Lim batizo m’umbe galu

1. Thelembe moko ma kani ma beco ma ketho ng’atini limo batizo?

NYO imaru Yehova Mungu m’umiyo iri kwo ku giramiya mange ceke ma beco? Nyo ibemito inyuth ire nia imare? Ayi ma ber m’usagu zoo m’icopo timo ko kumeno utie nithiero kwo peri ire man nilimo batizo. Kan itimo lembe ario maeno, ibimondo i kind juruot pa Yehova. E kumeno, Wuru man Jarimbi ma Yehova bitelo wii man ebigwoki pilembe nwang’u idoko dhanu pare. (Zab. 73:24; Isa. 43:1, 2) Nithiero kwo peri ni Mungu man nilimo batizo bimiyo iri bende genogen mi kwo m’ajikine mbe.—1 Pet. 3:21.

2. Wabineno ang’o i thiwiwec maeni?

² Nyo gin moko nuti m’ubeceri ku limo batizo? Tek eyo, ng’ey nia lembuno ubetimo in kendi ngo. Dhanu milioni dupa ma gitelo yo i weng’i de ugam ukwayu giwil timo man paru migi kara girom nilimo batizo. Ento kawoni gibetimo ni Yehova kud anyong’a man amora ma lee. Lapor mi dhanu moko ma gilimo batizo i rundi ma kwong’a copo miyo iri ponji ma kani? Wakenenu macero ma gibino ko, man ponji ma wacopo nwang’u i lapor migi.

BATIZO MI JUSAMARIA

3. Ang’o ma nwang’u romo cero Jusamaria ku limo batizo?

³ Jusamaria mi rundi pa Yesu gibino i ungu mi dini moko man gibed gikwo ceng’ini kud adhura ma con mi Cekem man mi Samaria m’ubino yo malu mi Yudea. I wang’ niromo pi nilimo batizo, ugam ukwayu giyii Lembe pa Mungu zoo man giponj ninyang’ cuu i iye. I andha, gigam giyiyo nia Mungu uyuyo iwi buku abic ma kwong’a kende mi Biblia, niwacu buku ma niai i Thangambere nitundo i Poy mi Cik, man copere bende buku pa Yocuwa. Ento nimakere ku lembang’ola ma nwang’ere i Poy mi Cik 18:18, 19, Jusamaria de gibino kuro bino pa Masiya. (Yoh. 4:25) Pieno pi nilimo batizo, ugam ukwayu giyii nia Yesu re m’utie Masiya ma jular jung’olo pire. De andha “Jusamaria ma dupa” gitimo kumeno. (Yoh. 4:39) Copere nia ugam ukwayu jumange gikab adegi m’ulage unyang’ lee i igi m’ubino i kind Jusamaria ku Juyahudi.—Luka 9:52-54.

4. Nimakere ku Tic mi Jukwenda 8:5, 6, 14, Jusamaria moko gijolo rwonglembe pa Filipo nenedi?

⁴ Ang’o m’ukonyo Jusamaria nilimo batizo? Kinde ma Filipo ma jarwey lembanyong’a urweyo “igi pi Kristu,” jumoko “ujolo lembe pa Mungu.” (Som Tic mi Jukwenda 8:5, 6, 14.) Giwinjo Filipo, kadok nwang’u ebino Jayahudi. Saa moko nyo gipoy i kum verse mi Lembagora m’unyutho nia Mungu umbe kud akoyakoya. (Poy. 10:17-19) “Giciko ithgi i kum lembe ma Filipo ubeyero” iwi Kristu. Filipo utimo bende udu dupa, calu ve keyo kum jurutwoyo man wodho pajogi. (Tic. 8:7) E kumeno gineno kamaleng’ nia Mungu ubino karacelo kude.

