Nyo Mungu utiyo ku piny ma lokere aloka pi nicwiyo kwond piny ceke ma kwo?
Lembe ma Biblia udwoko
Ungo. Biblia uyero ngbeng’ nia Mungu ucwiyo dhanu, giracwiya mange ma calu ve lei man yen “ku kite ku kite.” (Thangambere 1:12, 21, 25, 27; Lembanyutha 4:11) Eyero nia dhanu ceke uai niai kud i bang’ kwaruwa ma kwong’a, niwacu Adamu giku Eva. (Thangambere 3:20; 4:1) Biblia ucwaku ngo paru ma nia Mungu utiyo ku piny ma lokere aloka pi nicwiyo kit piny ma tung’ tung’ ma kwo. Ento Biblia ukwero ngo paru mi jururieko moko ma giyero nia alokaloka uwotho timere i kind kit giracwiyaman ma kwo.
Nyo Mungu utiyo ku piny ma lokere aloka?
Dhanu ma giyiyo nia Mungu utiyo ku piny ma lokere aloka pi nicwiyo kwo, gitie ku paru ma tung’ tung’ iwi kite m’etiyo ko kude. Nimakere ku buku moko (Encyclopædia Britannica), dhanu moko giyiyo nia “copo ma giracwiya gitie ko mi kwo man mi mediri ninyai kaka moko, utie gengi ma Mungu utiyo ko pi nitelo wi ng’om.”
Paru ma nia Mungu utiyo kud alokaloka pi nicwiyo piny uketho i iye bende paru mae:
Piny ceke ma kwo giai kud i bang’ kwaru ma rom m’ukwo oro dupa udaru kadhu.
Piny moko ma kwo copo lokere doko ni piny mange ma kwo m’ukoc bor kude. Ku lapor, juwacu nia ang’iero copo lokere doko ni dhanu.
I kadhiri moko, Mungu re m’utelo wi alokaloka eno.
Nyo paru ma nia piny ulokere aloka urombo ku Biblia?
Paru ma nia Mungu utiyo kud alokaloka pi nicwiyo kwo uketho ebenen nia lembe m’i Thangambere utie ngo ceke ceke tap. Ento Yesu udok iwi lembe ma jukoro i Thangambere ni lembe m’utimere andha. (Thangambere 1:26, 27; 2:18-24; Matayo 19:4-6) Biblia uyero nia i wang’ nibino i ng’om, Yesu ular ukwo i polo man ekonyo Mungu “pi nicwiyo piny ceke.” (Yohana 1:3) Pieno, paru ma nia Mungu utiyo ku piny m’ulokere aloka pi nicwiyo kit kwo ma tung’ tung’, urombo ngo ku lembe ma Biblia ubeponjo.
Nyo copo ma yen man lei gidok ging’iyo ko kaka mange unyutho nia piny ulokere aloka?
Biblia ukoro ngo nia alokaloka ma rukani ma copo timere i kind giracwiya moko ma kwo mi kite ma rom. Bende, ekwero ngo paru ma nia lei man yen ma tung’ tung’ ma Mungu cwiyo gicopo belokiri kinde ma gibemediri ninyai man ning’iyo i kabedo ma nyen ma gibenwang’iri i iye. Kadok nwang’u jumoko gineno lembe maeno nia tie alokaloka de, re i andha kit kwo ma nyen ucaku ngo.