Maria utie ku iye ma fodi egiero ngo

Maria udoko ku ic mi dwi ang’wen. Poi nia elar etimo dwi moko ma fodi iye nen ungo, kinde m’ecidho niliewo wat pare Elisabeti i Yahudi adhura ma yo piny, adhura mi gudi. Re kawoni Maria udaru nidwogo i pacu pagi i Nazareti. Dhanu ceke bineno nia iye nuti. Kepar kite ma lembene copo nipido ko cwinye!

Lembe marac utie nia, Maria dong’ utie ku jalawobi pare ma jagob bau, ma nyinge Yosefu. Man eng’eyo bende nia nimakere ku Cik ma Mungu umio ni nyithindho mir Israel, ka nyaku moko ma jubegamu utimo ribiri akakaka ku ng’atu mange, jucikiri nicanye ku kidi nitundo etho. (Poi mi Cik 22:23, 24) Pieno, kadok Maria ubino ngo won tarwang’ de, ecicopere nia cwinye ubino nidieng’ iwi ayi m’ecopo koro ko lembe mi ic m’etie ko ni Yosefu, man pi lembe ma biwok.

Calu ma Maria utimo dwi adek ka mange, wacopo yero nia Yosefu ubino kud ava mi nene. Kinde ma girombo, ecicopere nia Maria ukoro ire pi lembe m’etie ko, etimo kero nikoro ire nia ic m’etie ko utie nikadhu kud i tipo ma leng’ pa Mungu. Kan iparu pi lembe maeno, inwang’u nia etie tek mandha ni Yosefu ninyang’ man niyio lembene.

Yosefu ung’eyo nia Maria tie nyaku maber man bende kura pare leng’. Man emare lee mandha. Re kadok Maria ukoro ire lembe cuu de, ecicopere nia fodi asu Yosefu uparu nia egamu ie ku jal moko. Yosefu ubemito ngo jucanye ku kidi kunoke junyai lewic i wie i wang’ dhanu; pieno eparu nia ukwayu gilal gamiri migi ma dhanu kud ung’ei. I saa maeca, lembang’ola ma nico ku nyaku gitimo i kindgi pi gamiri ubino ve gam ma zoo, man ka gibelale, ukwayu gilale ve ju m’ugamiri.

Ing’eye, Yosefu ucidh uvuto kinde ma fodi ebenyamu i lembe maeno. E malaika pa Yehova ubino ire i lek man eyero ire kumae: ‘Lworo kud unegi nigamu [Maria] ma dhaku peri i beng’i: kum maeno m’egamu i ie en e pa tipo maleng’. Man ebinyolo nyathin ma nico; e ibilwong’o nyinge Yesu; kum en e ng’atu ma bilaru dhanu pare kud i dubo migi.’​—Matayo 1:20, 21.

Kinde ma Yosefu ucew, ebedo kud anyong’a madit pilembe enyang’ ikum lembe m’ubino nisendo wie! Egalu ngo nitimo lembe ma malaika uyero ire. E egamu Maria udwogo i ot pare. Eno tie lembe m’utimere iwang’ dhanu zoo, man m’unyutho nia Yosefu ku Maria dong’ gigamiri andha. Re kadok gigamiri de, Yosefu utimo ngo ribiri ku Maria pi saa ceke m’ebino ie ku ic pa Yesu.

Ing’ei dwi moko, Yosefu ku Maria ma dong’ ie uteng’ini lee, ukwayu gicok wotho kud i Nazareti pacu migi, gicidh ka mange. Gibicidho kakani ma dong’ Maria ke udhingo nigonyere e?