Aneno yiyoyic mi dhanu pa Yehova

Ang’iero, pilembe ang’eyo ngo nia jarimba utie jaradini. Apenje nia “ing’eyo lembe moko iwi Biblia?” Edwoka ngo ndhundhu. I ng’eye edok ewacu nia min re m’ubino Jamulembe pa Yehova man minne uponje ku lembe moko mi Biblia. E akwaye nia ekekor ira lembe moko iwi Biblia.

Waweco nitundo diewor. Jarimba uwacu ira nia, nimakere ku Biblia Sitani re m’utie jabim mi ng’om. (Yoh. 14:30) Saa moko nyo ing’eyo lembuno niai con ma fodi i nyanok, ento ira ebino lembe ma nyen man ma telo nen. Abed awinjo nia Mungu ma cwinye leng’ re m’ubebimo wi ng’om. Ento lembene urombo ngo ku gin m’abino neno ubetimere. Kadok abino ku oro 26 kende de, re abed aneno lembe dupa m’ubed usendo wiya.

Baba ubino ng’atu ma ringo kud aviyo mi lwiny i ng’om mir États-Unis. Lembuno uketho kinde ma fodi a nyathin, agam ang’eyo nia lwiny mi bomb ma dongo copo tuk, kum udul askari gibino ayika nibolo bombne saa moko ci. Lwiny m’utuk i Vietnam, utuk tap i oro m’abino somo i California. Acaku dikara i jai mir awiya mi somo. Polici giriemowa, waringo, man yiro ma camu wang’ dhanu ma gikilo uketho wathung’ man wang’wa de bino neno piny cuu ngo. Ebino saa mi yakini man mi jai. Jubino nego jutela mi lemgamba, dhanu caku jai, man jumoko uwok i ngudu pi ninyotho piny. Dhanu ubino ku paru m’ukoc iwi lembe ma jucikiri nitimo man gin ceke wigi nyothere.

I oro 1970, acaku timo tic i dhu wat ma yo malu mir Alaska man anwang’u sente bik. I ng’eye, aringo i Londres, awok ang’iewo moto, man aringo i theng ng’omne ma yo piny m’ang’eyo ngo kaka m’acidho i iye. Dwi moko i ng’eye, atundo i Afrika. Awok arombo i yo ku dhanu mange ma de giberingo lembe mi kumgi.

Lembe m’aneno man m’awinjo uketho anyang’ nia gin ma Biblia uponjo nia giracwiya mi tipo ma rac re m’ubetelo wi ng’om, utie lemandha. Kadong’ Mungu ke ubino timo ang’o i kind lembuno ceke? Amito ang’ey.

I dwine m’ulubo, anwang’u dwoko wang’ penjine. Kubang’ nindo m’ubekadhu, atundo ning’eyo man nimaru jumaco ku jumamon ma gigwoko bedoleng’ migi ni Mungu mandha acel kadok gibenwang’iri ku lembe ma tung’ tung’ de.

“JUBED JUBOLO BOMB MAN JUBED JUKILO ATUM” YO MALU MI IRLANDE

Kinde m’adok i Londres, awok acidho i bang’ jarimb mama man ewok emiyo ira Biblia acel. I ng’eye saa m’acidho i Amsterdam, i ng’om mi Pays-Bas, Jamulembe moko uneno abesomo Bibliane ku lero mi mac mi wang’ ndaki man ekonya ninyang’ lee i iye. Tokcenne, acidho i Dublin, i ng’om mi Irlande man awok anwang’u biro mi bethel mi Jumulembe pa Yehova. Agam adwong’o dhogola man kuca re m’awok anwang’u Arthur Matthews, ma tie umego ma riek man m’ung’eyo lembe lee. Akwayu nia juponj kuda Biblia, man egam eyiyo niponjo kuda.