5. Lapor mi Jusamaria ubemiyo iri ponji ma kani?

⁵ Nwang’u Jusamaria giromo weko pidoic mir akoyakoya kunoke koso ng’eyong’ec ucergi ku timo mediri. Ento giweko ngo lembuno utimere. Kinde ma giyiyo andhandha nia Filipo uponjogi ku lemandha, gigalu ngo ku limo batizo. Biblia ukoro nia “kinde ma giyiyo Filipo m’ubino rweyo lembanyong’a iwi Ker pa Mungu man iwi nying’ Yesu Kristu, e jumaco ku jumamon de gigam gilimo batizo.” (Tic. 8:12) Nyo in de iyiyo nia Lembe pa Mungu utie lemandha, man nia Jumulembe pa Yehova gikabu pidoic mir akoyakoya ento gibetimo kero ninyutho kit mer ma Yesu uyero nia Jukristu mandha gicikiri ninyutho i kindgi? (Yoh. 13:35) Ka eyo, mak yub mi limo batizo, man cwinyi bed tek nia Yehova bimiyo iri mugisa.

6. Lapor pa Ruben copo konyi nenedi?

⁶ Umego Ruben mi ng’om mi Allemagne udongo i ot mi Jumulembe pa Yehova. Ento saa m’edoko aradu, ecaku bedo ku jiji ka nyo andha Yehova unuti. Evoyo jiji parene nenedi? Calu m’enyang’ nia ekoso ng’eyong’ec iwi lembene, emaku yub mi timo gin moko. Ekoro kumae: “Anwang’u nia mito anyeg i kum jiji parane i saa mi ponji para ma segi. Pieno ugam ukwayu aponj wang’ dupa thiwiwec m’uweco iwi paru ma nia piny ulokere aloka.” Ruben usomo buku Y a-t-il un Créateur qui se soucie de vous ? Buku maeno ukonye lee mandha. Eparu yor i iye kumae: ‘Cey! Yehova unuti andha.’ Bende, kinde m’ecidho niliewo kabedo mwa ma dit, bedo i acel ma n’i kind umego ku nyimego mwa m’i wang’ ng’om zoo uwok unyang’e lee akeca. E saa m’edok i Allemagne, elimo batizo ku oro 17. Tek itie ku jiji iwi ponji moko, tim sayusac i girasoma mwa pi ninyego i kume. Gin ma voyo jiji utie “ng’eyong’ec ma tap.” (Efe. 4:13, 14) Man kan icuku winjo rapor ma tung’ tung’ iwi mer ku bedo i acel ma n’i kind dhanu pa Yehova m’i wang’ ng’om zoo man ibeneno lembene ku weng’i i cokiri peri, e mer m’imaru ko umego ku nyimego mwa m’i wang’ ng’om zoo bimedere.

BATIZO PA SAUL MI THARSO

7. Ugam ukwayu Saul uwil paru ma kani m’ebino ko?

⁷ Wakewec iwi lapor pa Saul mi Tharso. Egam eponjere lee i dini mi Juyahudi man nwang’u ebecidoko ng’atu ma pire tek. (Gal. 1:13, 14; Filip. 3:5) Saa maeca Juyahudi gibed gineno Jukristu ni ju m’ujai i kum yiyoyic. Pieno Saul unyayu ragedo i kumgi ku kwinyo ma lee. Ebino wondere nia ebetimo yeny pa Mungu. (Tic. 8:3; 9:1, 2; 26:9-11) Pieno pi nijolo Yesu man nilimo batizo pi nidoko Jakristu, ugam ukwayu Saul de kud uwil nia jubinyayu ragedo i kume.

8. (a) Ang’o m’ukonyo Saul nilimo batizo? (b) Nimakere ku Tic mi Jukwenda 22:12-16, Anania ukonyo Saul nenedi? (Nen bende cal.)

