Nyo itie ayika ‘nilagu ng’omi’?

WAN ceke wabekuro kud ava pong’o mi lembang’ola ma e ma Yesu ung’olo: “Mutoro ni ju ma mol, kum gibilagu ng’om.” (Mat. 5:5, kmt.) Jukristu ma juwiro ku tipo gibilagu ng’om kinde ma gibibimo wi ng’ombe kud i polo karacelo ku Yesu. (Nyu. 5:10; 20:6) Dupa mi Jukristu mandha tin gibekuro kud ava nilagu ng’om man nikwo i wiye rondo ku rondo ku kum m’umbe dubo, ku kwiyocwiny, man kud anyong’a. Re kara lembuno utimere cuu, bikwayu gitim tic ma pire tek. Wakewec iwi tije moko adek: Nidwoko ng’om udok ni paradizo, nikonyo ju m’ucer, man niponjogi. Dong’ wakenen kite ma wacopo nyutho ko nia watie ayika niai kawoni pi nitimo lembuno.

NYO ITIE AYIKA NIDWOKO NG’OM UDOK NI PARADIZO?

Kinde ma Yehova ung’olo ni dhanu nia ‘gipong’ ng’om, man gidwoke wor,’ enyutho nia ng’om zoo ubed ni paradizo. (Tha. 1:28) Ju ma gibilagu ng’om de gibitimo lembe maeno. Ng’om bidoko ngo paradizo wang’ acel niai i acaki, kum Eden ma yang’ con ca udaru nyothere. Ndhundhu i ng’ey Armagedon wabibedo ku tic dupa mi yiko kaka ma tin unyothere. M’umbe jiji ebibedo tic ma goge nuti!

Lembuno ubepoyo wiwa i kum tic ma yang’ Juisrael gitimo kinde ma gidwogo kud i Babeli. Ng’om migi ugam udong’ ni uvuru pi oro 70. Ento jabila Isaya uewo nia ku kony pa Yehova gibiyike ebidoko leng’ kendo kakare. Lembilane uwacu kumae: “Edwoko langa pare calu Aden, man ng’omngele pare calu podho pa Yehova.” (Isa. 51:3) Ku kony pa Yehova, giyiko ng’om migi udoko ma leng’. Kumeno bende, nikum mugisa pa Yehova, ju ma bilagu ng’om de gibibedo ku copo mi ketho ng’om udok ni paradizo. Niai kawoni, in de icopo nyutho nia itie kud ava mi dikiri i tije.

Yo acel m’icopo nyutho ko nia itie ayika utie niketho ot peri man ng’ete ubed ma leng’, bende niketho pinyman ubed kakare kakare. Ukwayu itim kumeno kadok nwang’u jirani peri gibetimo ngo de. Icopo bekonyo tic mi ketho leng’o i Ot Ker man i Ot coko ma dongo. Tek ecopere iri, iromo miyiri bende nidikiri i tic mi miyo kony kaka ma peko uwok rek i iye. I ayi maeno re ma nwang’u ibenyutho nia itie ayika nikonyo kaka ma yeny ubekwayere i iye. Dong’ kepenjiri kumae: ‘Nyo acopo ponjo ngo bodho moko m’aromo tiyo ko tek abinwang’u mugisa mi lagu ng’omi?’

Ungu mir umego ku nyimego moko ubeketho leng’o i Ot Ker man gibeyiko kaka m’unyothere.

NYO ITIE AYIKA NIKONYO JU MA BICERI?

Kinde ma Yesu ucero nyaku pa Yairo, eng’olo wang’acel nia jumii piny moko nyathin ne ucam. (Mark. 5:42, 43) Copere nia ebino ngo lembe ma tek nipong’o yeny pa nyatin maeno ma nyaku mi oro 12. Re kepar pi lembe ma bikwayu jutim kinde ma Yesu bipong’o lembang’ola pare, saa ma “dhanu ceke ma gin’i kabuli gibiwinjo dwande man gibiwok woko.” (Yoh. 5:28, 29) Kadok Biblia ukoro ngo pi lembene hai de, re ubenen nia ju ma bicer gibibedo ku yeny mi gin ma gicam, kaka ma gibed i iye, man mi kendi. Nyo icopo nyutho niai kawoni nia itie ayika nikonyogi? Ka eyo, penji m’ulubo e copo konyi.

