dieu soit reconnu pour vrai !,” La vérité qui conduit à la vie éternelle, Vous pouvez vivre éternellement sur une terre qui deviendra un paradis, La connaissance qui mène à la vie éternelle, Qu’enseigne réellement la Bible ?, Biblia ubeponjowa ku lembang’o?, kunoke nyo buku m’uwok ma nyen Icopo kwo kud anyong’a rondo ku rondo!? Buku maenogi ceke ubino pi niponjo dhanu udok julub man gibino tap gin ma wabedo ku yenyne saa ma giwok i iye.

11. Pirang’o wan ceke watie ku yeny mi medo ng’eyong’ec mwa iwi Yehova man i Biblia?

¹¹ Tie ngo dhanu ma nyen kendgi re ma gitie ku yeny mi medo ng’eyong’ec migi iwi Yehova man i Biblia, ento wan ceke. Jakwenda Paulo ukiewo kumae: “Cam ma nwang’ utie pi dhanu m’uteng’ini.” Paulo udok umedo nia nitiyo ku gin ma wabeponjo bikonyowa “nikoyo kind gin ma ber ku gin ma rac.” (Ebr. 5:14) I nindo maeni ma rac, ma kurajo udaru nyothere, ecopo bedo iwa tek niworo cik mi kurajo ma Yehova uketho. Ento Yesu uketho wabenwang’u tego nikadhu kud i cam mi tipo ma wabenwang’u. Ukungu mi cam mi tipone utie Biblia Lembe pa Mungu. Jamiru mandha man ma riek, ubewodho cam eno i the telowic pa Yesu.

12. Calu Yesu, wamiyo yung nenedi ni nying’ Mungu?

¹² Calu Yesu, wamiyo yung ni nying’ Mungu calu m’uromo pire. (Yoh. 17:6, 26) Ku lapor, i oro 1931, wanwang’u nying’ m’uai kud i Lembagora ma walwong’ara ko nia Jumulembe pa Yehova; man eno ubenyutho nia wamito wang’eyara ku nying’ Wegwa m’i polo. (Isa. 43:10-12) Bende, niai i dwi mir 10 mi oro ma rom eno, jucaku kiewo nying’ Mungu kamaleng’ i ng’ey gazeti ceke ma jubewodho. M’umedo maeno, i Biblia​—Lok mi ng’om ma nyen, judwoko nying’ Mungu kubang’e kubang’e kakare. Eno tie lembe m’ukoc bor ku dini mange ma giwodho nying’ Yehova cen kud i Biblia ma dupa ma giloko!

YESU UBEKONYO JULUB PARE KARA LEMBE UPANGERE MA BER

13. Ang’o m’uketho cwinyi tek tin nia Yesu re m’ubetiyo ku “jamiru mandha man ma riek”? (Yoh. 6:68)

¹³ Nikadhu kud i bang’ “jamiru mandha man ma riek,” Yesu uketho julub pare gibenwang’iri i dilo ma segi iwi ng’om pi nitimo thier ma leng’. Iwinjiri nenedi pi dilo maeno? Saa moko nyo in de ibewinjiri calu ma jakwenda Pethro uwinjere ko kinde m’ewacu ni Yesu kumae: “Rwoth, wabicidho i bang’ ng’a? Itie ku wec mi kwo ma rondo ku rondo.” (Yoh. 6:68) Ka nang’ wambe i dilo pa Yehova, eni nang’ wani kani? Nikadhu kud i dilo eno, Kristu uketho wabecamu ma ber i thenge mi tipo. Ebeponjowa kara watim tic mwa mi lembanyong’a cuu mandha. M’umedo maeno, ebekonyowa “nironyo ng’atu ma nyen” kara wanyay anyong’a i Yehova.​—Efe. 4:24.

14. Bedo i dilo pa Yehova uketho inwang’u bero ma kani i saa mi thong’om mi Korona?

¹⁴ Yesu ubemiyo telowic mi rieko i saa mi peko. Bero mi telowic maeno unen kamaleng’ i saa mi thong’om mi Korona. Kinde ma dhanu dupa iwi ng’om ging’eyo ngo gin m’ukwayu gitim, Yesu uketho wanwang’u telowic ma kamaleng’ kara wabed agwoka. Jukwayuwa nia wakend maske saa ma wabenwang’ara i kind dhanu, man waketh kindwa ubed bor bor. Jupoyo wi judong cokiri nia gibed giwec thiri thiri ku dhanu ceke mi cokiri man ging’ey pi yeny migi mi kum ku mi tipo. (Isa. 32:1, 2) Wabed wanwang’u telowic mange man tielocwiny nikadhu kud i lembe ma nyen m’uai kud i Guriri m’utelowic.

15. (a) Telowic ma kani ma jumiyo iwi ayi mi timo coko man mi rweyo lembanyong’a i saa mi Korona? (b) Lembene ubedo kud adwogi ma kani?

¹⁵ I saa mi thong’om mi Korona, wanwang’u bende telowic ma kamaleng’ iwi ayi mi timo coko man mi rweyo lembanyong’a. Pio pio wacaku timo coko mwa, coko ma dongo mi twodiri ku mir adhura nikadhu kud i Internet. Wacaku bende nirweyo lembanyong’a asagane ku barua man ku simu. Yehova umiyo mugisa iwi kero mwa. Rapor m’uai i filial ma dupa unyutho nia wend jurwey lembanyong’a umedere ameda. I andha, dhanu ma pol unwang’u lembe dupa ma tielo cwinyjo i saa maeno.​—Nen sanduku “Yehova umiyo mugisa iwi tic mwa mi Lembanyong’a.”

16. Cwinywa tek i kum lembang’o?

¹⁶ Jumoko copo nwang’u nia ve dilo mwa ukadhu mupaka pir ayi m’umito jugwokiri ko pi thong’om. Re kubang’ nindo m’uwotho kadhu, unen kamaleng’ nia ebino tap telowic m’ukwayere. (Mat. 11:19) Ka waparu pir ayi ma Yesu ubetelo ko wi dhanu pare ku mer, cwinywa bedo tek nia kadok wabinwang’ara ku lembang’o i nindo m’ubino de, Yehova giku Yesu gibibedo karacelo kudwa.​—Som Juebrania 13:5, 6.

17. Nibedo i the telowic pa Yesu uketho ibewinjiri nenedi?

¹⁷ Etie iwa mugisa ma dit mandha nitimo i the telowic pa Yesu! Watie i dilo m’umbe kud akoyakoya mi suru, thek, man dhok. Wabecamu ma ber i thenge mi tipo, man wabenwang’u ponji ceke m’ukwayere kara watim tic mi lembanyong’a ma ber. Ng’atuman m’i kindwa ubenwang’u ponji ma copo konye nironyo ng’atu ma nyen, man nimarara i kindwa. Watie ku thelembe ma wabeyungara ko pilembe Yesu utie jatela mwa!