Umego ku nyimego ma wutii, piwu tie tek i cokiri

Saa moko nyo in de idaru voc pilembe oro peri udaru lwar. Kadok nwang’u itimo ni Yehova ku bedopwe pi oro dupa de, copere nia hali peri ma kawoni uketho ibeparu nia gin m’iromo timo mbe. Ku lapor, icopo caku poro gin m’ibetimo kawoni ku m’ibed itimo con. Kan etie kumeno, iromo timo ang’o pi ninyego ku parune?

GIN MA YEHOVA UBEKWAYU I BENG’I

Penjiri kumae: ‘Yehova ubekwayu ang’o i bang’a?’ Ibinwang’u jukocwiny i wec ma nwang’ere i Poy mi Cik 6:5, m’uyero kumae: “Icikiri nimaru Yehova Mungu peri kud adundeni ceke, ku ng’eyong’ec peri ceke man ku tegoni ceke.”

Nimakere ku giragora eno, Yehova ubemito itim ire kud adundeni, ku ng’eyong’ec man ku tegoni ceke. Lembe maeno copo konyi kara kud iporiri ku jumange, kunoke niporo lembe m’itie ku copo mi timo kawoni ku m’ibed itimo con.

Kepar lembe ma e: Kinde m’ibino aradu, ibed itimo ni Yehova nenedi? Jutic pa Yehova ma pol gicopo yero nia gitimo ire ku copo migi ceke. In de itimo ire ku copo peri ceke nimakere ku hali m’ibino i iye saa maeca. Kawoni ke ibetimo ire nenedi? Copere nia ibetimo ire ku copo peri ceke nimakere ku hali m’ibekwo i iye tin, man nimakere ku gin m’itie ku copo mi timo kawoni. Tek ibeneno lembe i ayi maeno, icopo yero nia tin de ibetimo ni Yehova ku copo peri ceke, calu m’ibed itimo ko ire con.

ICOPO KONYO JUMANGE

Kakare niparu nia tiyo peri ubeceri ku timo lembe dupa, nene nia etie iri kaka ma ber mi konyo jumange. Kawoni ma dong’ oro peri ucidho, iromo timo lembe ma nwang’u ibino mbe ku copo mi timo kinde m’ibino aradu. Ku lapor, kepim nitimo lembe m’ulubo e:

Kor lembe m’ikadhu kud i iye ni jumange. Nyam i lembe ma e mi Biblia:

Ubimo Daudi: “Naka abino aradu man kawoni atii, ento aneno ngo won bedopwe moko ma juwenjo, kadi nyithindhe m’ubeyenyo cam.”—Zab. 37:25.

Yocuwa: “Kawoni wunen! abecitho, man wung’eyo cuu kud adundewu ceke man ku ng’eyong’ec mwu ceke nia kud i kind lembe ceke ma beco ma Yehova Mungu mwu ung’olo iwu, acel de mbe m’upong’o ngo. Gin ceke gipong’o iwu. Acel de mbe m’upong’o ngo.”—Yoc. 23:14.

Daudi giku Yocuwa gitimo ni Yehova pi oro dupa. Gineno man giwinjo lembe dupa i kwo migi. Pieno, giyero lembe ma ging’eyo man wec ma giyero ubino ku tego i iye. Calu ma in de kawoni ing’eyo lembe dupa, wec peri de copo bedo ku tego lee.

Tek icaku timo ni Yehova niai con, icopo weco pi bero m’inwang’u nikum timo ni Yehova ni jumange. Nyo ibepoy pi lembe moko ma segi ma Yehova utimo pi nikonyo dhanu pare? Tek eyo, icopo koro lembene ni jumange bende! Lembe ma kumeno copo konyo jumange lee, tap calu ma nyo in de ekonyi. Pieno, icopo miyo kony ma lee i thenge mi tipo kan ibekoro pi bero m’inwang’u i tic pa Yehova ni umego ku nyimego.—Rum. 1:11, 12.

