THIWIWEC MI 42
WER 44 Rwo pa ng’atu ma ni peko
Rwo i bang’ Yehova kud adundeni ceke
“ Abelwong’i kud adundena ceke, E Yehova, dwok ira lembe.”—ZAB. 119:145.
I ADUNDO
Ninyamu i lembe iwi rwo ma jukiewo pigi i Biblia, copo konyowa nirwo kud adundewa ceke i bang’ Yehova.
1-2. (a) Ang’o ma copo cerowa nikoro kite ma wawinjara ko ni Yehova i rwo mwa? (b) Wang’eyo nenedi nia Yehova utie kud ava mi winjo rwo mwa?
NYO saa moko inwang’u nia kinde m’iberwo, ibed iyero kwa lembe ma rom, irwo nyamalu malu, man itiyo kwa ku kit rwo aceli? Tek eyo, ng’ey nia ini kendi ngo. Lembe m’upong’ i kwo mwa copo ketho rwo mwa bedo nyaradundo, kunoke ecopo bedo tek iwa niweco thwolo thwolo i bang’ Yehova, pilembe wanwang’u nia waromo ngo nicoro i vute.
2 Biblia uponjo nia gin ma pire tek i ii Yehova utie ngo rwo ma jupangu ku bodho, ento rwo mi jwigiri m’uai kud i adunde. Ewinjo “kwac mi ju ma mol.” (Zab. 10:17) Etie kud ava mi winjo wec mwa acel acel pilembe ebedieng’ lee piwa.—Zab. 139:1-3.
3. Wabidwoko wang’ penji ma kani i thiwiwec maeni?
3 Wacopo kepenjara kumae: Wacopo rwo nenedi i bang’ Yehova ma cwinywa teki? Wacopo timo ang’o kara rwo mwa uketh kindwa ubed ceng’ini ku Yehova? Nyamu i lembe iwi rwo ma jukiewo pigi i Biblia copo konyowa nenedi nirwo kud adundewa ceke? Wacopo timo ang’o tek koro kite ma wabewinjara ko i rwo ubejai iwa nikum ang’abacwinyi? Wakenweng’u dwokowang’ penji maenogi.
RWO I BANG’ YEHOVA MA CWINYI TEK
4. Ang’o ma copo konyowa nirwo ku tegocwinywa i bang’ Yehova? (Zaburi 119:145)
4 Ka wanyang’ nia Yehova tie jarimbwa m’ubedieng’ pi bero mwa, wabirwo i bang’e m’umbe macero. Jagor Zaburi mi 119 utimo tego nibedo ku kit winjiri ma kumeno ku Yehova. En de ebed enwang’ere ku peko i kwo pare: Dhanu ubed ucwayu vupo i wiye. (Zab. 119:23, 69, 78) Ebed enyego bende i kum kosa pare. (Zab. 119:5) Re kadok kumeno de, lworo ubed unege ngo nikoro lembe ceke mir adundene ni Yehova.—Som Zaburi 119:145.
5. Pirang’o ukwayu ngo wawek paru ma rac ucerwa nirwo i bang’ Yehova? Ke mii lapor moko.
5 Yehova ubekwayu kadok dhanu ma gitimo dubo ma pek de nia girwo i bang’e. (Isa. 55:6, 7) Pieno, wacikara ngo niweko paru ma rac ucerwa nirwo i bang’e. Ku lapor, dereva mir avio (pilot) ung’eyo nia tek etie ku yeny mi kony, ecopo weco ku juwodhe ma n’i ng’om m’ubeneno woth mir avio i kor polo. Nyo ecopo kwero niweco i bang’gi pilembe lewic ubenege nia erwinyo kunoke nia etimo lembe moko m’uwotho raci? M’umbe jiji ungo! Kumeno bende, tek wanwang’u nia warwinyo kunoke watimo dubo moko, wacopo rwo ma cwinywa tek i bang’ Yehova.—Zab. 119:25, 176.
GIN MA WACOPO TIMO KARA RWO UKETH KINDWA UBED CENG’INI KU YEHOVA
6-7. Ang’o ma copo konyowa niyero kite ma wabewinjara ko thwolo thwolo i rwo mwa? Ke mii lapor moko. (Nen bende korolembe mi there.)
6 Kindwa doko ceng’ini mandha ku Yehova ka wabekoro lembe mir adundewa thwolo thwolo ire nikadhu kud i rwo. Dong’ wacopo timo ang’o kara rwo mwa uai kud i adunde?
