Pirang’o jumulembe pa Yehova gimondo ngo i lemgamba keri?
Jumulembe pa Yehova gimondo ngo nyanok de i lemgamba mi ker pi thelembe mi yiyoyic migi m’ujengere iwi gin ma Biblia ubeponjo. Wacwalu ngo dhanu i jai, wabolo ngo kwir ni thenge moko kunoke wamiyo ngo nyingwa, walaru ngo kabedo i gavmenti kunoke wamondo ngo i lembe moko ma romo ketho juwil gavmenti moko ku mange. Wayiyo nia Biblia umiyo thelembe ma tap mi woro lembe maeno.
Wabelubo lapor pa Yesu m’ekwero ko dito mi lemgamba ker. (Yohana 6:15) Eponjo julub pare nia “gitie ngo [thenge] mi ng’om” man enyutho igi kamaleng’ nia gicikiri ngo nibedo i theng lemgamba ker moko ci.—Yohana 17:14, 16; 18:36; Marko 12:13-17.
Wamoko mwa kikiki i kum Ker pa Mungu ma Yesu uponjo pire kinde m’egam eyero kumae: “Lembanyong’a maeni mi Ker jubirweyo i ng’om zoo.” (Matayo 24:14) Calu dhanu ma gicungo kaka Ker pa Mungu, wamiyara nirweyo pi bino pa Kerne, man wadiko ngo cingwa i kum lemgamba ker mi ng’om moko ci, kadok mi ng’om ma wabekwo i iye de.—2 Jukorintho 5:20; Juefeso 6:20.
Pilembe wamondo ngo i lemgamba ker moko ci, watie agonya niweco ku dhanu mi lemgamba ker ceke iwi lembanyong’a mi Ker pa Mungu. Waii ninyutho ku wec man ku timo mwa nia wageno Ker pa Mungu kende re ma bibino nidaru peko ceke mi ng’om.—Zaburi 56:11.
Calu ma wauro apoka poka mi lemgamba, watie i acel kud umego ku nyimego mi wang’ ng’om zoo. (Jukolosai 3:14; 1 Pethro 2:17) Tung’ ku maeno, dini ma tung’ tung’ ma gimondo ndruk i lemgamba, gibepoko i juyic migi.—1 Jukorintho 1:10.
Waworo gavmenti. Kadok watie ngo i theng lemgamba moko de, re waworo dito pa gavmenti mi ng’om ma wabekwo i iye. Lembuno urombo ku cik mi Biblia ma e: “Kubang’ dhanu ceke maku giwor jubim mi ng’om.” (Jurumi 13:1) Waworo cik, waculo palatha, man wadiko cing’gwa ku gavmenti pi kero ma gavmentine ubetimo pi bero mi lwak dhanu pare. Kakare nidikiri i lembe moko ci ma romo ketho gavmenti ubed lingo lingo, walubo juk mi Biblia m’uyero nia warwo pi “jubim man pi dhanu ceke ma gitie ku dito,” akecane kinde ma ka gibemaku yub ma copo mulo kum bedagonya mwa mi woro Mungu.—1 Timoteo 2:1, 2.
Bende, waworo twero mi jumange iwi yub migi iwi lembe m’uneno lemgamba. Ku lapor, wacero ngo kwir kunoke wadiyo ngo dhanu m’ung’iyo nibolo voth.
Nyo i lemgamba ma wamondo ngo e, utie lembe ma nyeni? Ungo. Jukwenda ku Jukristu mange mi rundi ma kwong’a de gibino ku nen ma rom eno yor i bang’ dito pa gavmenti. Buku moko (Beyond Good Intentions) uyero kumae: “Kadok nwang’u giyiyo nia gicikiri niworo dito pa gavmenti de, re Jukristu mi rundi ma kwong’a giyiyo ngo nimondo i lemgamba moko ci.” Rom rom kumeno, buku moko mange de (On the Road to Civilization) uyero nia Jukristu mi rundi ma kwong’a “gibed giyiyo ngo dito moko ci mi lemgamba.”
Nyo i lemgamba ma wamondo ngo e, nyotho kwiyocwiny mi ng’omi? Ungo. Wan watie lwak dhanu m’umaru kwiyocwiny, eno re m’uketho judongo pa gavmenti de gilworowa ngo. Kenen rapor moko mi 2001 ma kaponjiri mi sians uwodho i ng’om mir Ukraine. Saa m’ebino koro pi lemgamba ma wamondo ngo i iye, raporne uyero kumae: “Tin, dhanu moko giromo foyo ngo ku cungo ma tek mi Jumulembe pa Yehova, ma ke eno re m’ubino thelembe ma dit ma jugam judoto kogi i the bimobim mi Nazi man i kit bimobim moko ma con ma julwong’o Koministe.” Re kadok i ther adici mange mi bimobim mi Union Soviétique de, Jumulembe pa Yehova “gibedo asu ni lwak ma woro cik. Gitimo tic mi podho ka karacelo ma gimiyiri man i atira, bende i kaka ma jubed juyiko i iye piny ma tung’ tung’ ku macini, re ginyotho ngo kwiyocwiny mi bimobim ma julwong’o Koministe.” Rom rom tin eni bende, calu ma rapor eno uyero: yiyoyic man timo mi Jumulembe pa Yehova “ubenyotho ngo kwiyocwiny man cungo pa gavmenti moko acel de.”