Acaku ponjo Biblia kud amora ma lee man abed asomo kud ava buku ku girasoma mange ma Jumulembe pa Yehova gibed giwodho. Asomo kadok Biblia buu, enyang’a lee mandha. Kinde m’acidho i coko, awok aneno awiya ma thindho de ging’eyo dwokowang’ penji ma pi oro ma dupa udaru voyo dhanu ma giponjiri lee, calu ve: ‘Pirang’o lembe ma rac ubetimere? Mungu utie ng’a? Lembang’o ma timere ka jutho?’ Jurimba ceke gibino Jumulembe pa Yehova. Lembene ubino ira yot pilembe nwang’u fodi ang’eyo ngo ng’atu mange acel de i ng’ombe. Gikonya nimaru Yehova man nitimo yeny pare.

Alimo batizo i oro 1972. Oro acel i ng’eye, acaku tic pa jayab yo, man adikara ku cokiri moko ma nok i adhura mi Newry, yo malu mi Irlande. Apangu otkidi moko ma jugiero m’ubedo kende i kor got. Dhieng’ ubedo nuti i luba ceng’ini kuda, man abed arudo wang’ korolembe para i wang’gi. Kinde ma ginyamu wei, edog ebedo ira ve gibewinja kilili mandha. Giromo miyo ngo ira juk, re gikonya uketho aneno ve abeweco i wang’ dhanu. I oro 1974, adoko jayab yo ma segi man watimo tic karacelo waku Nigel Pitt, m’udoko jarimba pi oro ma lee.

Saa maeno, yakini unyai lee mandha yo malu mi ng’om mi Irlande, uketho jumoko ubed ulwong’o ng’ombe nia “ng’om mi bomb ku mir atum.” Wang’ ma pol lwiny ubed utuk, jubed jukilo dhanu, man muthukari ubed umoc ku bomb. Lembene ubed uai asagane i bang’ judong gamba ku jurudini. Ento dini mi Protesta ku mi Katholiki ging’eyo nia Jumulembe pa Yehova gidikiri ngo i lemgamba, uketho wabed warweyo ni dhanu ku bed’agonya man m’umbe ariti. Dhanu ubed ung’eyo nia yakini bibedo awene man kakani, uketho gibed gipoyowa kara kud wamond i peko.

Re asu, lembe mir ariti ubedo nuti. Nindo moko waku Denis Carrigan, ma de utie jayab yo wabino rweyo i adhura moko ma ceng’ini, ka ma Jumulembe pa Yehova mbe i iye, ma i wang’e watundo wang’ acel kende. Dhaku moko udotowa nia watie juaskari mir ung’wi yamu mi Grande-Bretagne, saa moko nyo pilembe wabeweco dhu Irlande cuu ngo. Adotene upiko lworo i iwa; kum ning’iyo ang’iya kende ku juaskari ci copo ketho jukili junegi kunoke juturo congi. Kinde ma wacungo woko, i koyo man kendwa ma wabekuro basi, waneno nyathi muthukari moko ubebino yor i wang’ kaka ma jumadhu iye kawa tap kaka ma dhakune udotowa i iye. Ecidho i bang’ muthukari man eweco i bang’ jumaco ario m’ecimo ko bang’wa kud anyong’a. Jumacone giring’ini ku muthukari nya yoo yoo i bang’wa man gipenjowa ku penji moko iwi saa ma basi beai i iye. Kinde ma basi utundo, giweco ku dereva mi iye. Wawinjo ngo lembe ma gibino yero. Dhanu mange ubino mbe i basine, uketho wanyang’ nia gipangu nicitimowa rac woko mir adhurane. Ento lembene utimere ngo kumeca. Saa m’abelor kud i basi, apenjo dereva kumae: “Jumaco m’udong’ i ng’eiwa ca, gibino penjo piwa?” Edwoko kumae: “Ang’eyowu nia wu jukani, man ayero igi. Lworo kud unegwu, wubed yoo.”

I oro 1976, warombo ku Pauline Lomax ma tie jayab yo ma segi m’uai kud i Angleterre i coko ma dit mir adhura, ma con ung’eyere ku nyinge ma Assemblée de district m’utimere i Dublin. Ebino nyamego mi tipo, ma jwigere man ma jamer. En kud umin ma Ray, gidongo i lemandha. Oro acel i ng’eye, wagamara waku Pauline man wamedara ku tic pa jayab yo i Ballymena, yo malu mi Irlande.

