Jengiri iwi Mungu kara gamiri peri bed kud anyong’a

Yehovaa Mungu re m’ucaku the gamiri ma kwong’a. Biblia yero iwa nia ecwio dhaku ma kwong’a man “ekele i ba ng’atuca [nico].” Anyong’a nego Adamu lee dit akeca, uketho eyero kumae: “Maeni cogo mi cogona, man ring’o mi ring’ kuma.” (Thangambere 2:22, 23) Tin bende, Yehova umedere asu nimito nia dhanu m’ugamiri gibed kud anyong’a.

Kinde m’igamu dhaku kunoke igiero, icopo niparu nia lembe ceke bibedo miero akeca. Ento, i andha, kadok nico man dhaku ma gimariri lee de, gicopo nwang’iri ku peko moko. (1 Jukorinto 7:28) I nyathibuku maeni, ibinwang’u juk moko mi Biblia ma copo ketho gamiri man ot peri ubed kud anyong’a, tek ilubo jukne.​—Zaburi 19:8-11.

1 GIN MA YEHOVA UKWAYU IBANG’ NG’ATUMAN I GAMIRI

LEMBE MA BIBLIA YERO: Cwar dhaku en e wic mi ot.​—Juefeso 5:23.

Kan itie nico, Yehova ukwayu nia idieng’ pi dhaku peri, ikimbe akimba. (1 Petro 3:7) Ecwio dhaku ubed ni jakony peri, pieno emito nia ikwo kude ku mer man iyunge ayunga. (Thangambere 2:18) Icikiri nimaru dhaku peri lee, m’ibed ko ayika nipong’o yeny pare iwang’ yeny peri.​—Juefeso 5:25-29.

Kan itie dhaku, Yehova mito nia ibed ku woro ma thuth ibang’ nico peri. (1 Jukorinto 11:3; Juefeso 5:33) Dik cingi i kum yub ma nico peri maku man winjiri kude kud adundeni ceke. (Jukolosai 3:18) Kan itimo kumeno, ibibedo leng’ iwang’ nico peri man iwang’ Yehova.​—1 Petro 3:1-6.

LEMBE M’ICOPO TIMO:

• Penji jadhogi mi gamiri nia icopo nitimo ang’o kara ibed nico kunoke dhaku maber akeca. Winje cu, man tim gin ma icopo kara lembe ubed maber

• Bed ku cirocir kum ebikwayu nindo lee pi niponjo ng’eyo kite ma ng’atuman mi kindwu copo ninyayu anyong’a i wadi

2 DIENG’ CU MANDHA IKUM KITE MA JADHOGI MI GAMIRI WINJERE KO

LEMBE MA BIBLIA YERO: Ukwayu isai ning’eyo yeny pa jadhogi mi gamiri. (Jufilipi 2:3, 4) Kwo ku nico kunoke dhaku peri ni ng’atu ma pire tek; poi nia Yehova ubekwayu jurutic pare gibed ‘ber ku dhanu ceke.’ (2 Timoteo 2:24) ‘Wec ma vur vur e calu cob mi palamularu, ento leb ng’atu ma riek en e leng’kum.’ Pieno, lond wec m’ibiyero alonda. (Lembrieko 12:18) Tipo maleng’ pa Yehova bikonyi kara iwec lembe m’umaku piny man mi mer.​—Jugalatia 5:22, 23; Jukolosai 4:6.

LEMBE M’ICOPO TIMO:

• Iwang’ niweco karacelo ku jadhogi mi gamiri iwi lembe ma tek ma copo niwok, kwai Mungu ukonyi ikwi kumi man iwec thwolo thwolo

• Kelar ipar cu mandha lembe ma ibiyero man kite ma ibiyere ko

3 WUDIK DHU PARU

LEMBE MA BIBLIA YERO: Kinde ma igamu dhaku kunoke igiero, wun ario wudoko ni “kum acel.” (Matayo 19:5) Ento fodi asu wutie dhanu ario ma tung’ tung’ man wucopo bedo ku paru ma tung’ tung’. Pieno, ukwayu wuponj nidiko dhu paru man nibedo ku cwiny m’uripo acel. (Jufilipi 2:2) Pire tie tek nibedo i acel kinde m’ubemaku yub. Biblia yero kumae: “Lembakeca kubang’e kubang’e cungo ku lembapora.” (Lembrieko 20:18) Wuwek Biblia utel wiwu kinde ma wubemaku karacelo yub ma pigi tek.​—Lembrieko 8:32, 33.

LEMBE M’ICOPO TIMO:

• Kan ibeweco ku won ot kunoke min ot peri, kud iyer ire kende kende lembang’eya kunoke paru peri, ento nyuth ire kite ma ibewinjiri ko

• Iwang’ nimaku yub moko, kelar ipenj paru pa min ot kunoke won ot peri