⁸ Ang’o m’ukonyo Saul nilimo batizo? Kinde ma Yesu uweco i bang’ Saul niai kud i polo, wang’ Saul udoko abinga. (Tic. 9:3-9) Pieno ekwiro cam pi nindo adek man m’umbe jiji enyamu i lembe iwi gin m’uai utime. Andhandha, Saul ufouyiyo ku cwinye zoo nia Yesu ubino Masiya man nia julub pare gibino i dini mandha. Saul ucikere nidieng’ lee mandha pi cinge m’ediko i kum nek pa Stefano. (Tic. 22:20) I ajiki mi nindo adek maeno, jalub moko ma nyinge Anania ucoro i vut Saul ku yoo, ekeyo wang’e, man ekwaye nia elim batizo m’umbe galu. (Som Tic mi Jukwenda 22:12-16.) Saul uyiyo kony maeno ku jwigiri man ecaku kit kwo ma nyen.—Tic. 9:17, 18.

9. Lapor pa Saul ubemiyo iri ponji ma kani?

⁹ Ponji tie dupa ma wacopo nwang’u i lapor pa Saul. Nwang’u eromo weko kuhaya kunoke lworo mi dhanu ucere ku limo batizo. Ento eweko ngo lembuno utimere. Saul ujwigere man ewilo kit kwo pare kinde m’ebejolo lemandha iwi Kristu. (Tic. 26:14, 19) Ebino ayika nidoko Jakristu kadok egam eng’eyo nia jubinyayu ragedo i kume. (Tic. 9:15, 16; 20:22, 23) I ng’ey batizo pare, emedere nijengere zoo iwi Yehova pi niciro peko ma tung’ tung’ m’enwang’ere ko. (2 Kor. 4:7-10) Andha kan ilimo batizo pi nidoko Jamulembe pa Yehova, iromo nweng’iri ku masendi kunoke ku lembe ma romo ketho yiyoyic peri i amulaic. Ento cwinyi bed tek nia Yehova giku Kristu gibikonyi saa ceke.—Filip. 4:13.

10. Lapor pa Anna copo konyi nenedi?

¹⁰ Anna udongo i Europe ma yo Nyangu. I ng’ey ma min ulimo batizo, won uyiyo nia en de ecak ponjo Biblia. Saa maeno ebino ku oro 9. Ento lembene unyayu titi ma lee i kind wedi pare mange ma gibed gikwo kugi karacelo yo pagi. Wedi pa Anna gineno nia etie ruvwa ma lee nia ng’atini uwek dini mi jupagi. Kinde ma Anna udoko ku oro 12, epenjo won nia ebemito elim batizo. Won umito enyang’ ka nyo eno utie yub pare gire kunoke nyo ng’atu moko mange re m’ubecwale. Edwoko kumae: “Amaru Yehova.” E won uyiyo nia elim batizo. I ng’ey batizo pare, wedi pare gimediri ninyware man nisende. Wat pare acel uyero ire kumae: “Ecibedo ber ka nwang’u itie won asara man imadhu taba kakare nibedo Jamulembe pa Yehova.” Anna unyego ku peko maeno nenedi? Ekoro kumae: “Yehova umiyo ira tego, man mama giku baba de gikonya lee mandha.” Anna ukiewo lembe moko ma segi ma Yehova ukonye i igi i kwo pare. Ebed edwogo iwi lembenegi kara kud ewil i kum kite ma Yehova ukonye ko. Tek ibenweng’iri i wang’ jai, poy nia Yehova bikonyo in bende.—Ebr. 13:6.

BATIZO PA KORNELIO

11. Nwang’u ang’o ma romo cero Kornelio ku limo batizo?

¹¹ Biblia uweco bende pi lapor pa Kornelio. Ebino “jadit ma telo wi juaskari dak acel” mi Juroma. (Tic. 10:1, kmt.) Pieno copere nia ebino ku dito ma pire tek i kind dhanu man i kind juaskari. Bende, “ebed emiyo giramiya dupa ni jucan.” (Tic. 10:2) Nindo acel Yehova uoro Pethro ucidh urwey ire lembanyong’a. Nyo dito pa Kornelio uketho egalu ku limo batizo?

