Ka jadhogi mi gamiri ucuku neno pornografi

• “Awinjara ve won ot para utimo abor wang’ dupa dupa.”

• “Anwang’ara ku lewic, aneno ve a leng’ ungo i wang’ won ot para, man ve tija mbe.”

• “Ebedo ira tek niweco iwi lembene ku ng’atu moko ci. Re asendara ndhu nyaling’ ling’.”

• “Awinjara ve Yehova ubedieng’ ungo kuda.”

Wec ma malu eno ubenyutho kite ma min ot sendere ko ka won ot pare neno pornografi. Tek enene i amung’ pi nindo m’ulwar, niwacu pi dwi kunoke pi oro ma dupa, min ot romo nwang’u nia dong’ ecopo geno ngo won ot parene kendo. Min ot moko uyero kumae: “Apenjara kumae: ‘Won ot para e utie kit dhanu ma nenedi? Nyo lembe mange de nuti m’ebepanu wang’e ira?’”

Juwodho thiwiwec maeni pi min ot ma won ot pare beneno pornografi.a Thiwiwecne biweco iwi cik mir ukungu mi Biblia ma bijuko cwinye, ma bitielo cwinye nia Yehova umare, man ma bikonye nidok nwang’u kwiyocwiny pare kendo kara emedere nibedo ceng’ini ku Yehova.b

ICOPO TIMO ANG’O TEK JADHOGI MI GAMIRI BENENO PORNOGRAFI?

Kadok nwang’u imbe ku copo iwi lembe ceke ma won ot peri betimo de, re icopo timo lembe moko pi nijwigo lak can m’i cwinyi kara imediri nibedo ku kwiyocwiny mir adunde. Lembe m’ulubo e romo konyi.

Kud ilok kosa i wii. Min ot romo paru nia won ot pare ubeneno pornografi pi kosa pare. Daniellec uyero kumae: “Aparu nia atie dhaku ma rac m’abenyotho gamiri mwa anyotha nikum ng’eicwiny m’umaka.” Alice ke uparu nia copere nia e leng’ ungo i wang’ won ot pare; uketho epenjere kumae: ‘Pirang’o won ot para ubemito enen mon mange kakare nineno ani?’

Tek in de ibewinjiri kumeno, ng’ey nia Yehova ubeloko ngo kosa mi timo pa won ot peri i wii. Yakobo 1:14 uyero kumae: “Ng’atuman nwang’ere kud amulaic nwang’u ebeweko awanya pare ma rac utele [en] man ubidhe.” (Rum. 14:12; Filip. 2:12) Kakare niloko kosa i wii, Yehova ubeneno gwoko bedoleng’ peri ire ni gin ma pire tek lee.​—2 Kei. 16:9.

Etie bende ber ninyang’ nia ka won ot ubeneno pornografi, eno nyutho ngo nia min ot pare umaku ngo wang’e. Jururieko moko ma gitimo sayusac iwi pornografi giwacu nia pornografi ketho ng’atini bedo kud ava mi ribiri ma dhaku moko mbe ma copo daru avane.

Kudi cwinyi ng’abere akeca. Catherine uyero nia pornografi ma won ot pare umondo i iye ubed udieng’o cwinye saa zoo. Frances ke uwacu kumae: “Kan ang’eyo ngo kaka ma won ot para n’i iye ci, cwinya caku dieng’ wang’ acel. Cwinya ng’abere duu.” Mon moko lundo giyero nia giwinjiri rac magwei ka gin’i ng’et umego kunoke nyamego moko m’ung’eyo nia weg udi migi beneno pornografi. Jumange ke ginwang’iri liyo kendgi pilembe giparu nia ng’atu moko de mbe m’ubenyang’ ku peko migi.

Etie rac ungo niwinjiri kumeno. Re kan iketho wii hai i kum kite m’ibewinjiri kone, peko peri bimedere ameda. Ukwayu i ii niketho wii i kum winjiri peri ku Yehova. Nitimo kumeno bimiyo iri tego mi ciro lembe.​—Zab. 62:2; Efe. 6:10.

Pi ninwang’u kony, iromo somo kpawa mi Biblia m’uweco pi jumamon ma cwinygi ng’abere, ma re i ng’eye girwo i bang’ Yehova uketho ginwang’u kwiyocwiny. Saa moko Yehova ubed ukabu ngo peko migi, ento ebed emiyo igi kwiyocwiny. Ku lapor, Hana ugam uwinjere ku “can ma kec” nikum peko m’ebino i iye. Re i ng’ey ‘m’erwo i bang’ Yehova’ pi saa ma lee, enwang’u kwiyocwiny, kadok nwang’u fodi eng’eyo ngo ayi ma peko pare bithum ko de.​—1 Sam. 1:10, 12, 18; 2 Kor. 1:3, 4.

Kway bende kony i bang’ judong cokiri. Gicopo bedo iri ni ‘kapondo ni yamu, man kapondo ni wavuvu.’ (Isa. 32:2) Giromo nwang’u kadok nyamego moko m’icopo bekoro peko peri ire kara inwang’ jukocwiny.​—Rie. 17:17.

NYO ICOPO KONYO WON OT PERI?

Nyo ecopere iri nikonyo won ot peri kara ewek nineno pornografi? Eyo, ecopere. Biblia unyutho nia “juario sagu ng’atu acel” pi nidaru peko moko kunoke pi nivoyo jakwor moko ma tego pare lee. (Ekl. 4:9-12) Jururieko de ginwang’u nia wang’ ma pol ka ju m’ugamiri gibeii karacelo, givoyo ng’iyo ma rac mi neno pornografi man ng’atuman romo geno wagi kendo.

