Giboth kud i cing ubimo marac

Yosefu ucewo Maria pi nikoro ire lembe ma gicikiri nitimo pio pio. Malaika pa Yehova uwok ire i lek man ewacu kumae: “Ai malu iting’ nyathin ma nok ku min mire, man iring i Misiri, ibed kuca de ka fok’ayero iri ngo: kum Herode biyenyo nyathin ma nok maeno [kara enege].”​—Matayo 2:13.

E ndhu ndhu nica, Yosefu giku Maria man nyathin migi giringo ku diewor. Giringo tap i saa m’ukwayere, pilembe Herode unyang’ nia jururieko giwonde. Kum elar eyero igi nia gidwog giyer ire. Ento gidok i ng’om migi m’umbe nidok i bang’e. Kwinyo uthung’o Herode. Calu m’emito asu eneg Yesu, emio cik nia juneg awiya ma co ceke mi Bethlehem, mi oro ario niloro piny. Ekwanu oro maeno nimakere ku lembe m’elar ewinjo i bang’ jururieko m’uai yo nyangu.

Nek mir awiya maeno ubino lembe mi can mandha! Wang’eyo ngo nia junego awiya adi, ento ywak matek man nduru ma meg awiyane gigoyo pi lemcan m’uwok ikumgi, upong’o lembila mi Biblia ma jabila Yeremia ular uewo.​—Yeremia 31:15.

Lembe maeno unwang’u dong’ Yosefu ku Maria man nyathin migi giringo i Misiri, man gimediri asu nikwo kuca. I ng’eye ku diewor moko, malaika pa Yehova uwok kendo i lek ni Yosefu, ewacu kumae: “Ai malu iting’ nyathin ma nok ku min mire de, man idok i ng’om Israel: kum ju m’uyenyo gineg nyathin ma nok githo.” (Matayo 2:20) E Yosefu unwang’u nia saa uromo ma juruot pare copo nidok ko i ng’om thugi. Lembe maeno upong’o lembila mi Biblia m’uwacu nia Mungu ulwong’o Wode kud i Misiri.​—Hoseya 11:1.

Ecicopere nia Yosefu umito nia juruot pare gidok gibed i Yahudi, ceng’ini kud adhura mi Bethlehem, kaka ma gibino nikwo i ie ma fodi giringo ngo i Misiri. Re ewinjo nia Arkelao jabim marac ma wod Herode re m’utie ubimo mi Yahudi. Mungu upoye kendo i lek ikum ariti ma ni iwang’gi. Pieno Yosefu ku juruot pare gidok gibedo yo malu i adhura mi Nazareti i ng’om Galilaya, ma tie bor ku Yerusalem. I ng’om maeno re ma Yesu udongo i ie. Eno upong’o lembila mange m’uwacu kumae: “Jubilwong’e Janazareti.”​—Matayo 2:23.