THIWIWEC MIR 2
WER 132 Wadaru doko kum acel
Cogmon, wumii yung ni mon mwu
“Wu cogmon, . . . wumii igi yung.”—1 PET. 3:7.
I ADUNDO
Wabineno ayi ma cwar dhaku copo miyo ko yung ni dhaku pare nikadhu kud i wec man timo.
1. Yehova ucaku the yub mi gamiri pi thelembe moko acel ma kani?
YEHOVA tie “Mungu ma jamutoro,” man ebemito wan bende wabed jumutoro. (1 Tim. 1:11) Emiyo iwa giramiya dupa wek kara wakwo kud anyong’a. (Yak. 1:17) Acel m’i kindgi utie gamiri. Kinde ma nico ku dhaku gigamiri, ging’olo ku kwong’ nia gibimariri man gibiworiri. Gicopo nwang’u anyong’a mandha tek gibemediri nibedo ku winjiri ma ceng’ini i kindgi.—Rie. 5:18.
2. Tin lembe utie nenedi i gamiri ma dupa?
2 Ku lembe ma rac, i ng’om ma tin ju ma dupa m’ugamiri giwil ku lembang’ola ma gitimo i nindo mi nyom migi. Eno uketho gitie ngo jumutoro. Rapor moko ma OMS uwodho ceng’ini eni unyutho nia cogmon ma dupa gifwodo mon migi, giyero igi wec ma reco, man ginyokolagi i ayi mange de. Moko inwang’u nia nico ma kumeno woro dhaku pare i kind dhanu ento edok etiyo kude rac i pacu. Winjiri m’i gamiri ma dupa nyothere bende ka nico beneno pornografi.
3. Ang’o ma copo ketho nico sendo dhaku pare?
3 Ang’o ma copo ketho cogmon moko gisendo mon migi? Copere nia weggi ubed usendo meggi, e giparu nia sendo mon tie rac ungo. Jumoko gilubo lemsuru ma gidongo i iye, ma nyo ubemewo paru ma rac ma nia “nico mandha” ucikere nitiyo ku kero pi ninyutho ni dhaku pare nia ng’a dhe m’utie won pacu. Jumange lundo juponjogi ngo kud ayi mi bimo wi kite ma giwinjiri ko, uketho i iye wi ng’eicwiny migi. Jumaco moko ke gitie ku nen ma rac iwi jumamon man iwi timo ribiri pilembe gineno pornografi nja. Bende, rapor moko unyutho nia thong’om mi Korona umewo peko maeno amewa. Ento i andha, thelembe maeno zoo ubecwaku ngo nia nico usend dhaku pare.
4. Ukwayu cogmon ma Jukristu gigwokiri i kum ang’o, man pirang’o?
4 Ukwayu cogmon ma Jukristu gigwokiri i kum paru ma rac ma ng’om utie ko iwi jumamon.a Pirang’o? Thelembene acel utie nia, wang’ ma pol paru pa ng’atini cwale i timo. Pieno jakwenda Paulo ucimo wang’ Jukristu ma juwiro mi Roma nia giwek “niwotho nimakere ku ng’om maeni.” (Rum. 12:1, 2) Kinde ma Paulo ubekiewo igi barua, nwang’u jumoko gidaru timo oro ma dupa i cokiri. Ento wec m’ekiewo ubenyutho nia fodi asu jumoko gibino weko lemsuru man paru mi ng’om ubed kud atelatela i wigi. Pieno ekwayugi nia giwil paru man timo migi. M’umbe jiji, juk maeno umulo kum cogmon ma Jukristu ma tin bende. Ku lembe ma rac, jumoko giweko paru mi ng’om maeni ubinyogi uketho gisendo kadok mon migi.b Yehova ke ubemito nico ukwo ku dhaku pare nenedi? Dwokowang’ penji maeno nwang’ere i giragora ma thiwiwec maeni ucungo i wiye.
5. Nimakere ku 1 Pethro 3:7, ukwayu nico ukwo ku dhaku pare nenedi?
5 Som 1 Pethro 3:7. Yehova ung’olo ni cogmon nia gimii yung ni mon migi. Yung utie ayi ma jutiyo ko ku ng’atu ma juworo. Nico ma miyo yung ni dhaku pare kwo kude i ayi ma ber man ku mer. I thiwiwec maeni, wabineno kite ma nico copo miyo ko yung ni dhaku pare. Ento wakecak ku weco iwi kit timo moko ma nyayu lewic iwi jumamon.