7 Nyam i lembe iwi kite pa Yehova.a Ka wabemedara ninyamu i lembe iwi kite pa Yehova, wec ma wayer ire thwolo thwolo de bimedere ameda kumeca. (Zab. 145:8, 9, 18) Wakewec iwi lapor pa nyamego Kristine ma won utie dhanu ma kwiny. Ekoro kumae: “Weco i bang’ Yehova ubino ngo ira lembe ma yot. Abed aparu nia ng’ico man kosa para biketho ebiwenja.” Kite pa Yehova ma kani m’ukonye? Edwoko kumae: “Mer ma lokere ngo pa Yehova re m’ukonya; eketho awinjara museme. Ang’eyo nia ebiweka ngo; kadok apodho, ebiting’a malu nikum mer pare. Lembuno konya nikoro pir anyong’a man can para ceke thwolo thwolo ire.”
8-9. Paru lembe i wang’ rwo copo konyi nenedi? Ke mii lapor moko.
8 Par pi lembe m’ibiyero. I wang’ nirwo, ukwayu ikeipenjiri ku penji moko. Ku lapor, icopo penjiri kumae: ‘Abekadhu kud i peko ma kani kawoni? Nyo ng’atu moko nuti m’ukwayu atim ire kisa? Nyo abenwang’ara kud amulaic moko ma nyen ma mito Yehova ukonya pire?’ (2 Ub. 19:15-19) Wacopo lubo bende lapor pa Yesu m’erwo ko pi nying’ Yehova, pi Ker pare, man pi yeny pare.—Mat. 6:9, 10.
9 Kinde ma nyamego moko ma nyinge Aliska uwinjo nia won ot pare utie ku kanser moko mir ung’ith ma dong’ unyang’, ewacu nia nirwo ubino ire lembe ma tek. Ekoro kumae: “Lembene usendo paru para, uketho niparu lembe cuu kara arwo de ubino ira tek.” Ang’o m’udok ukonye? Ewacu kumae: “Ating’o saa moko nyanok i wang’ nirwo pi nicoko dhu paru m’abeciyero. Lembuno ukonya kara rwo para kud ujengere kwa i wiya gira. Bodho maeno uketho abedo ma kuma ukwiyo man ayika pi nirwo.”
10. Pirang’o ukwayu watim kero wabed wagal i rwo? (Nen bende cal.)
10 Gal i rwo. Kadok rwo ma nyaradundo pire tie tek pi kare moko de, re nigalu i rwo ketho wakoro lembe m’i iwa i thucne.b Elijah ma won ot p’Aliska uwacu kumae: “Atimo tego arwo wang’ ma pol kubang’ nindo, man galu i rwo uketho kindwa udoko ceng’ini ku Yehova. Kum Yehova kaye ngo nia adar rwo para pio pio, pieno arwo pi saa ma lee.” Kepim nitimo lembe ma e: Nwang’ saa man kaka ma jucopo sendo ngo wii i iye kinde m’iberwo, man icopo rwo kadok ku dwendi ma tek.
Nwang’ kaka man saa m’icopo galu iye i rwo (Nen udukuwec mir 10)
NYAM I LEMBE IWI RWO MA JUKIEWO PIGI I BIBLIA
11. Ninyamu i lembe iwi rwo ma jukiewo pigi i Biblia copo konyowa nenedi? (Nen bende sanduku “Nyo in de iwinjiri calu gin?”)
11 Nyamu i lembe iwi rwo man wer ma jukiewo pigi i Biblia copo konyi. Kinde m’ibeponjo lembe iwi ayi ma jutic ma con pa Mungu gibed gikoro ko pidoic migi, in de lembene copo cweli nikoro lembe mir adundeni ceke ni Yehova. Icopo nwang’u kadok wec mi pak ma giyero, m’iromo tiyo ko bende i rwo peri. Iromo nwang’u kit rwo m’urombo tap ku lembe m’ibekadhu kud i iye.
12. Wacopo penjara ku penji ma kani kinde ma wabenyamu i lembe iwi rwo ma jukiewo pire i Biblia?
12 Etie ber nipenjiri ku penji ma e kinde m’ibenyamu i lembe iwi rwo ma jukiewo pire i Biblia: ‘Ng’a m’uyero lembuni? Eyere ke i saa ma kani? Nyo an de lembe para urombo ku ma juyero pire i rwo maeni? Acopo nwang’u ponji ma kani i iye?’ Icopo timo kadok sayusac pi nidwoko wang’ penji maenogi. Wakewec iwi lapor mi rwone moko.
