Nyo Ing’eyo?
Briki ma junwang’u i uvuru mir adhura mi Babeli ma con kud ayi ma jubed juyiko kogi, ubecwaku kpawa mi Biblia nenedi?
I UVURU mir adhura mi Babeli ma con, dhanu ma sayu dong’ piny ma con m’udong’ ginwang’u briki dupa ma juwang’u ma jubed jutiyo ko pi nigiero adhura. Nimakere ku Robert Koldewey ma sayu dong’ piny ma con m’udong’, jubed juwang’u briki ma kumeno i uka ma ni “woko mir adhura, kaka ma junwang’u ulobo lee i iye man piny lee . . . ma juwang’e ko.”
Kpawa ma con ubenyutho nia judongo pa gavmenti mi Babeli gibed gitiyo bende kud uka migi pi nitimo lembe ma reco. Paul-Alain Beaulieu ma tie profeser mi kpawa mir Asiria i iniversite mi Toronto, uyero kumae: “Gor dupa mi Babeli . . . ukoro pi dhanu ma juwang’u nikum ng’ol p’ubimo pilembe gijai i kum ubimo man gicayu mungu m’araga mi Babeli.” Ku lapor, i gor moko mi rundi p’ubimo Nebukadnezar jukiewo kumae: “Nyothgi, wang’gi, vulgi, . . . i furu . . . keth yiro migi uduny, bolgi i mac kara githo cen.”
Lembe maeno poyo wi jusom Biblia i kum kpawa ma nwang’ere i Daniel thek 3. Nimakere ku kpawa maeno, ubimo Nebukadnezar uketho ayi gin m’acwiya moko ma dit mi mola ma kwar ucungo i pambu mi Dura, woko mir adhura mi Babeli. Kinde ma jumaco adek ma Juebrania ma nying’gi Cadrak, Mecak, man Abed-nego gikwero nirum i wang’ ayi gin m’acwiyane, kwinyo uopo i Nebukadnezar, e eng’olo nia juyik majuka “wang’ abiro ma sagu kurane,” man eketho ‘jubolo jumaco maeno i majuka m’ubogrene.’ Malaika moko ma tek ulund ubodhogi kud i dhu tho.—Dan. 3:1-6, 19-28.
© The Trustees of the British Museum. Licensed under CC BY-NC-SA 4.0. Source
Briki moko m’awang’a ma jugoro nying’ Nebukadnezar i wiye
Briki ma junwang’u i Babeli de ucwaku kpawa mi Biblia. I kum brikine ma dupa jukiewo wec pi nimiyo yung ni ubimo. Wecne moko uyero kumae: “Nebukadnezar, Ubimo mi Babeli . . . Kal, ma tie kabedo m’agiero pi dwong’ para . . . Wek nyikwaya ubim i iye pi nja.” Gor maeno urombo lee mandha ku wec ma nwang’ere i Daniel 4:30, ma Nebukadnezar uyero i iye ku ting’iri kumae: “Maeni Babeli ma dit ungo, m’agomo pi kabedo mi ker, ku tego mi tek para man ni yung mi dwong’ para?”