UR TIMO MA COPO NYAYU LEWIC IWI DHAKU PERI
6. Yehova paru ang’o iwi jumaco ma fwodo mon migi? (Jukolosai 3:19)
6 Fwodo mon. Yehova udagu won rop. (Zab. 11:5) Ekwero athothi nia cogmon kud ginyokola mon migi. (Mal. 2:16; som Jukolosai 3:19 man korolembe mi there.) Nimakere ku giragora ma thiwiwec mwa ucungo i wiye, niwacu 1 Pethro 3:7, tek nico moko ubekwo ngo ma ber ku dhaku pare, winjiri pare ku Mungu binyothere. Yehova copo winjo ngo kadok rwo pare.
7. Nimakere ku Juefeso 4:31, 32, cogmon gicikiri niuro kit wec ma nenedi? (Nen bende “Koro i wec.”)
7 Wec ma reco. Cogmon moko giyero wec mi kwinyo man ma kiero mon migi. Ento Yehova udagu “kwinyo, ng’eicwiny, kok man ayany ku gin moko ci ma timojo rac.”c (Som Juefeso 4:31, 32.) Ewinjo lembe ceke. Edieng’ i kum ayi ma nico weco ko ku dhaku pare, kadok i amung’ i ot migi. Nico ma weco ni dhaku pare ku kwinyo nyotho gamiri pare kende ngo, ento bende winjiri pare ku Mungu.—Yak. 1:26.
8. Yehova paru ang’o iwi pornografi, man pirang’o?
8 Neno pornografi. Yehova paru ang’o iwi pornografi? Edage. Pieno ka nico moko ubeneno pornografi, nwang’u ebenyotho winjiri pare ku Yehova man ebekoso woro ni dhaku pare.d Yehova ubekwayu nia nico umedere nigwoko bedoleng’ pare ni dhaku pare i timo kende ngo ento bende i paru. Yesu uyero nia nico m’ubeneno dhaku mange i ayi ma ketho ava timo ribiri mondo i iye, nwang’u edaru timo abor “i adundene.”e—Mat. 5:28, 29.
9. Pirang’o Yehova udagu ka nico ubetimo ribiri ku dhaku pare i kite ma ketho dhaku winjere rac?
9 Timo ribiri i kite ma ketho dhaku winjere rac. Cogmon moko gidiyo mon migi kara gitim kugi ribiri i kite ma ketho giwinjiri nia jubetiyo kugi yanga yanga, nia jumarugi ngo kunoke i ayi ma nyotho pidocwiny migi. Yehova udagu timo ma kumeno ma nyutho nia ng’atini ubedieng’ kwa pi bero pare gire. Ebekwayu nia nico umar dhaku pare, etii kude ma ber man ewor pidocwiny pare. (Efe. 5:28, 29) Dong’ ka nico ma Jakristu ubesendo dhaku pare, ebetiyo kude i ayi ma nyayu lewic i wiye kunoke kan eneno pornografi ke? Ecopo wilo paru ku timo pare nenedi?
AYI MI VOYO TIMO MI LEWIC
10. Cogmon gicopo nwang’u bero ma kani i lapor pa Yesu?
10 Ang’o ma copo konyo nico nivoyo timo ma reco man ma nyayu lewic iwi dhaku pare? Ukwayu etim kero elub lapor pa Yesu. Kadok Yesu ubino mbe ku dhaku de, re ayi m’ekwo ko ku julub pare utie lapor mi kite m’ukwayu nico de ukwo ko ku dhaku pare. (Efe. 5:25) Wakenenu ponji ma cogmon gicopo nwang’u i kite ma Yesu ubed ukwo ko ku julub pare man i kite m’ebed eweco ko i bang’gi.
11. Yesu ubed ukwo ku julub pare nenedi?
11 Yesu ubed ukwo ku julub pare i ayi ma ber man mi yung. Ebino ngo kwiny kugi. Kadok ebino Rwoth migi de, ebed eparu ngo nia ukwayu etii ku tego pi ninyutho igi nia en re m’e dit. Ento ebed etimo igi ku jwigiri. (Yoh. 13:12-17) Eyero kadok ni julub pare kumae: “Wunwang’ ponji i bang’a, kum an a mol man a yoo de i adunde, e wubinwang’u yom.” (Mat. 11:28-30) Poy nia Yesu ubino ng’atu ma mol. Ng’atu ma mol ke tie ngo ng’atu ma ng’ic. Ento etie ku tego mi nyutho kweriri gijo. Ka jusaye, ekwiyo kume man ebimo wi kite m’ebewinjere ko.