13. Rwo pa Ana ubemiyo iwa ponji ma kani? (1 Samwel 1:10, 11) (Nen bende cal.)
13 Som 1 Samwel 1:10, 11. Ana uyero lembe maeno i rwo pare kinde m’ebino nwang’ere ku lembe ario ma dongo. Ebino jamugumba man nyeke de udwoko ire kwo tek. (1 Sam. 1:4-7) Icopo nwang’u ponji ma kani i rwo pa Ana kan ibenweng’iri ku peko m’umoko ndikindi i kumi? Ana unwang’u yom i rwo m’ebed egalu i iye man peko pare m’ebolo iwi Mungu. (1 Sam. 1:12, 18) Wan de wabinwang’u yom tek ‘waredho ter [mwa] iwi Yehova’ nikadhu kud i lembe ma tap ma wabekoro ire niai kud i adundewa.—Zab. 55:22.
Ana ubenyego ku peko mi mugumba man bende cac pa nyeke; eredho peko parenegi ceke i kor Yehova (Nen udukuwec mir 13)
14. (a) Lapor pa Ana ubemiyo iwa ponji mange ma kani? (b) Nyamu i lembe iwi giragora copo konyowa nenedi ninwang’u lembe dupa ma wayer i rwo mwa? (Nen korolembe mi there.)
14 Kinde ma Ana unyolo wode ma Samwel, i ng’ey oro ma nok ci etere i bang’ Eli ma Jalam ma dit. (1 Sam. 1:24-28) I rwo pare, enyutho nia ebino ku tegocwiny nia Yehova gwoko man edieng’ pi jutic pare ma gibetimo ire ku gwoko bedoleng’.c (1 Sam. 2:1, 8, 9) Copere peko m’ebino nwang’ere ko i ot pare nwang’u fodi uthum ungo, re eketho wiye i kum mugisa ma Yehova umiyo ire . Lembuno ubemiyo iwa ponji ma kani? Tek waketho wiwa iwi kite ma Yehova ubekonyo kowa nitundo kawoni, wabibedo ku copo mi nyego kud amulaic ma wabenwang’ara ko.
15. Rwo pa jabila Yeremia ubemiyo iwa ponji ma kani? (Yeremia 12:1)
15 Som Yeremia 12:1. Cwiny Yeremia ugam utur pi kare moko kinde m’eneno lembe ubewotho miero ni jutimrac. Can unyay bende i iye pir ayi ma Juisrael utime ko rac. (Yer. 20:7, 8) Wan de wacopo winjara ve en ka wabeneno lembe ubewotho miero ni dhanu m’atira ngo man kinde ma jubecayuwa. Kadok Yeremia unyutho kite m’ebewinjere ko de, re ebino mbe ku jiji iwi bedopwe pa Mungu. I ng’eye kinde m’eneno matira ma Yehova umiyo ni ju m’ujai, genogen pare iwi bedopwe pa Mungu umedere ameda. (Yer. 32:19) Wan bende wacopo koro can mir adundewa thwolo thwolo i rwo, ma cwinywa tek nia Yehova bikabu lembe ceke ma reco ma tin wabenwang’ara ko i saa m’eketho.
16. Rwo pa Jalawi ubemiyo iwa ponji ma kani? (Zaburi 42:1-4) (Nen bende cal.)
16 Som Zaburi 42:1-4. Jalawi moko m’ubino kwo i ng’eca, ma nitimo ni Yehova karacelo ku Juisrael mange ubino ire tek re m’uthungo wer maeni. Wer m’ethungo ubenyutho kite m’ebino winjere ko. Wan de wacopo winjara kumeno saa ma twoyo ugonjowa i pacu, kunoke jutwiyowa i kol pi yiyoyic mwa. Saa maeno wacopo winjara ma ber kunoke rac. Re kadok kumeno de, mito wakor kite ma wawinjara ko i rwo. Lembuno bikonyowa ning’iyo pidoic mwa man nibedo ku nen ma ber. Ku lapor, Jalawi eni unyang’ nia etie ku kaka mange ma nyen mi paku Yehova. (Zab. 42:5) Enyamu bende i lembe iwi kite ma Yehova ubino gwoke ko. (Zab. 42:8) Nirwo kud adundewa ceke konyowa ninyang’ i kite ma wawinjara ko, emiyo iwa kwiyocwiny man wanwang’u tego mi ciro peko mwa.
Jalawi m’ukiewo Zaburi mi 42 uredho lembe mir adundene ceke i kor Mungu. Kinde ma wabekoro kite ma wabewinjara ko ni Mungu i rwo, eno konyowa nibedo ku nen ma ber iwi peko mwa (Nen udukuwec mir 16)
17. (a) Rwo pa jabila Yona ubemiyo iwa ponji ma kani? (Yona 2:1, 2) (b) Wec moko ma juyero i Zaburi copo konyowa nenedi ninyego ku peko mwa? (Nen korolembe mi there.)