Watimo tic mi twodiri pi saa moko, wakonyo umego mwa i Belfast, i Londonderry, man i kabedo mange ma lembe tek i igi. Yiyoyic mir umego ku nyimego ma giweko yic mi dini ma gilar gibino i iye, giweko poko lembe iwi dhanu man adegi pi nidog timo ni Yehova, utielo cwinywa lee mandha. Yehova umiyo igi mugisa man egwokogi!

Akwo i Irlande pi oro apar. I ng’eye, i oro 1981 julwong’owa i somo mi Gilead, kalasine mi 72. I ng’ey ma wanwang’u diplom mwa, juorowa i Sierra Leone, yo reto mir Afrika.

YIYOYIC MIR UMEGO I SIERRA LEONE KADOK KUD I CAN

Wabed wakwo i ot mi misioner ku dhanu 11 ma beco. Wabed watiyo ku mafika acel, wese adek, sagati ario, thelefon acel, masini mi lwoko bongu acel, man mi twoyo bongu de acel. Mac mi kura ubed ucidho saa ceke. Uyo ubed umondo iwa i wang’ ot man thwol ke i ng’om i ot.

Kadok kite ma wabed wakwo ko ubino cuu ngo de, re tic mi lembanyong’a umiyo iwa mutoro ma lee. Dhanu gibed giworo Biblia man gibed giwinjo lembe kilili mandha. Ju ma dupa giyiyo ponji mi Biblia man gidoko Jumulembe. Dhanu mi ng’ombuca gibed gilwong’a nia “jadit Robert.” Pauline ke nia “mego Robert.” I ng’ey kare, kinde ma timo tic i biro mi bethel umaku ira saa ma lee man acaku wok nok i tic mi rweyo lembanyong’a, dhanu caku lwong’o Pauline nia “mego Pauline,” an ke “jadit Pauline.” Lembene unyang’u Pauline lee mandha!

Umego ma dupa gibino jucan, re saa ceke Yehova ubed upong’o yeny migi, saa moko i ayi mi zungo. (Mat. 6:33) Abepoy i kum nyamego moko m’ubino ku sente ma nok pi ning’iewo cam ma copo konye kud awiya pare pi ceng’ nica, ento eting’o sentene zoo emiyo ni umego moko m’ubino remo malaria ung’iew ko yath. De ceng’ nica i ng’eye, dhaku moko ucoro mbwang’ ku sente i bang’ nyamegone nia ekied wiye. Lembe ma kumeno utimere dit.

WANG’IYO KU SURU MA NYEN I NIGERIA

Watimo oro abung’wen i Sierra Leone. I ng’eye, judwokowa i Bethel mi Nigeria. Etie filial ma dit. Abino timo kit tic ma rom m’abed atimo i Sierra Leone, ento ni Pauline re ebino alokaloka ma dit man ma pek. Ebed etimo saa 130 kubang’ dwi i tic mi lembanyong’a, man ebino ku ponji mi Biblia m’utie ku mediri. Juwok juore i ot mi kwoco kaka m’eriyo duu i iye pi nikwoyo wang’ bongu m’uyec. Kara eng’ii, lembene uting’o kare moko; ento etuc ninyang’ nia jumange gitiye ku foyofoc lee pi tic m’ebetimo man ebed eketho wiye pi nitielo cwiny juwagi mange mi bethel.

Suru mi Nigeria ubino nyen iwa, man wabino ku lembe dupa m’ukwayu waponji. Nindo moko, umego acel ubino i biro para pi ninyutho ira nyamego moko ma julwong’o i Bethel. Kinde m’abetero cinga nia amothe, apoy m’erum i the tienda. Iya wang’ lii! E wang’ acel giragora ario ma e utundo i wiya: Tic mi Jukwenda 10:25, 26 man Lembanyutha 19:10. Apenjara nia, ‘nyo acopo yero ngo ire nia kud etim lembuni?’ Re adog anyang’ nia julwong’e ebino i Bethel; eng’eyo gin ma Biblia ubeponjo.

Awinjara ngo cuu kinde ma wabemedara ku wec. I ng’eye atimo sayusac. Anwang’u nia etimo lembe maeno pilembe nwang’u fodi jutimo lembuno i suru moko. Kadok jumaco de girum i surune. Etie ayi mi nyutho woro, ento ungo ayi mi timo thier kum lapor mi lembene utie bende i Biblia. (1 Sam. 24:8) Abino kud anyong’a pilembe ayero ngo gin m’uketho nyamira ubedo ku lewic.

