Nyo ibepoy?

Nyo isomo cuu thiwiwec ma tung’ tung’ m’ubed uwok i Otkur ma Wiw mi oro maeni? Ka eyo, kenen nyo icopo dwoko wang’ penji m’ulubo e:

‘Niloko ayi ma waparu ko lembe’ uketho i iye ang’o? (Rum. 12:2)

Etie ngo kende kende niruko kwo mwa ku lembe moko ma beco. Ento ukwayu wang’iyara yor i iwa man watim alokaloka moko ci m’ukwayere, kara waketh kwo mwa uromb i kadhiri ma copere ku cik mir ukungu pa Mungu.—w23.01, mba. 8-9.

Wacopo nyutho nenedi nia wabedo ku wang’wa kinde ma wabeneno lembe m’ubetimere i ng’omi?

Wamaru ning’eyo kite ma lembe m’ubekadhu ubepong’o ko lembila. Re kakare nicaku dolo dhu lembe i ayi ma wabeparu, ukwayu waketh wec mwa ujengere iwi jamtic ma dilo pa Yehova ubewodho; kan ungo, wabipoko i cokiri. (1 Kor. 1:10)—w23.02, mba. 16.

Batizo pa Yesu ukoc nenedi ku mi julub pare?

Yesu ubino mbe ku yeny mi thierere ni Mungu calu wan, pilembe enyolere i thek m’udaru thierere ni Mungu. Ebino ng’atu ma leng’ m’umbe ku dubo. Pieno ebino mbe ku yeny mi yewo dubo pare.—w23.03, mba. 5.

Wacopo konyo jumange nenedi nidwoko wang’ penji i coko?

Ukwayu waketh dwokowang’ penji mwa ubed nyaradundo, kara uwek kaka ni jumange de. Ukwayu waur bende niweco iwi lembe ma tung’ tung’ dupa. Eno biketho jumange gibinwang’u lembe ma giwec i wiye.—w23.04, mba. 23.

‘Yo mi leng’o’ ma juweco pire i Isaya 35:8 utie ang’o?

Ku kwong’a, Yo mi lapor ma juweco pire i verse maeni unyutho yo ma Juyahudi giwotho i iye niai i Babeli pi nidok i ng’om ma thugi. Kadong’ i rundi ma tin ke? I kind oro dak swa m’uterojo i kum oro 1919, jutimo tic mi yiko yoje, niwacu juloko Biblia, juwodhe iwi karathasi man jutimo lembe mange de. Dhanu pa Mungu giwotho i ‘Yo mi leng’o’ pi nimondo i paradizo mi tipo pi ninwang’u mugisa mi Ker.—w23.05, mba. 15-19.

Lembrieko thek 9 umiyo juk m’uweco iwi jumamon ario ma kani mi lapori?

Buku mi Lembrieko uweco pi “dhaku ma jakasegu” ma lwong’o pare terojo i “liel,” man pi dhaku ma juporo ku “rieko mandha,” ma lwong’o pare terojo i “yo mi ng’eyothelembe” man i kwo. (Rie. 9:1, 6, 13, 18)—w23.06, mba. 22-24.

Kite ma Mungu utiyo ko ku Lot unyutho nenedi nia e won jwigiri man nia i lembe pare tek ungo?

Yehova umiyo telowic ni Lot nia ewok kud i Sodom ering i ng’om gudi. Ento kinde ma Lot ukwaye nia timba ering i Zoar, eyiyo ire.—w23.07, mba. 21.

Dhaku copo timo ang’o ka jadhoge mi gamiri neno pornografi?

Ecikere nipoy nia eno utie ngo pi kosa pare. Ukwayu eketh wiye i kum winjiri pare ku Yehova man enyam i lembe iwi kpawa mi Biblia m’uweco iwi jumamon ma cwinygi ukeung’abere, ma re Yehova udok ujuko cwinygi. Ecopo konyo bende jadhoge mi gamiri uur lembe ma romo kethe i ariti ma lee.—w23.08, mba. 14-17.

Kinde ma yiyoyic mwa ubenwang’ere i amulaic, ng’iyo i lembe copo konyowa nenedi nibedo moli?

Wacopo neno penji kunoke piem pa ng’atini ni yo m’ubekonyowa ninyang’ i paru pare kunoke i lembe m’ubedieng’o cwinye. Eno konyowa ma ber mandha nidwoko wang’ lembe ku molo.—w23.09, mba. 17.

Lapor pa Maria ubeponjowa ku lembang’o iwi kite mi nwang’u tego?

Kinde ma Maria uwinjo nia ebidoko min Masiya, enwang’u tego i bang’ jumange. Gabriel gikud Elisabeti gitielo cwinye ku Lembagora. Wan bende wacopo nwang’u tego i bang’ juyic wadwa.—w23.10, mba. 15.

Yehova romo dwoko wang’ rwo mwa nenedi?

Eng’olo nia ebiwinjo rwo mwa man ebineno ka nyo girombo ku lembakeca pare. (Yer. 29:12) Eromo dwoko wang’ kwac ma rom i ayi m’ukoc, ento saa ceke ebikonyowa.—w23.11, mba. 21-22.

Jurumi 5:2 uweco iwi genogen; dong’ pirang’o ke judwogo i wiye kendo i verse mir 4?

Ka ng’atini uwinjo lembanyong’a, eromo nwang’u genogen mi kwo kud anyong’a iwi ng’om ma bidoko ni paradizo. Ento kinde m’ebenwang’ere ku peko, ebecirogi, man ebeneno ku wang’e nia Mungu uyiye, m’umbe jiji genogen pare doko tek man enene ni piny m’unuti andha.—w23.12, mba. 12-13.