I andha, kara wutuc nivoyo anyego maeno, ukwayu jadhogi mi gamiri ma neno pornografine re m’ubed kud ava mi timo kero pi niweko kura maeno. Nyo edaru kwayu tego i bang’ Yehova man kony i bang’ judong cokiri de? (2 Kor. 4:7; Yak. 5:14, 15) Nyo edaru nwang’u rieko mi cerere i kum abidhe, calu ve nijwigo tiyo ku jamtic mir elektronik man niuro lembe ma romo kethe i ariti ma lee? (Rie. 27:12) Nyo etie ayika niyiyo kony peri man niyero iri lemandha saa ceke? Tek eyo, nyutho nia ecopere iri nikonye.

Dong’ icopo konye ke nenedi? Wakewec iwi lapor moko. Felicia ugamere kud Ethan m’ucaku neno pornografi niai m’e nyanok. Felicia uii niketho won ot pare ubed uwec i bang’e yot yot kinde m’ava mi neno pornografi umake. Ethan ukoro kumae: “Abed ayero lembe ceke ni min ot para. Ku mer, ebed ekonya niuro abidhe man saa zoo ebed ekiyo nia lembe ubewotho nenedi. Ekonya kara kud akadh mupaka kinde m’abetiyo kud Internet.” I andha, ng’iyo pa Ethan mi neno pornografi ubed utimo Felicia rac magwei. Re eyero kumae: “Anyang’ nia ng’eicwiny man can ma n’i iya romo konye ngo niweko ng’iyo pare ma rac. Ento i ng’ey ma waweco iwi peko pare, an de abedo kud ava mi koro ire kite ma timo parene ubenyayu ko can i iya, e ekeco nia ebineno ngo pornografi kendo.”

Wec ma kumeno copo konyo won ot kende ngo niweko kura pare ma rac, ento ekonyo bende min ot nidok geno won ot pare kendo. I andha, ka won ot bekoro ng’ico pare, kan enyutho gin m’ebetimo man kaka m’ebecidho i iye ni min ot pare, ebedo bende yot ni min ot nigene.

Nyo in de iparu nia icopo konyo won ot peri kumeno? Tek eyo, nyo wuromo somo ngo thiwiwec maeni karacelo man wuweco i wiye? Kinde ma wubeweco, mito lembakeca pare ubed niweko neno pornografi man niketho igene kendo. Kakare ma nia ng’eicwiny umake pilembe ya imito iwec kude iwi lembe pare, ukwayu eii ninyang’ i kite ma lembene uketho ibewinjiri ko. In lundo lembakeca peri ubed nimaku cinge kara evoy peko pare man nimiyo ire kaka m’igene ko kendo. Pieno bikwayu wun ario zoo wung’ey gin ma miyo ava mi neno pornografi i kum ng’atini man kite ma juromo voyo ko avane.d

Tek ibelworo nia ng’eicwiny bimeki kinde ma wubeweco, kway jadit cokiri moko ma wuneno nia wucopo weco ma kumwu ukwiyo i vute ubed i kindwu i saa mi wecne pi kare moko. Ukwayu ing’ey nia kadok i ng’ey ma jadhogi mi gamiri uweko neno pornografi de, romo kwayu nindo ma lee ukeukadhi pi nidok gene kendo. Re cwinyi kud utur; bed isay kadok lembe ma thindho thindho m’ubenyutho nia kindwu ubeyikere. Bed ku genogen nia nikum nindo m’uwotho kadhu, mer mi gamiri mwu bidoko tek kendo kakare.​—Ekl. 7:8; 1 Kor. 13:4.

KAN EBEMEDERE ASU KE?

Tek won ot peri udog ucaku neno pornografi kendo, nyo eno nyutho nia etie ng’atu ma loko ngo cwinye kunoke ma genogen umbe i wiye? Tie ngo kwa kumeno. Won ot peri romo nyego ku pekone pi dong’ kwo pare zoo, asagane kan elar emondo lee i timone. Ecopo podho i iye kendo kadok i ng’ey m’eweke pi oro ma dupa de. Kara kud epodh i uwicne kendo, bikwayu etim tego ma lee dit, m’emedere ko asu nicerere i kum abidhe kadok nwang’u eparu nia eweko timone de. (Rie. 28:14; Mat. 5:29; 1 Kor. 10:12) Bende, bikwayu emedere niketho “paru man timo [pare] udok nyen” man eponj “nidagu gin ma rac,” niwacu pornografi ku timo moko ci m’ucido, calu ve ninyobo watkume mi ribiri pi nidaru ava. (Efe. 4:23; Zab. 97:10; Rum. 12:9) Nyo etie ayika nitimo kero maenogi ceke? Tek eyo, nyutho nia ebiweko timone andha.e

Dong’ tek jadhogi mi gamiri ubetimo ngo tego pi nivoyo ng’ico pare ke? Ma jiji mbe, lembene copo turo cwinyi, eromo nyayu ng’eicwiny i ii, man eketho inweng’iri nia tiji mbe. Ukwayu iwek lembene i cing’ Yehova, e ibinwang’u kwiyocwiny mir adunde. (1 Pet. 5:7) Mediri nicoro ceng’ini ku Yehova nikadhu kud i ponjo piny, rwo man nyamu i lembe. Kan ibetimo kumeno, cwinyi bed tek nia en de ebicoro ceng’ini kudi. Calu ma Zaburi 34:18 unyutho, eni “ceng’ni [ku] ju ma adundegi tur,” man ebemito ekonygi ginwang’ anyong’a migi kendo. Tim tego imediri nigwoko bedoleng’ peri ni Yehova. Say kony i bang’ judong cokiri. Man mediri nibedo ku genogen nia i ng’ey nindo moko, won ot peri bibedo kud ava mi timo alokaloka.​—Rum. 2:4; 2 Pet. 3:9.