Yo mange m’icopo tielo ko cwiny umego ku nyimego utie nicidho i coko i Ot Ker, tek ecopere iri. Kuca icopo wok konyogi man gin de gicopo konyi. Nyamego Connie ma waweco pire i acaki uwacu kumae: “Cidho i coko i Ot Ker konya kara cwinya kud utur. Cwinya bitur nenedi ku tho mer m’anwang’u kan acidho i coko i Ot Keri! Pi ninyutho foyofoc para ni jumange, atimo tego nimiyo giramiya moko ma thindho thindho. Bende, atimo tego nidikara i lembe mi tipo karacelo kud umego ku nyimego para.”

YEHOVA UBENENO TIC M’IBETIMO NI GIN MA PIRE TEK

Lembagora upong’ ku lapor mi dhanu ma gibino ku macero mi timo lembe dupa, ma re Yehova umarugi. Ku lapor, Simeon ubino Jaisrael ma dong’ utii saa ma junyolo Yesu. Kinde m’ebed ecidho i hekalu, copere nia ebed eneno aradu m’ubetimo tic ma pire tek kuca. En ke ebed enenere nenedi? I nen mi dhanu, ecopo paru nia tije dong’ nok i wang’ Yehova. Ento Yehova ubino nene ngo kumeno. I wang’ Yehova, ebino “ng’atu ma pwe man ma lworo Mungu” man emiyo ire rwom mi neno nyathi Yesu. Yehova uketho eewo bende lembila iwi Masiya! (Luka 2:25-35) M’umbe jiji, Yehova uketho ngo wiye i kum tiyo pa Simeon, ento enene ni ng’atu m’utie ku yiyoyic ma tek man ma “tipo ma leng’ ubino i wiye.”

Cwinyi bed tek nia Yehova neno tic m’ibetimo ire ku bedopwe ni gin ma pire tek kadok nwang’u lembe moko ubeceri de. Piny ceke ma ng’atini ubemiyo ire pire tie tek i wang’e, “asagane kan ebemiye nimakere ku gin m’etie ko, ento ungo nimakere ku gin m’embe ko.”—2 Kor. 8:12.

Pieno, keth wii i kum gin m’icopo timo. Ku lapor, kepar ayi ma tung’ tung’ mi rweyo lembanyong’a m’icopo dikiri i iye kadok pi saa ma nok kende. Icopo lwong’o umego ku nyimego i simu kunoke ioro igi kart pi nitielo cwinygi. Nyithi lembe ma kumeno copo bedo kud adwogi ma ber iwi juyic wadwa, asagane kan eai i bang’ dhanu ma gidaru timo ni Yehova pi oro m’ulwar.

Jumoko hali migi uketho gicopo timo ngo lembe lee. Kenen lembe ma nyamego moko mir Afrika ma yo nyangu ukadhu kud i iye. Lembene nwang’ere i sanduku ma thiwiye tie “Biblia ubodho kwo pare.”

Poy nia calu m’icaku timo ni Yehova niai con man ibemediri asu nitimo ire ku bedopwe, eno copo tielo cwiny jumange lee mandha. Itie lapor mi cirocir m’ubenen kamaleng’, man cwinyi bed tek nia ‘Mungu en e won gondiri ngo ma nia wiye wil i kum tic peri man mer m’inyutho pi nyinge, kum itimo ni jumaleng’ man ibemediri asu nitimo igi.’—Ebr. 6:10.

MEDIRI ASU NITIMO LEMBE M’ICOPO

Sayusac ma dupa unyutho nia ju m’utii ma gikonyo jumange gibedo ku yotkum ma ber, giparu lembe cuu man nindo mi kwo migi de coro.

Ku lemandha re, timo lembe ma ber copo cero ngo peko mi tiyo nisendo ng’atini. Ker pa Mungu kende re ma bidaru ulag tiyo man tho, niwacu dubo ma walagu.—Rum. 5:12.

Ento tic m’ibetimo ni Yehova m’uketho i iye nikonyo jumange kara ging’eye, copo dwoko genogen peri tek man ecopo ketho ibedo ku yotkum ma ber. Wu ju ma wutii wung’ey nia Yehova neno tic ma wubetimo ire ni gin ma pire tek, man cokiri de neno yiyoyic mwu ku tuko ngo!