Ng’eyong’ec tie ango?

Lembe ma Biblia udwoko

I Biblia, juloko wec ma nia “ng’eyong’ec” niai kud i wec mi dhu Juebrania ma tie nephesh man mi dhu Jugiriki psykhe. I dhu Juebrania thelembe mi wecne tie “giracwiya ma yuyo;” i dhu Jugiriki ke thembene tie “piny ma kwo ni iye.”a Pieno, ng’eyong’ec tie giracwiya zoo, ento etie ngo piny moko ma medere nibedo kwo i ng’ei ma kum udaru tho. Wakenenu kite ma Biblia unyutho ko nia ng’eyong’ec pa ng’atini utie ng’atune en zoo:

• Kinde ma Yehova ucwiyo ng’atu ma nico ma kwong’a, Biblia uyero nia “ng’atu ma nicone doko ng’eyong’ec ma kwo.” (Thangambere 2:7) Jumiyo ngo ng’eyong’ec ni Adamu, ento edoko ng’eyong’ec ma kwo, kunoke dhanu.

• Biblia uyero nia ng’eyong’ec copo timo tic, pidho cam, camu, woro cik man mulo kum avu. (Lembe mi Julawi 5:2; 7:20; 23:30; Poi mi cik 12:20; Jurumi 13:1) Lembe maeno ng’atini timo en kukume.

Nyo ng’eyong’ec tho ngo?

Ungo, ng’eyong’ec romo tho. Verse ma dupa mi Biblia unyutho nia ng’eyong’ec tho. Laporne moko ni e:

• “Ng’eyong’ec m’udubo, ebitho.”​—Ezekiel 18:4, 20.

• I Israel ma con, ka ng’atu moko utimo dubo ma pek, matira ma pol ma jubed jumiyo utie “nikabu ng’eyong’ecne woko.” (Ai 12:15, 19; Lembe mi Julawi 7:20, 21, 27; 19:8) Jubed “juketho etho,” niwacu junego ng’atune.​—Ai 31:14.

• I verse moko mi Biblia, i ngei tho pa ng’atini, jubed jutiyo ku wec ma nia “ng’eyong’ec m’utho” pi ninyutho avu. (Lembe mi Julawi 21:11; Wel 6:6) Kadok nwang’u lok ma dupa mi Biblia utiyo ku wec ma nia “avu” kunoke “ng’atu m’utho” i verse maeno de, re i dhok ma kwong’a mi Juebrania ma jular jukiewe i iye, jutiyo ku wec nephesh, kunoke “ng’eyong’ec.”

“Ng’eyong’ec” copo nyutho “kwo”

Biblia bende utiyo ku wec “ng’eyong’ec” pi ninyutho “kwo.” Ku lapor Yob 33:22 utiyo ku wec ma nia “ng’eyong’ec” (nephesh) pi niweco pi “kwo.” Bende Biblia unyutho nia ng’eyong’ec pa dhanu, kunoke kwo, romo bedo i ariti kunoke romo rwinyo.​—Ai 4:19; Jupoklembe 9:17; Jufilipi 2:30.

Ayi maeno ma jutiyo ko ku wec “ng’eyong’ec” ubekonyowa ninyang’ i verse ma juyero nia ng’eyong’ec “ubecidho” kunoke “ubeai.” (Thangambere 35:18; King James Version) Wec maeno mi lapor ubenyutho nia kwo pa ng’atini ubejik. Juloko wec mi Thangambere 35:18 i Biblia moko nia “eyuyo wang’ ma tokcen.”​—Good News Translation; New Jerusalem Bible.

Yiyoyic ma nia ng’eyong’ec tho ngo e uai kani?

Jukristu ma giyiyo nia ng’eyong’ec tho ngo, ginwang’u ponji maeno i bang’ jururieko mi Giriki ma con, ento i Biblia re ngo. Buku moko (Encyclopædia Britannica) uyero kumae: “Biblia betiyo ku wec ma nia ng’eyong’ec, pi ninyutho yuyo man eyero ngo nia ng’eyong’ec utie gin moko ma nwang’ere yor i ijo, man nia ekoc ku kumjo. Ponji mi Jurudini ma nia ng’eyong’ec man kum tie gin ma tung’ tung’ uai i bang’ Jugiriki ma con.”

Mungu romo yiyo ngo nyanok de nia ponji pare ujebere ku rieko mi dhanu, calu ve niyiyo nia ng’eyong’ec tho ngo. Pieno Biblia ubecimo wang’wa kumae: “Wubed ku weng’wu kara ng’atu moko kud udwokwu ni ng’eca ku rieko mi dhanu man awonde ma iye nanu m’ucungo iwi lembsuru mi dhanu.”​—Jukolosai 2:8.