PONJI MI 21

Bethel tie ang’o?

Jumulembe pa Yehova ario ubetimo tic i biro mi kubo cal mi Bethel — Ot m’ucungo iwi tic mi kubo cal, Etats-unis

Jamulembe pa Yehova acel i ot mi wodho buku i Allemagne — Allemagne

Jamulembe pa Yehova acel i ot mi lwoko bongu mi Kenya — Kenya

Jurutic mi mafika ubeyiko meza i die ot ma jucamu i ie i Colombie — Colombie

Bethel tie nying mi dhu Juebrania ma thelembe ne tie “Ot pa Mungu.” (Thangambere 28:17, 19) Eno tie nying m’uromo andha nia julwong’ kudo udi ma tung’ tung’ ma Jumulembe pa Yehova gigiero i ng’om zoo, kakare ma jutelo ie wi tic mi rweyo lembanyong’a. Guriri m’utelowic timo tic i kabedo ne madit m’uloyo zoo ing’om. Kabedo maeno nwang’ere i New York, ing’om mir Amerika. Niai kud i kabedo ma dit akeca eno re ma guriri m’utelowic neno wi tic ma tung’ tung’ m’ubetimere i biro mi filial ma nwang’ere i ng’om ma pol. Dhanu ma timo tic i kabedo ma tung’ tung’ ma eno julwong’ogi juruot mi Bethel; julwong’ogi kumeno pilembe gikwo man gitimo tic karacelo, gicamu karacelo man giponjo Biblia karacelo i acel.—Zaburi 133:1.

Bethel utie kakare ma segi ma juruot mi ie gimiiri gigi. I Bethel ceke, junwang’u co ku mon ma Jukristo ma gimiiri gigi pi nitimo yeny pa Mungu man niketho tic mi Ker ucidh i wang’e i saa ceke. (Matayo 6:33) Juculogi ngo acula, ento gin ceke jumio igi cam, kavuto, man sente ma nyanok kara ukonygi nipong’o yeny migi ma thindo thindo. I bethel, ng’atuman utie ku tic; jumoko timo i biro, jumange tedo cam, jukurucel ke timo i kusika ma tung’ tung’ ma juvuto i ie. Jumoko timo kakare ma juwodho ie buku, kakare mi lwoko bongu ku nigome, mi yiko jambtic m’unyothre, ku tic mange ma tung’ tung’.

I Bethel jutimo tic lee mandha pi nikonyo tic mi rweyo lembanyong’a. Thelembe mi kwong’o mi bedonuti mi bethel utie nia dhanu dupa akeca uponj lembe mandha mi Biblia. Wamak lapor mi nyathibuku maeni: ekiewere i the telowic pa Guriri m’Utelowic, ing’eye jugam juore kud Internet ibang’ ungu ma tung’ tung’ mi julok dhok i ng’om zoo. I ng’eye juwodhe niai kud i macin ma wodho karatasi pio pio akeca i Bethel. Tokcen, jugam juore i cokri ma kadhu 110 000 i ng’om zoo. Tic ceke maeni ma juruot mi Bethel timo utie ku thelembe mi tielo kum tic m’ukwayu jutim piopio ni kadhu tic mange ceke, niwacu, tic mi rweyo lembanyong’a.—Marko 13:10.

Jukani ma timo tic i Bethel man ke gikwo nenedi?
Tic ma kani ma timere i Bethel man ke gitie ku thelembe ma kani?