Tic mi miyo kony i wang’ ng’om zoo i saa mi thong’om mi Korona

I dwi mir Adek 2020, kinde ma dilo ma neno lembe mi leng’kum mi ng’om zoo (OMS) utwong’o nia Korona utie thong’om mi ng’om zoo, dhanu dupa giparu de ngo nia nwang’u thone romo galu ma kadhu oro acel. Milioni dupa mi dhanu, uketho i iye Jumulembe pa Yehova ginwang’iri ku can i thenge mi kum, mi paru man can sente nikum thong’om maeno. Dong’ Jumulembe pa Yehova gimaku yub ma kani man gimiyo kony nenedi i saa mi peko maeni?

Miyo kony ni dhanu ma gitie ku yeny

I the telowic mi Komite mi jutel wi tic mi Guriri m’utelowic mi Jumulembe pa Yehova, jucaku the Komite ma miyo kony i saa mi peko ma wok rek ma kadhu 950 i wang’ ng’om zoo pi nimiyo kony i saa mi Korona eni. I lembe moko, gibed gimaku yub mi miyo konyne gin gigi, man i thenge mange ke Jumulembe gibed ginwang’u kony niai kud i bang’ gavmenti. Bende, Komite maeno utimo tego mi miyo kony i kabedo ma lee dit.

Ku lapor, kenen lembe m’utimere i Paraguay. Gazeti moko ukoro nia nikum canpiny ma thong’omne ukelo, adwogi mi lembene utie nia “wend dhanu ma lee dit mi Paraguay kec ubodho i udi migi.” Ento, nwang’u dong’ Komite ma miyo kony i saa mi peko ma wok rek ucaku miyo jamtic ma yenyne tie niwacu cam, jamlwoko piny, man yath mi nego ukudi ni juruotman m’utie ku dhanu ang’wen i iye ma romo konyogi pi yenga ario. Jamticneman ucamu dolar ma tundo 30.

Dhanu ma gitimo tic mi miyo kony eno gigwokiri nenedi kara kudi thong’om mi Korona umakgi man jumange? Gikendo maske man gibedo ma kindgi tie nya bor bor ku jumange. Bende, gibed ging’iyo cuu nia kampuni m’ubepoko cam ubetiyo ku ot m’upong’o lembe mi leng’o man gibelubo lembe ceke ma ketho jugwokiri. Eno uketho i iye nineno cuu nia dhanu ceke m’ubino nipoko piny gikendo kendi ma romo gwokogi, gilwoko kum piny, gikilo yath ma nego ukudi i kum muthukari man nicoko dhu jamtic kaka ma jukilo yath i iye. Tokcen ne, dhanu ma gitero kony gibedo bor bor kud umego ma jutero igi konyne.

Nitiyo ku giramiya ku rieko

Calu m’ubino i dwi mi Kwong’o 2021, Komite mi jutel wi tic uyiyo nia jutii ku dolar milioni 25 pi nimiyo kony i saa mi thong’om mi Korona. Bethel man Komite ma tung’ tung’ ma miyo kony i saa mi peko ma wok rek betiyo ma ber ku giramiya maeno man gitimo tego pi ninwang’u bei piny ma ber ma jutiye ku yenyne. Ku lapor, i Chili, umego ma gipangu tic mi miyo kony gimito ging’iew ng’or (petit pois) ma romo kilo 750. Ento bei mi ng’oje uidho nisagu ma naka wang’ ario, ke i kind dwi acel kende! Saa ario kende i ng’ey ma giwinjiri nia ging’iewo ng’orne kadok beine tek de, e jaralwor ulund uyero igi nia ng’atu moko ndhu fodi uai udwoke de adwoka pi beine ma tek. Pieno, kakare nipiko igi ng’oje i bei ma tek ma gilar giwinjiri pire, jaralwor maeno ulund umiye igi i bei ma ber mi dwi m’ular ukadhu i wang’e!

Kadok kumeno de, kinde m’umego mwa gicidho pi niyeyo ng’orne, jaralwor nica ulund ulalu ng’iewne m’eweco ko rac pir umego mwa nia gipoko cam i ayi m’atira ngo calu ma dilo mange betimo. I ng’ey nyathi rwo moko ma nyaling’ ling’, ng’atu acel m’i kind umego mwa ukoro ni jaralworne nia cokiriman ular ulondo cuu mandha nia ng’a ndhe m’utie ku yeny nisagu. Bende, umego mwa gikoro ire nia nikum jampimo piny ubed ukoc nimakere ku kura mi kabedoman; man ke nia piny moko ci ma jupimo jubiketho erombi ku hali mi juruotman ma jubimiye igi. Tokcen ne, gikonyo wii jaralworne nia giramiya mi sente ceke man tic ma Jumulembe pa Yehova gitimo, gimiyiri gigi ku berocwinygi. E dhoge two kaw! Jaralwor eno ugam uyiyo ngo kende kende nijwingo bei, re i nindo ma cen emedo bende kilo 400 mi ng’or mange ni umego mi ma nanu.

“Ayi mi nyutho mer mandha”

Lusu, ma tie dhatho i Liberia kwo i ot pare ku dhanu abic. Kugweno moko i ng’ey ma gimadhu cai man ging’iyo i giragora ma kubang’ ceng’, nyakwar Lusu ma nico mi oro abiro unyang’ nia karaman gimbe ku piny moko acel de ma pir acama i ot pagi. Epenjo kumae: “Wabicamu ang’o?” Lusu utielo cwinye nia edaru rwo pi nikwayu kony i bang’ Yehova man etie kud andha nia ebimiyo igi piny ma gitie ku yenyne. E i reto ma cing’ nica ndhu, judong’ cokiri ulwong’o Lusu i thelefon nia ebin egam cam moko ma jumiyo pi nikonyo dhanu. Lusu ukoro kumae: “Nyakwara uyero nia kawoni eng’eyo nia Yehova copo winjo man copo dwoko wang’ rwo pilembe edwoko wang’ rwo para de.”

I ng’ey ma mego moko i République Démocratique du Congo ma tie jadhugola ma ceng’ini mi Jumulembe pa Yehova uneno nia juruot eno ginwang’u kony mi cam niai kud i bang’ juyic wagi, eyero kumae: “I ng’ey thong’om maeni, wabidoko Jumulembe pa Yehova pilembe gigam gidieng’ kud umego ku nyimego migi i kind saa maeni ma lembe ubino tek i iye.” Won ot pare upenje kumae: “Imito idok Jamulembe pa Yehova ndhu pi saki acel mi mucele e?” Edwoko ire kumae: “Ungo, kumeno ngo, ento saki acel mi mucele eca utie ayi mi nyutho mer mandha.”

Jumulembe pa Yehova gibino ayika nimiyo kony ma pio pio ni umego ku nyimego migi i saa mi thong’om maeni, ndhu nikum giramiya mwu ma ku berocwiny. Wafoyo lee dit giramiya peri mi miyo m’itiyo ko kud ayi ma jukoro i donate.jw.org.