Pirang’o Jumulembe pa Yehova gidikiri ngo i lwinyi?
Jumulembe pa Yehova gidikiri ngo i lwiny pi thelembe m’ulubo e:
Gibeworo Mungu. Biblia uyero nia jurutic pa Mungu “gibithiedho palamularu migi ni kwejdhiang’” man “kadok lwiny de gibiponjo kendo ngo.”—Isaya 2:4.
Gibeworo Yesu. Yesu ugam uyero ni jakwenda Pethro kumae: “Dwok palamularu peri kakare, kum dhanu ceke ma giting’o palamularu, gibitho de ku palamularu.” (Matayo 26:52) Nikadhu kud i wec maeno, Yesu unyutho nia julub pare gibiting’o ngo jamnek pi nikiedo lwiny.
Julub pa Yesu gidiko ngo cing’gi nyanok de i lemgamba mi ng’om, ma gibeworo ko lembang’ola ma Yesu uyero nia “gitie ngo mi ng’om”. (Yohana 17:16) Gijai ungo i kum tic mi juaskari kunoke gicero ngo ng’atu moko m’ung’iyo nibedo askari.
Gimaru dhanu mange. Yesu ung’olo ni julub pare kumae: “Wumeruru i kindwu.” (Yohana 13:34, 35) I ayi maeno re ma gidoko umego ku nyimego mi wang’ ng’om zoo, ma i kindgi ng’atu moko acel de mbe ma romo kiedo lwiny i dhog umin kunoke nyamin.—1 Yohana 3:10-12.
Gibelubo lapor mi Jukristu mi rundi ma kwong’a. Buku moko (Encyclopedia of Religion and War) uyero kumae: “Julub pa Yesu mi rundi ma kwong’a gigam gikwero nikiedo lwiny man nitimo tic mir askari,” ma ging’eyo ko nia timo maeno “urombo ngo ku cik mi mer ma Yesu uponjo man m’eng’olo nia imar jadegi peri.” Rom rom kumeno, Jatheolojia mir Allemagne ma nyinge Peter Meinhold uyero pi julub pa Yesu mi rundi ma kwong’a kumae: “Etie lembe ma copere ngo nibedo jakristu man askari bende i saa ma rom eno.”
Gitie lwak dhanu ma ber
Jumulembe pa Yehova gitie ku kony i kind lwak dhanu, ento ginyotho ngo nyanok de bedomoth mi ng’om ma gibekwo i iye. Waworo dito pa gavmenti, cal ku lembang’ola mi Biblia ma e:
“Dhanu ceke maku giwor jubim mi ng’om.”—Jurumi 13:1.
“Dong’ wumii piny pa Kaisari ni Kaisari, ma pa Mungu ke ni Mungu.”—Matayo 22:21.
Eno re m’uketho Jumulembe pa Yehova giworo cik, giculo palatha, man gidiko cing’gi ku gavmenti pi kero m’ebetimo pi bero mi lwak dhanu.