Nyo Ibepoy?
Nyo isomo cuu thiwiwec ma tung’ tung’ m’ubed uwok I Otkur ma Wiw mi oro maeni? Ka eyo, kenen nyo icopo dwoko wang’ penji m’ulubo e:
Wabinwang’u mugisa ma kani tek wabekoyo saa mi weco ku Yehova, mi winje, man mi nyamu i lembe i wiye?
Wabimaku yub ma cuu, wabibedo juponji ma ber, yiyoyic mwa bidoko tek, man mer ma wamaru ko Yehova de bidoko tek.—w22.01, mba. 30-31.
Wabinwang’u kony ma kani ka watimo kero nigeno Yehova man dhanu m’eketho utel wiwa?
Kawoni utie saa ma mito watim tego wabed ku genogen iwi ayi ma Mungu ubetimo ko lembe, ma kud wabed ko ku jiji iwi telowic mi judong cokiri man iwi yub ma gimaku. Saa ma masendi ma dit bicaku, wabibedo ayika niworo telowic ma jubemiyo iwa kadok nwang’u wanyang’ ungo i iye de.—w22.02, mba. 4-6.
Malaika umito yero ang’o kinde m’enyutho ni Zekaria pi “jampor i cing’ Zerubabel [ma jabim]”? (Zek. 4:8-10)
Ginmawokiwang’ maeno utego cwiny dhanu pa Mungu nia giedo mir hekalu bithum man ebibedo tap calu ma Mungu ubemito.—w22.03, mba. 16-17.
Wacopo bedo nenedi “lapor” ma ber i wec mwa? (1 Tim. 4:12)
Tek waweco ma ber man ku woro i tic mi lembanyong’a, wabewer kud adundewa ceke, wabedwoko wang’ penji nja i coko, wabeyero lemandha man wec ma gierojo, man wabekoc cen ku wec ma reco.—w22.04, mba. 6-9.
Pirang’o ayi yedi ang’wen ma tung’ tung’ (bimobim) ma juweco pigi i Daniel thek 7 judikogi zoo ni acel i buku mi Lembanyutha 13:1, 2?
Yedi mi Lembanyutha 13 ubenyutho ngo kende kende bimobim acel, calu ve mi Roma. Ento ebenyutho bimobim ceke ma dongo m’uwotho bimo wi kodhi dhanu.—w22.05, mba. 9.
Yo ma kani ma pire tek ma wacopo nyutho ko nia wageno bedopwe pa Mungu?
Tek ng’atu moko uyanyuwa, etimo iwa lembe ma rac, kunoke edubo iwa, watimo kero wabedo ngo ku kwinyo man akece i kume; waweko lembene i cing’ Yehova. Ebiyiko lembe ceke ma reco ma dubo unyayu.—w22.06, mba. 10-11.
Umego m’uberwo i wang’ dhanu i coko, ucikere nipoy i kum lembang’o?
Rwo utie ngo yo ma jutiyo ko pi nimiyo juk kunoke atwong’a i cokiri. ‘Wec ma lee’ yenyne umbe, asagane i rwo mir acaki mi coko. (Mat. 6:7)—w22.07, mba. 24-25.
“Ju m’utimo lembe ma reco” gibicer ni “cer mi pokolembe” i ayi ma kani? (Yoh. 5:29)
Jubipoko ngo lembe i wigi nimakere ku gin ma gitimo con ma fodi gikwo. Jubineno wigi nimakere ku timo man kura ma gibinyutho i ng’ey cer migi.—w22.09, mba. 18.
Lembang’o ma ber ma J. Rutherford ukwayu ko dhanu i coko ma dit mir adhura ma jutimo i dwi mir 9, 1922?
Eyero kumae i coko ma dit mir adhura m’ukadhu i Cedar Point, Ohio i États-Unis: “Nen, Rwoth ubebimo! Wutie jutwong’ rwonglembe pare. Pieno, wurwey, wurwey, wurwey pir Ubimo man pi Ker pare!”—w22.10, mba. 3-5.
Isaya thek 30 uketho nwoc iwi yo adek ma kani ma Mungu konyo kowa niciro?
Thek maeno unyutho nia (1) ewinjo man edwoko wang’ rwo mwa, (2) emiyo iwa telowic, man (3) ebemiyo iwa mugisa tin, man ebimiyo bende i nindo m’ubino.—w22.11, mba. 9.
Pirang’o wacopo wacu nia wec m’i Zaburi 37:10, 11, 29 ugam upong’o con i rundi mir Israel man ebipong’o bende i nindo m’ubino?
Wec ma Daudi uyero, ukoro pi mugisa ma Juisrael ginwang’u, calu ve i the bimobim pa Suleman. Yesu ke udok uweco pi paradizo mi nindo m’ubino man edok iwi versene mir 11. (Mat. 5:5; Luka 23:43)—w22.12, mba. 8-10, 14.