Warombo ku dhanu dupa mi Nigeria ma ginyutho yiyoyic ma wang’u ijo pi oro ma dupa. Wakewec pi Isaiah Adagbona.a Eng’eyo lemandha nwang’u fodi en aradu, re i ng’eye junwang’u nia etie ku twoyo mi dhobu. E juore i kaka ma weg dhobu bedo i iye, kuca ewok enwang’u nia eni kende re m’etie Jamulembe. Kadok jai ubedo nuti de, ekonyo weg dhobu ma kadhu 30, man gicaku the cokiri i kabedone.

UMEGO MI KENYA GINYUTHO IRA CIROCIR

I oro 1996, juorowa i bethel mi Kenya. Eni tie wang’ ma kwong’a ma wadok i ng’om m’agam aliewo m’alar aweco pire i acaki. Wabed wakwo i Bethel. Kaka ma jujolowa i iye ma watundo, ang’iero de ubino lee dit. Tek nyimego giyeyo ying yen, giyudhe kud i wigi. Nindo acel, nyamego moko man’i bethel uweko madirisa pare udong’ twolo. Kinde m’edwogo, enwang’u ang’iero umondo bik i ot ubecamu cam ma ginwang’u i ot. Ekok man ewok. E ang’iero de upoy man gipiey thuda ku wang’ madirisa.

Waku Pauline wadok i cokiri mi Swahili. I ng’eye nyanok, juketho acaku telo wi ponji mi kitabu mi cokiri (ma kawoni julwong’o nia Ponji mi Biblia mi cokiri). Kadok kumeno de, abed aweco ngo dhokne cuu. Alar abed ayiko ponjine i wang’e, pieno ebino ira yot nibesomo penji. Ento ka juwinj udwoko lembe m’ukoc kadok nyanok ku ma jukiewo, abed anyang’ ungo. Ebino lembe ma tek! Can ubed unega i kum umego ku nyimego. Ebino ira lembe mi zungo nia ku molo man cirocir giyiyo abed atel wi coko.

YIYOYIC MIR UMEGO MIR ÉTATS-UNIS KADOK KUD I LONYO

I Kenya watimo oro acel de ngo ci, i oro 1997 julwong’owa i Bethel mi Brooklyn, New York. Eni lundo wawok i ng’om ma dhanu utie ku piny mi kum dupa i iye, ma lembene utie ku peko pare bende. (Rie. 30:8, 9) Ento kadok i ng’om ma kumeno de, umego ku nyimego mwa gibenyutho yiyoyic ma lee. Umego mwa gitiyo ku saa man jamcing’gi ungo pi niyenyo lonyo igi gigi, ento pi nitielo tic ma ber m’ubetimere i dilo pa Yehova.

Pi oro ma dupa, waneno yiyoyic ma Jumulembe wadwa ginyutho nikadhu kud i lembe ma tung’ tung’. I Irlande, waneno umego mwa ginyutho yiyoyic kadok kud i kind yakini. I Afrika ke, ginyutho yiyoyic kadok kud i can man nikwo kaka ma Jumulembe mbe i iye. I États-Unis lundo, ginyutho yiyoyic kadok kud i lonyo. Andha Yehova utie kud anyong’a nibolo wang’e i ng’om man nineno dhanu ma gibenyutho mer migi ire nikadhu kud i kit lembe ceke.

Oro ukadhu pio “ma sagu jamcwic pa jacwibongu.” (Yob 7:6) Kawoni dong’ wabetimo tic ku dhanu mange mi kabedo mwa ma dit i Warwick, New York, man anyong’a negowa nimedara nitimo tic ku dhanu ma gimariri andha i kindgi. Watiye kud anyong’a man cwinywa ukwiyo nitimo gin ma wacopo pi nitielo Ubimo mwa Kristu Yesu, ma ceng’ini eni bimiyo mugisa ni weg bedopwe ma wendgi kwanere ngo.​—Mat. 25:34.