12. Ang’o m’ukonyo Kornelio nilimo batizo?

¹² Ang’o m’ukonyo Kornelio nilimo batizo? Biblia ukoro nia Kornelio ubino ng’atu “ma lworo Mungu karacelo ku juruot pare ceke.” Ebed ekwayu bende Mungu saa ceke. (Tic. 10:2) Kinde ma Pethro urweyo ire lembanyong’a, en ku juruot pare zoo giyiyo Kristu man gilimo batizo de ndhu ndhu nica. (Tic. 10:47, 48) M’umbe jiji, Kornelio ubino ayika nitimo alokaloka moko ci m’ukwayere kara ecak timo ni Yehova karacelo ku juruot pare.—Yoc. 24:15; Tic. 10:24, 33.

13. Lapor pa Kornelio ubemiyo iri ponji ma kani?

¹³ Tap calu Saul, nwang’u Kornelio de romo weko dito pare ucere ku doko Jakristu. Ento eweko ngo lembuno utimere. Nyo ubekwayu itim alokaloka ma lee i kwo peri pi niyiyo lemandha? Tek eyo, ng’ey nia Yehova bibedo Jakonyni. Ebimiyo iri mugisa tek ikeco nitimo ire nimakere ku cik mir ukungu mi Biblia.

14. Lapor pa Tsuyoshi copo konyi nenedi?

¹⁴ Ugam ukwayu umego Tsuyoshi mi ng’om mi Japan utim alokaloka moko i tic pare kara erom nilimo batizo. Ebino jang’ey direter mi somo mi Ikenobo, kaka ma juponjo i iye yiko thiwe. Direterne ubed uyiko thiwe mi kuny. Kan ecopere ngo ire nicidho i kuny, Tsuyoshi re m’ubed ucidh ucungo kakare saa ma jubetimo lemsuru mi kuny nimakere ku dini mi Buddha. Ento kinde ma Tsuyoshi uponjo lemandha iwi ju m’utho, enyang’ nia timo maeno copo cere ku limo batizo. E emaku yub mi caku dikere ngo i lemsuru mi dini mi Buddha. (2 Kor. 6:15, 16) Tsuyoshi uweco ku jadit pare iwi lembene. Adwogine ubino ang’o? Tic uweke ngo, man juyiyo ire nia ecopo bedikere ngo i lemsuru maeno. E elimo batizo kago oro acel i ng’ey m’ecaku ponjo Biblia.a Tek ukwayu itim alokaloka moko i tic peri kara inyay anyong’a i Yehova, cwinyi bed tek nia ebipong’o yeny peri man mi juruot peri.—Zab. 127:2; Mat. 6:33.

BATIZO MI JUKORINTHO

15. Ang’o ma nwang’u romo cero Jukorintho ku limo batizo?

¹⁵ Maru jukupiny man timo mi lemsasa ugam umew lee i adhura mi Korintho ma con. Dhanu ma dupa mir adhurane gibino ku timo ma foyo ngo i Mungu. M’umbe jiji, nwang’u eromo bedo tek lee ni dhanu ma kwo i adhura maeno nicaku timo ni Mungu. Ento saa ma jakwenda Paulo utundo i Korintho man erweyo lembanyong’a iwi Kristu, ‘Jukorintho dupa ma giwinje gicaku yiyo man gilimo batizo.’ (Tic. 18:7-11) I ng’eye Rwoth Yesu Kristu unyuthere ni Paulo i gin ma wok i wang’ man eyero ire kumae: “Fodi atie ku dhanu dupa i adhura maeni.” Pieno Paulo umedere nirweyo kuca pi oro acel ku nusu.

