Kite ma jucopo niyiko ko lembe

I kwo mwu ma karacelo ku jadhogi mi gamiri, lembe ma tung’ tung’ copo niwok i kindwu. Lembene copo wok pilembe paru mwu, kite ma ng’atuman bewinjere ko, man nen mwu iwi kwo ukoc. Lembe copo niai bende woko mi gamiri kunoke copo bedo lembe ma wok rek.

Ecopo nibedo tek niyiko lembe mi kindjo, ento Biblia ubemio iwa juk nia wanyeg anyega ku lembe mi kindwa. (Matayo 5:23, 24) Wucopo niyiko lembe mi kindwu nwang’u wubelubo juk mi Biblia.

WUWEC IWI LEMBENE

LEMBE MA BIBLIA YERO: “Gin ceke bedo ku nindone . . . nindo mi weco.” (Eklizia 3:1, 7) Nen nia inwang’u saa mi weco iwi lembe mi kindwu. Nyuth cu ni jadhogi mi gamiri kite m’ibewinjiri ko man paru peri iwi lembe m’utie. Kubang’ ceng’ ‘wec lemandha’ ni jadhogi mi gamiri. (Juefeso 4:25) Kadok wubeweco iwi lembe macopo nithung’ojo ku ng’ecwiny de, tim kero dwendi kud ucidhi bor. Dwokolembe ma yoo copo ketho wec kud undendere udok ni dhau.​—Lembrieko 15:4; 26:20.

Kadok itie ku paru matung’ de, mediri nibedo ku wec ma mol, wii kud uwil ninyutho mer man woro ni jadhogi mi gamiri. (Jukolosai 4:6) Tek ecopere, tim kero niyiko lembene m’umbe galu, man wuwek nilinguru.​—Juefeso 4:26.

LEMBE M’ICOPO TIMO:

• Nwang’ saa m’ukwayere pi niweco iwi lembe mi kindwu

• Ka jadhogi mi gamiri re m’ubeweco, tim kero niwinje, kud ing’ol dhoge. Saa peri mi wec biromo

2 WINJI MAN NYANG’

LEMBE MA BIBLIA YERO: “Wumeru ku ber ng’atuman ku wadi man ku wadi; i lembe mi yung dong’ ng’atuman uting’ wadi ma sagu en.” (Jurumi 12:10) Pire tie tek akeca niwinjo cu jadhogi mi gamiri. Tim kero niwinjo paru pare ku ‘pidoic ma calacel . . . man ma mol.’ (1 Petro 3:8; Yakobo 1:19) Kud ipar apara nia iwinje. Tek ecopere, kewek gin ma ibetimo man keth nen peri zoo ibang’ jadhogi mi gamiri, kunoke penje tek ecopo yiyo wuwec iwi lembene ing’eye. Kan ibeneno jadhogi mi gamiri ni jaratic wedu, ento ungo ni jakwor peri, “ng’ecwiny bimeki ngo vur vur.”​—Eklizia 7:9.

LEMBE M’ICOPO TIMO:

• Keth cwinyi cu pi niwinjo, kadok lembene ubenyeng’i ngo de

• Ka jadhogi mi gamiri uyero lembe moko, pim ninyang’ nia emito niyero ang’o i andha. Nyang’ i paru pare kadok eweco ku dwande kunoke ngo

3 WUTIM KITE M’UWECO KO

LEMBE MA BIBLIA YERO: “Kuloka nuti i tic mi muli ceke; ento wec mi dendhok tundo kum canpiny kende.” (Lembrieko 14:23) Winjiri kende kende iwi lembe moko uromo ngo. Ukwayu wun ario ceke wuketh lembe ma wuwinjuru iwiyene i timo. Ecopo bedo tek, ento timo kumeno kelo matoke maber. (Lembrieko 10:4) Ka wuii karacelo i winjiri maber, wubinwang’u “sukulia maber” kum tic mwu ma tek.​—Eklizia 4:9.

LEMBE M’ICOPO TIMO:

• Wuwinjuru karacelo nia ng’atuman bitimo ang’o pi niyiko lembe mi kindwu

• Wang’ acel acel wubed wuwec iwi alokaloka m’udaru nitimo