THENGE MIR 2
Bed ku jadhogi mi gamiri m’umbe awondi
“Gin ma Mungu ribo karacelo dong’ dhanu kud upok kindgi.”—Marko 10:9
Kara Yehova ujolwa, ukwayu wabed ‘m’umbe awondi’ ni jadhogwa mi gamiri. (Malaki 2:16) Eno tie lembe ma pire tek akeca i gamiri peri, pilembe kan awondi [kunoke umbili] utie, geniri bedo mbe. Geniri ke utie lembe ma pire tek kara mer mwu ubed tek.
I nindo ma wakwo i ie eni, dhanu mapol gitie kud umbili i gamiri migi. Pi nigwoko gamiri peri, ukwayu imediri nitimo lembe ario mae.
1 KETH GAMIRI PERI I KABEDO MA KWONG’A I KWO
LEMBE MA BIBLIA YERO: Wuwoth “calu ju ma jurieko ngo ngo, endre calu jurieko.” (Juefeso 5:15, 16) Etie lembe mi rieko, nineno gamiri peri ni gin ma pire tek akeca i kwo peri. Gamiri ne cikere nibedo i kabedo ma kwong’a i kwo.
Yehova bemito nia imiiri zoo ni jadhogi mi gamiri man ‘ibed ku mutoro i kwo’ karacelo kude. (Eklizia 9:9) Eyero kamaleng’ nia ukwayu ngo wii wil nyanok de ku jadhogi mi gamiri, ento, wun ario ceke ng’atuman ucikere nisayu yo mi ketho jadhoge ubed ku mutoro. (1 Jukorinto 10:24) Keth jadhogi mi gamiri uwinjere i kume nia pire tie tek iri, man nia enyeng’i lee.
LEMBE M’ICOPO TIMO:
Tim kero kubang’ nindo nitimo saa karacelo kude, keth paru peri zoo ucungi iwiye kende
Bed iyer “wan” kakare niyero “an”
2 GWOK ADUNDENI
LEMBE MA BIBLIA YERO: “Ku ba dhanu nzu m’uneno dhaku kud awanya ma rac i kume nwang’u edaru giero gier kude ku yo i adunde.” (Matayo 5:28) Ka ng’atu moko umedere niparu iwi lemb sasa, i ayi moko ng’atuca caku niwondo jadhoge mi gamiri.
Yehova yero nia ukwayu ‘igwok adundeni.’ (Lembrieko 4:23; Yeremia 17:9) Pieno, ukwayu igwok weng’i. (Matayo 5:29, 30) Lub lapor pa jadwong’ Yob, m’utimo lembariba ku wang’e nia ebineno ngo kadok nyanok de dhaku mange. (Yob 31:1) Tim lembariba ku weng’i nia ibineno ngo pornografi (cal ma nyutho tarwang’) nyanok de. Bende keth i kwo peri nia ibiuro magwei wec man timo ceke mi mer ku ng’atu moko m’utie ngo jadhogi mi gamiri.
LEMBE M’ICOPO TIMO:
Keth dhanu mange unen kamaleng’ kamaleng’ nia imoko cu mandha ikum jadhogi mi gamiri kende
Dieng’ cu nia jadhogi mi gamiri winjere nenedi man wek ndhundhu mer moko ci ma copo nifoyo ngo i dhaku kunoke i won ot peri