17 Som Yona 2:1, 2. Jabila Yona uyero wec maeni i rwo pare kinde m’ebino i cindi rec ma dit. Kadok nwang’u edubo ni Yehova de, re cwinye ubino tek nia Mungu biwinjo kwac pare. Kinde m’eberwo, eyero wec dupa ma nwang’ere i buku mi Zaburi.d Copere nia elar eng’eyo wecnegi cuu. Nyamu i lembe iwi wecne utego cwinye nia Yehova bikonye. Wan bende tek wamaku giragora moko ku wiwa, wabipoy pigi man gibijuko cwinywa kinde ma wabekwayu Yehova i saa mi peko.
MEDIRI NICORO CENG’INI I VUT YEHOVA NIKADHU KUD I RWO
18-19. Jurumi 8:26, 27 ubemiyo iwa tegocwiny ma kani ka nikoro kite ma wabewijara ko utie tek iwa i rwo? Ke mii lapor moko.
18 Som Jurumi 8:26, 27. Saa moko wacopo nwang’u nia cwinywa ung’abere lee ma nikoro kite ma wawinjara ko bedo iwa tek i rwo. Re kony unuti iwa. I saa ma kumeno, tipo ma leng’ pa Mungu “kwayu piwa”. Nenedi? Nikadhu kud i tipo pare, Yehova uketho jukiewo rwo dupa i Lembe pare. Kan etie tek nikoro thwolo thwolo pidoic mwa i rwo, Yehova copo jolo wec m’i rwo ma nwang’ere i Lembe pare ni kwac ma wamito kwaye ko man ecopo dwoko wang’e.
19 Lembuno ukonyo nyamego mi Russia ma nyinge Yelena. Jutwiyo Yelena pilembe ebino rwo man ebino somo Biblia. Ewacu nia cwinye udieng’ ma nirwo de ubino tek ire. Ekoro kumae: “Adok apoy nia tek lembe uvoyo tego para man ang’eyo ngo gin m’umito ayer i rwo, Yehova bijolo rwo mi jutic pare ma con . . . calu ve kwac m’amito kwaye ko. . . . Lembuni ukonya lee mandha kinde m’abino kadhu kud i peko.”
20. Ka cwinyi ubedieng’, ang’o ma copo konyi kara irwo ma cuu?
20 Kinde ma cwinywa ubedieng’, ecopo bedo iwa tek niketho wiwa i kum gin ma wabeyero i rwo mwa. Pi nikonyowa, wacopo winjo som mi buku mi Zaburi ma jumaku. Wacopo kiewo kite ma wabewinjara ko akiewa tap calu m’Ubimo Daudi de utimo. (Zab. 18, 34, 142; wec mi caku.) I andha, cik ma tap umbe iwi ayi m’ukwayu wayikara ko pi rwo. (Zab. 141:2) Pieno, tii ku bodho m’ineno nia tie ber akeca iri.
21. Pirang’o mito warwo kud adundewa ceke?
21 Anyong’a ubenegowa ning’eyo nia Yehova nyang’ i ayi ma wawinjara ko kadok wayero ngo ire lembe moko de. (Zab. 139:4) Kadok kumeno de, re anyong’a nege niwinjo wec ma wabeyero i rwo pi ninyutho nia wagene. Pieno, lworo kud unegi nirwo i bang’ Wuru mi polo. Nwang’ ponji i rwo ma jukiewo pigi i Lembe pare. Rwo i bang’e kud adundeni ceke. Kor ire anyong’a peri man can peri. Calu etie Jarimbi mandha, ebibedo ayika piri saa ceke!
WER 45 Nyamu i lembe mir adundena
a Nen nyathi thiwiwec “Kurayung pa Yehova moko ma wang’u ijo” i buku Lembagora pi Kwo mi Jukristu i the thiwiwec “Yehova.”
b Wang’ ma pol rwo ma jurwo i wang’ dhanu i cokiri bedo nyaradundo.
c Kinde ma Ana uberwo, etiyo ku wec m’urombo ku m’i giragora ma Musa ukiewo. M’umbe jiji, ebed enwang’u saa mi nyamu i lembe iwi Lembagora. (Poy. 4:35; 8:18; 32:4, 39; 1 Sam. 2:2, 6, 7) Rundi dupa i ng’eye, Maria min Yesu de utiyo ku wec mi pak m’urombo ku ma Ana uyero i rwo pare.—Luka 1:46-55.
d Ku lapor, nen lembe m’urombo i Yona 2:3-9 ku Zaburi 69:1; 16:10; 30:3; 142:2, 3; 143:4, 5; 18:6; man 3:8, (jurieyo giragora mi Zaburi eni nimakere kud ayi ma Yona udwogo ko i wigi).