Yob ugwoko bedocu pare

NYO ng’atini copo medere nitimo ni Mungu kan ebenwang’ere kud amulaic m’ukadhu kero pare man ka woro pare ubemiyo ire ngo bero moko acel de? Penji maeno uwok man wang’e dwokere nikadhu kud i lembe ma Yob ukadhu kud i iye.

Kinde ma nyithindho mir Israel ni i Misiri, Yob, ma wat pa Abraham, ubino kwo i ng’om ma kawoni julwong’o Arabia. I saa maeca, i polo, jumalaika gicokiri i wang’ Mungu, man jajay ma Sitani de ubino tie i kindgi. I wang’ ju m’ucokiri eno, Yehova unyutho nia egeno jaratic pare Yob lee dit. I andha, Yehova uyero nia ng’atu moko acel de mbe m’ugwoko bedocu pare calu Yob. Ento Sitani uyero nia Yob ubino woro Mungu kende kende pilembe Mungu umiyo ire mugisa man egwoke. Sitani medo nia tek jumayu piny ceke ma Yob ubino ko ci, ecopo cayu Mungu.

Mungu ugam uweko Sitani unego lim man awiya pa Yob, man i ng’eye egoye ku twoyo. Calu ma Yob ung’eyo ngo nia Sitani re m’ubino kelo peko maeno i kume, enyang’ ungo nyanok de nia pirang’o Mungu uweko ekadhi i amulaic maeno zoo. Re asu, Yob ucayu ngo Mungu.

Jurimo ma reco adek gibino i bang’ Yob. I wec m’ucwiny acwinya m’upong’o mbaya ma dupa mi buku pa Yob, dhanu maeno gipimo nicung’o Yob uyii lembe mi vupo ma nia Mungu re m’ubino miyo ire matira pi dubo moko m’etimo i amung’. Giyero bende nia Mungu copo foyo nyanok de ngo ku jurutic pare man nia egenogi de ngo. Yob ukwero paru migi ma reco eno cen. Ku tegocwiny, Yob uyero nia ebigwoko bedoleng’ pare cil i tho!

Ento Yob utimo kosa mi cero bang’e gire. Aradu moko ma nyinge Elihu, m’ubino winjo wec migi ceke, umaku wec pi nitiro paru pa Yob man mi jurimbe zoo. Elihu ujuko Yob kum Yob uyiyo ngo nia cero ba dito pa Yehova Mungu pire tek nisagu cero ba ng’atu moko ci mange. Elihu ujuko bende ku rac jurimo ma reco pa Yob.

E i ng’eye, Mungu uweco i bang’ Yob pi nitiro paru pare. Yehova utelo nen pa Yob i wi giracwiya pare ma wang’u ijo, man enyutho kamaleng’ ni Yob kite ma dhanu nok ko i wang’ Mungu. Ku jwigiri, Yob ujolo juk maeno ma Mungu juke ko. Calu Yehova tie “jamer lee man e jakisa,” ekeyo kum Yob, emiye lim m’ebino ko wang’ ario man emiyo ire mugisa m’edok enwang’u ko awiya apar. (Yakobo 5:11) Kinde m’egwoko bedoleng’ pare ni Yehova i saa mir amulaic, Yob unyutho kamaleng’ nia adote ma rac pa Sitani ma nia ng’atu acel de mbe ma copo gwoko bedoleng’ pare ni Mungu i saa mir amulaic utie vupo.

​—Ejengere i wi buku pa Yob.