16. Ang’o m’ukonyo Jukorintho moko nivoyo gin ma nwang’u romo cerogi ku limo batizo? (2 Jukorintho 10:4, 5)

¹⁶ Ang’o m’ukonyo Jukorintho nilimo batizo? (Som 2 Jukorintho 10:4, 5.) Utie Lembe pa Mungu man tego mi tipo pare ma leng’ re m’ukonyogi nitimo alokaloka ma yerere ngo i kwo migi. (Ebr. 4:12) E kumeno, etuc nicopere ni dhanu mi Korintho ma gijolo lembanyong’a iwi Kristu niweko ng’iyo ku timo ma calu ve mero, kwo man timo ribiri co ku co kunoke mon ku mon.—1 Kor. 6:9-11.b

17. Lapor mi Jukorintho ubemiyo iri ponji ma kani?

¹⁷ Poy nia kadok ugam ukwayu dhanu moko mi Korintho giwek ng’iyo m’uguro ulage lee i kwo migi de, re giparu ngo nia ebibedo igi tek magwei nidoko Jukristu. Ento giii ku kero migi ceke nikwanyu yo ma diny ma terojo i kwo ma rondo ku rondo. (Mat. 7:13, 14) Nyo ibenyego i kum ng’iyo kunoke timo moko ma rac kara irom nilimo batizo? Ka eyo, kud ivoci! Kway Yehova umii iri tipo pare ma leng’ ukonyi iceriri i kum ava ma lee mi podho i timo ma rac.

18. Lapor pa Monika copo konyi nenedi?

¹⁸ Monika mi ng’om mi Géorgie utimo kero ma lee pi niweko wec m’ucido man galuwang’ m’umaku piny ungo kara etim mediri nitundo elim batizo. Ekoro kumae: “Saa m’abino aradu, tego para zoo ubino rwo. Yehova ugam ung’eyo nia abemito atim gin m’atira, man saa ceke ewotho konya man etelo wiya.” E Monika ulimo batizo ku oro 16. Nyo timo moko nuti m’ukwayu iweki pi nitimo ni Yehova i ayi m’efoyo? Ka eyo, mediri nikwaye emii iri kero mi timo alokaloka. Poy nia Yehova miyo tipo pare ma leng’ ku berocwinye.—Yoh. 3:34.

YIYOYIC PERI COPO CORO GUDI

19. Ang’o ma copo konyi nivoyo macero m’ubedo ve gudi? (Nen bende cal.)

¹⁹ Cwinyi bed tek nia Yehova umeri man nia ebemito ibed acel m’i kind juruot pare. Eno ke kadok nwang’u ang’o ngi m’ubeceri ku limo batizo de. Yesu ugam uyero ni ungu moko mi julub pare mi rundi ma kwong’a kumae: “Ka wutie ku yiyoyic ma rom ku nying atingili, wubiyero ni got maeni kumae: ‘Ai ku keni, cidh kaca,’ e ebiai, man gin moko mbe ma bicopere ngo iwu.” (Mat. 17:20) Nwang’u fodi ju m’eyero igi wec maeno gibedo kude pi oro ma nok kende, pieno nwang’u fodi yiyoyic migi de ubedongo adonga. Ento Yesu utego cwinygi nia tek gitie ku yiyoyic ma tek, Yehova bikonyogi nivoyo macero m’ubedo ve gudi. In de Yehova bikonyi kumeno.

20. Inwang’u bero ma kani i lapor mi Jukristu mi rundi ma kwong’a ku mi rundi ma tin ma waneno i thiwiwec maeni?

²⁰ Tek ing’eyo gin m’ubeceri ku limo batizo, tim lembe m’ukwayere pi nivoye m’umbe galu. Nwang’ jukocwiny man tego i lapor mi Jukristu mi rundi ma kwong’a ku mi rundi ma tin. Wek lapor migi umii amora i kumi man ucweli nithiero kwo peri ni Yehova man nilimo batizo. Eno tie yub ma ber nisagu zoo m’iromo maku i kwo peri!