Nyo Jumulembe pa Yehova gibelubo dini mi Juyahudi?

Ungo. Jumulembe pa Yehova gitiye Jukristu ma yic migi zoo ujengere iwi giragora mi Biblia. Dini moko ubeponjo nia cok ma Juyahudi gicokiri ko karacelo i Palestin urombo ku lembila mi giragora, ento Jumulembe pa Yehova gicwaku ngo lembuno. Giyiyo ngo nia dikiri mi lembgamba ker maeno jular juewo pire i lembagora. I andha, lembagora udodo ngo gavmenti moko, suru moko, kunoke lwak dhanu moko nisagu jumange. Otkur ma wiw, ma tie girasoma m’ung’eyere lee mi Jumulembe pa Yehova ukoro kamaleng’ kumae: “Gin moko acel de mbe i giragora m’ucwaku lembgamba ker mi dini mi Juyahudi.”

Buku moko (Encyclopædia Britannica) ukoro pi dini mi Juyahudi nia “etie dikiri m’utiye ku lembakeca mi caku man mi cero ba thek mi Juyahudi i ng’om mi Palestin.” Ukugune zoo ucungo iwi lembdini man lembgamba ker. Jumulemba pa Yehova gijengiri ngo iwi ponji mi Juyahudi man ke gidiko ngo cing’gi nyanok de ku lembgamba ker mi dini mi Juyahudi.

Dilo mi Jumulemba pa Yehova utie dini acel ma zoo, man ediko ngo cinge iwi yub mi lembgamba ker moko ci, uketh’i i iye kadok dini mi Juyahudi. Calu m’ung’eyere ma ber mandha nia Jumulembe pa Yehova gidiko ngo cing’gi i kum lembgamba ker, eno uketho i ng’om moko jubenyayu ragedo ma lee i kumgi, re gicungo asu ma tek. Wan wayiyo mwa nia Ker pa Mungu kende re ma bikelo kwiyocwiny ma nja ku nja iwi ng’om, ento bimobim mi dhanu kunoke ungu mi lembgamba ker moko ma romo timo lembuno mbe.

I kind ponji mir ukungu ma Jumulembe pa Yehova giponjo, acel utie nia kaka moko ci ma gibekwo i iye mito giwor cik ma gavmenti mi ng’ombe uketho. Gijai ungo i kum dito pa gavmenti man gidikiri ngo i lwiny.