Nyo ibepoy?

Nyo isomo cuu thiwiwec ma tung’ tung’ m’ubed uwok i Otkur ma Wiw mi oro maeni? Ka eyo, kenen nyo icopo dwoko wang’ penji m’ulubo e:

Ang’o ma cwaluwa nimiyo dwong’ ni Yehova?

Wamiyo dwong’ ni Yehova pilembe watie ku woro ma thuc yor i bang’e man pilembe wamare lee mandha. Bende, wamiyo ire dwong’ pilembe wamito dhanu mange de ging’eye.—w25.01, mba. 3.

Tek ng’atu moko utimowa rac, wacopo nyutho nenedi nia watie ayika niweko ire?

Ukwayu ngo watimara ve lembe moko mbe m’ubedieng’o cwinywa. Mito ngo wabed kud akece i iwa kara cwinywa kud ubed upid akeca.—w25.02, mba. 15-16.

Pirang’o Marko utie lapor ma ber ni umego m’aradu?

Marko uyiyo ku berocwinye nitimo tic ma jumiyo i kore. Kadok nwang’u saa moko enwang’u nia jutime rac kunoke cwinye utur de, re eweko ngo nitimo tije. Emedere asu nibedo ku winjiiri ma ceng’ini ku Paulo man ku jumange.—w25.04, mba. 27.

Yesu umito yero ang’o kinde m’ewacu nia “Aketho ging’eyo nyingi”? (Yoh. 17:26)

Nwang’u dong’ julubne ging’eyo nying’ Mungu. Eketho ging’eyo Won nying’ne, uketho i iye lembakeca pare, tic pare man kite pare.—w25.05, mba. 20-21.

Tek watie dhanu ma jwigiri, wabing’eyo nia wambe ku copo mi ng’eyo lembang’o?

Wang’eyo nia lembe moko nuti ma wang’eyo ngo. Ku lapor, wang’eyo ngo nia ajiki bitundo awene, kunoke ayi ma Yehova bitimo ko lembe piwa saa maeca. Wang’eyo ngo bende nia ang’o ma bitimere urwo, man nia Yehova ung’eyowa i kadhiri ma rukani.—w25.06, mba. 15-18.

Wacopo nwang’u bero ma kani i kum thiwiwec ma wabeponjo man i kum korolembe mi dhanu ceke?

Wacopo penjara kumae: ‘Lemandha ma kani ma jutiyo ko pi niketho juwinj unyang’ ma beri? Nyo lapor moko ma ber unuti ma an de acopo tiyo ko pi niponjo jumange? Thiwiwec maeni copo konyo ng’a?’—w25.07, mba. 19.

Wacopo nwang’u ponji ma kani i kum kisa ma Mungu unyutho ni Daudi?

Kadok nwang’u Daudi utimo dubo ma pek de, re kinde m’eyewo dubo pare ku cwinye ceke, Yehova uweko ire. (1 Ub. 9:4, 5) Ka Mungu udaru weko dubo pa ng’atini, eweke mi magwei, edwogo ngo kendo i wiye, kadok i nindo m’ubino de.—w25.08, mba. 17.

Icopo timo ang’o kan etie tek ni japonj Biblia nimaku lembe ma wubeponjo?

Kan etie tek ni japonj Biblia nimaku lembe ma wuponjo cuu kud i Biblia, wukadh kud i wiye man wudok wudwog i wiye i ng’eye bor.—w25.09, mba. 24.

Biblia uwacu nia ‘dubo tie ku tego mir awondi.’ (Ebr. 3:13) Nenedi?

Dubo copo cwaluwa nitimo lembe ma rac. Ecopo wondo wang’wa nibedo ku jiji saa ceke, calu ve nia Mungu umaruwa ngo.—w25.10, mba. 16.

Kekwan lembe moko adek ma copo konyowa nirwo i bang’ Yehova kud adundewa ceke.

(1) Niyamu i lembe iwi kite pare. (2) Niparu pi lembe ma timo tek iwa, calu ve nitimo kisa ni ng’atini man niweco pi lembene i rwo mwa. (3) Nigalu i rwo. Lembuno copo konyowa niyero lembe mir adundewa i rwo.—w25.10, mba. 19-20.

Wacopo konyo ju m’utii nenedi?

Wacopo liewogi kunoke walwong’ogi ku simu. Wacopo konyogi nicidho kugi i odiyath. Kunoke wacopo pangu nirweyo kugi lembanyong’a i ayi ma tung’ tung’.—w25.11, mba. 6-7.

Jukristu ma gibegamiri gicikiri nitimo lembang’o ma pigi tek kara nyom migi ubed ma yungo Yehova?

Wuwor cik ceke ma gavmenti uketho. Wunen nia junyutho nying’ tipo pa Mungu i saa mi timo foc. Kud wukadh mupaka i lembe m’uneno kendi, man wukoc ku lemsuru m’urombo ngo ku cik mi Biblia. Wuwinjuru ma ber ku jumange i lembe ma wupangu.—w25.12, mba. 21-24.