Icopo timo ang’o niai tin pi ninyutho nia itie ayika nilagu ng’omi?

Umego ku nyimego moko gibejolo kud anyong’a ju ma juoro i coko ma dit mir adhura m’udiko ng’om ma tung’ tung’ i Paris.

Tek jutwong’o nia jaliew ubebino liewo cokiri peri, nyo ibed ijole kara wucam kude cam moko? Ka Bethel uoro jayab yo moko ma segi i beng’wu, kunoke tic pa jaliew mi twodiri moko ujik, nyo icopo bedo ayika nikonye kara enwang’ kaka moko m’ebed i iye? Tek coko ma dit mir adhura kunoke coko mange ma segi bitimere i beng’wu, nyo icopo wodhiri ngo nikonyo tic i wang’e kadi i ng’eye, kunoke nijolo ju ma juoro i cokone?

NYO ITIE AYIKA NIPONJO JU MA BICERI?

Nimakere ku Tic mi Jukwenda 24:15, watie ku genogen nia dhanu milioni swa bicer. Ju dupa m’i kindgi bibedo dhanu ma gigam ginwang’u ngo kaka mi ng’eyo Yehova. Gibidok nwang’u kakane kinde ma gicer.a Jurutic pa Mungu re ma bitimo tic mi ponjogi. (Isa. 11:9) Nyamego Charlotte m’urweyo lembanyong’a i ng’om mir Europe, i Amerika ma yo piny, man i Afrika, ubekuro tic maeno kud ava. Ewacu kumae: “Abekuro kud ava mandha niponjo dhanu ma bicer. Kan asomo pi ng’atu moko m’ukwo con, wang’ ma pol aparu yor i iya kumae: ‘Ka nang’ ng’atuni ung’eyo Yehova, nwang’u kwo pare copo bedo ma ber.’ Abekuro kud ava niponjo ju m’ucer kara ging’ey Yehova man ninyutho igi nia kwo migi copo bedo ma ber ka gitimo ire.”

Kadok jurutic pa Yehova ma gilar gikwo con i wang’ Yasu de, gibibedo ku yeny ma juponj kogi ku lembe dupa. Kepar pir anyong’a man rwom ma wabibedo ko nikoro ni Daniel kite ma lembila m’ekiewo m’egam enyang’ ungo i iye upong’o ko. (Dan. 12:8) Kunoke nikoro ni Rutha giku Naomi nia juruot migi de ubino i kind anyoli ma Masiya uwok kud i iye. Ebibedo anyong’a ma dit mandha nidikiri i tic mi ponji i wang’ ng’om zoo, saa ma masendi ku lembe mange ma tin ubenyotho wijo e nwang’u umbe!

Nyamego moko ubemiyo trakt ni dhaku moko i kaka ma julwoko iye bongu.

Icopo nyutho nenedi niai kawoni nia itie ayika nidikiri i tic mi ponjo ju ma biceri? Yone acel utie nitimo kero nimedo bodho peri mi ponji man nidikiri thiri thiri i tic mi rweyo lembanyong’a. (Mat. 24:14) Kadok oro peri m’ucidho kunoke lembe mange ubeceri nirweyo lee de, re kero m’ibetimo copo nyutho nia itie kud ava mi ponjo ju ma bicer.

Dong’ penji ma pire tek ni e: Nyo andha itie kud ava mi lagu ng’omi? Nyo ibekuro kud ava nidwoko ng’om udok ni paradizo, nikonyo ju ma bicer man niponjogi? Icopo nyutho nia itie ayika nwang’u ibedikiri tin i tic m’urombo ku m’ubekuri kinde m’ibilagu ng’om!

a Nen thiwiwec “Tic mi ‘loko dhanu dupa i bangʼ bedopwe’” i Otkur ma Wiw mi dwi mir 9, 2022.