12. Yesu ubed uweco i bang’ jumange nenedi?
12 Yesu ubed utiyo ku wec pare pi nijuko man nitielo cwiny jumange. Ebed eweco ngo ku kwinyo ni julub pare. (Luka 8:47, 48) Kadok kinde ma judegi pare ginyware man gipimo nisaye de “eculo ngo kawang’ anywarne.” (1 Pet. 2:21-23) Saa moko eng’iyo kadok nibedo ling’ kakare niculo wang’ lembe ku kwinyo. (Mat. 27:12-14) Etie lapor ma ber andhandha ni cogmon ma Jukristu!
13. Calu ma Matayo 19:4-6 unyutho, nico copo “moko i kum dhaku pare” nenedi? (Nen bende cal.)
13 Yesu ung’olo ni cogmon nia gimok i kum mon migi. Edwogo iwi wec pa Won m’uyero nia nico ucikere ‘nimoko i kum dhaku pare.’ (Som Matayo 19:4-6.) Wec mi dhu Jugiriki ma juloko i giragora maeni nia ‘nimoko i kum’ thelembene tie “nimwono kud udok.” Pieno jamtwic mi gamiri m’udiko kind nico ku dhaku ucikere nibedo tek kara ubed ve kindgi umwonere kud udok. E kumeno ka kindgi upokere, gin ario ceke giwinjo litho. Nico ma kindgi utudere ku dhaku pare i ayi maeno uro kit pornografi ceke. Ebayu wang’e m’umbe galu kara “kud enen gin ma konyne mbe.” (Zab. 119:37) Calu Yob, etimo lembariba ku wang’e nia ebineno ngo dhaku mange m’uweko cege i ayi ma ketho ava timo ribiri mondo i iye.—Yob 31:1.
Nico m’ubegwoko bedoleng’ pare ni dhaku pare kwero nineno pornografi (Nen udukuwec mir 13)g
14. Ukwayu nico m’ubesendo dhaku pare utim ang’o pi niyiko winjiri pare ku Yehova man ku dhaku pare?
14 Ukwayu nico ma fwodo dhaku pare kunoke ma yero ire wec ma reco utim lembe m’ulubo e pi niyiko winjiri pare ku Yehova man ku dhaku pare. Mi kwong’o, mito ngo enen timo parene ku tuko; eng’ey bende nia Yehova ubeneno timo pare. (Zab. 44:21; Ekl. 12:14; Ebr. 4:13) Mir ario, ejig nisendo dhaku pare man ewil kura pare. (Rie. 28:13) Mir adek, eyii nia timo pare ubenyayu can i dhaku pare man i Yehova, man ekway kisa i bang’gi. (Tic. 3:19) Mito ekway Yehova umii ire ava mi timo alokaloka man ukonye ebim wi paru, wec man timo pare. (Zab. 51:10-12; 2 Kor. 10:5; Filip. 2:13) Mir ang’wen, etim lembe nimakere ku rwo pare man etim kero eponj nidagu rop ku wec ma reco mi kwonde zoo. (Zab. 97:10) Mir abic, ekway kony m’umbe galu i bang’ judong cokiri ma jumer. (Yak. 5:14-16) Mir abusiel, emak yub ma bikonye niuro kit timo maeno ceke i ng’eye. Ukwayu nico ma neno pornografi bende utim lembe abusiel maeno. Yehova bimiyo mugisa iwi kero m’ebetimo pi niwilo kura pare. (Zab. 37:5) Re ukwayu ngo nico ujig kende kende timo ma reco; mito eponj bende nimiyo yung ni dhaku pare. Nenedi?
AYI M’ICOPO MIYO KO YUNG NI DHAKU PERI
15. Nico copo nyutho mer nenedi ni dhaku pare?
15 Nyuth mer ni dhaku peri. Umego moko ma gibekwo ku mutoro i gamiri migi gitie ku ng’iyo mi timo lembe moko kubang’ ceng’ pi ninyutho ni mon migi nia gimarugi lee. (1 Yoh. 3:18) Nico romo nyutho mer ni dhaku pare i ayi dupa. Ku lapor, Biblia ukoro nia jumaco gibed gigwaku mon migi man gibed gicwiyo limbgi. Nico romo beoro mesaj ni dhaku pare man eyero ire nia, “Ameri lee” kunoke epenje nia, “Riyo peri ubeyero ang’o?” Eromo wotho ng’iewo ire bende piny ma tung’ tung’. Ka nico timo lembe maenogi, nyutho nia ebemiyo yung ni dhaku pare, man eno tudo mer mi gamiri migi.
