Pirang’o Jumulembe pa Yehova gibed giponjo dhanu ma dong’ utie ku dini migi?

Wabed wanwang’u nia dhanu ma dupa ma dong’ gitie ku dini migi, gibed gimaru niweco iwi lembe mi Biblia. Ento, waworo twero pa ng’atuman iwi yioyic pare ma tie tung’ ku mwa man wadiyo ngo jumange adiya ya giyii ponji mwa.

Kinde ma wabeweco ku dhanu iwi lembe mi dini, watimo kero nitio ku juk mi Biblia m’uyero nia wawec ku ‘molo’ man wanyuth woro ma thuth i bang’ dhanu mange. (1 Petro 3:15) Wang’eyo nia jumoko copo wokwero ponji ma wabetero igi. (Matayo 10:14) Ento, ka fodi waweco ngo ku ng’atini wacopo ng’eyo ngo ka nyo ebijolo ponji mwa. Wang’eyo bende nia lembe belokere i kwo pa dhanu.

Ku lapor, ng’atini romo bedo mbe ku saa mi weco kudwa nindo moko, ento nindo mange ecopo foyo niweco kudwa. Bende ng’atini copo nwang’ere i wang’ peko kunoke lembe moko ma nyen m’ebemulere ko, ma copo cwale efoi lembe mi Biblia. Eno re m’uketho wabed watimo kero niweco ku dhanu wang’ dupa dupa.