16. Pirang’o ukwayu nico ubed upak dhaku pare?
16 Foy dhaku peri. Nico ma miyo yung ni dhaku pare yero ire wec ma gierojo man ma tielo cwiny. Yo moko acel m’etimo ko kumeno utie nia kud ewil nibefoyo dhaku pare pi lembe ceke m’ebetimo pi nikonye. (Kol. 3:15) Ka nico ubepaku dhaku pare ku cwinye ceke, adunde dhaku pare dhir kud anyong’a. E ewinjere nia etie museme, nia jumare man nia jubemiyo ire yung.—Rie. 31:28.
17. Nico copo nyutho woro nenedi ni dhaku pare?
17 Kwo ku dhaku peri i ayi ma ber man mi woro. Nico m’umaru dhaku pare nene nia pire tie tek; enene ni giramiya ma ber m’uai i bang’ Yehova. (Rie. 18:22; 31:10) E kumeno, ekwo kude i ayi ma ber man enyutho ire woro, kadok kinde ma gibetimo ribiri. Ekwayu ngo nia gitim ribiri ku dhaku pare i ayi ma ketho dhaku winjere rac, nia jubenyokolae kunoke i ayi ma nyotho pidocwiny pare.f En bende eii nigwoko pidocwiny ma leng’ i wang’ Yehova.—Tic. 24:16.
18. Ukwayu cogmon gibed ku lembakeca mi timo ang’o? (Nen bende sanduku ma thiwiye tie, “Lembe ang’wen ma copo ketho ibedo nico ma pir awora.”)
18 Cogmon, cwinywu ubed tek nia Yehova ubeneno man ebefoyo kero ma wubetimo pi nimiyo yung ni mon mwu i lembe ceke mi kwo mwu. Dong’ wubed ku lembakeca mi miyo igi yung. Pieno, wuur timo ceke mi lewic, wukwo kugi ma ber, wunyuth igi woro man mer. Tek wutimo kumeno, wubinyutho igi nia wumarugi man nia pigi tie tek i iwu. Wumii yung ni mon mwu, e wubigwoko winjiri mwu ma pire tek lee, niwacu winjiri m’i kindwu ku Yehova.—Zab. 25:14.
WER 131 “Gin ma Mungu ribo karacelo”
a Ukwayu cogmon gisom thiwiwec m’uwacu, “Nyo ibed itiyo ku jumamon calu Yehova?” i Otkur ma Wiw mi dwi mi 1, 2024.
b Tek jadhogi mi gamiri ubesendi, ibinwang’u kony lee tek isomo thiwiwec m’uwacu, “De l’aide pour les victimes de violences conjugales.” Pi ninwang’e i jw.org, kiew “violences conjugales” i kaka mi timo sayusac. I aplikasio JW Library® ke mond i “Bibliothèque,” i ng’eye i “Rubriques” man i “Divers.”
c KORO I WEC: “Wec ma reco” udiko wec mir anywar ku cac ma thiri thiri. Wec ceke mir acidi, ma jwigo valer pa ng’atini kunoke ayany de utie wec ma reco.
d Nen thiwiwec m’uwacu, “La pornographie peut briser votre couple” i jw.org man i JW Library.
e Dhaku ma won ot pare neno pornografi binwang’u kony lee i thiwiwec m’uwacu, “Ka jadhogi mi gamiri ucuku neno pornografi” i Otkur ma Wiw mi dwi mir 8, 2023.
f Biblia unyutho ngo gin ma ber kunoke ma rac ma nico ku dhaku gicopo timo i saa ma gibetimo ribiri. Nico ku dhaku ma Jukristu gicikiri nimaku gin gigi yub ma nyutho nia gikeco nimiyo yung ni Yehova, ninyayu anyong’a ng’atuman i wadi, man nibedo ku pidocwiny ma leng’ saa ceke. Re i zoo kwayu ngo nico ku dhaku giwec ku jumange iwi lembe maeno m’umulo kum amung’ mi gamiri migi.
g KORO I CAL: Jurutic wadi umego moko ma gi Jumulembe ngo gibemito giketh enen gazeti migi mi pornografi.