Yehova ugwoko Yesu

Yo nyangu mi ng’om mir Israel, dhanu moko ubino nuti ma giyiyo nia cero kunoke nyikaluku romo telo wigi. E i diewor acel, dhanu moko ma yo Nyangu gineno piny moko m’ubedo ve cero uberieny i kor polo, man gilubo toke. “Cero” maeno utelo wigi nitundo i Yeruzalem. E gicaku penjo dhanu kumae: ‘Nyathin ma bibedo ubimo mi Juyahudi ni kani? Wabino kara warwo ire.’

Kinde m’Herode m’ubimo mi Yeruzalem uwinjo pir ubimo ma nyen, cwinye dieng’ dit. E epenjo judongo mi julam kumae: ‘Ubimo maeni ucikere ninyolere kani?’ Gidwoko ire kumae: ‘Jubila giyero nia ebinyolere i Bethlehem.’ E Herode ulwong’o dhanu maeno m’uai yo Nyangu man eyero igi kumae: ‘Wucidhi i Bethlehem man wunwang’ kaka ma nyathinne n’i iye. I ng’eye, wudwogi man wunyuth ira kaka ma en’i iye. An bende abemito acidh awore.’ Ento eno ubino ndra.

E “cero” ugam ucaku woth kendo. Dhanune gilubo toke nitundo i Bethlehem. “Cero” ubin ucungo tap atira iwi ot moko man dhanu maeno gigam gimondo i ode. Ginwang’u Yesu karacelo ku min ma Maria. Girum pi nirwo ni nyathinne man gimiyo ire giramiya mi mola ma kwar, kud udok ma ng’wice ng’ar man moo de ma ng’wice ng’ar. Nyo andha Yehova re m’uoro dhanu maeno gicidh ginwang’ kaka Yesu? Ungo.

Uthieno nica, Yehova uyero ni Yozefu ku wang’ lek kumae: ‘Herode ubemito eneg Yesu. Ting’ dhaku peri giku wodi man wuringi i Misiri. Wubed kuca nitundo m’abiyero nia wudwogi.’ E ndhu ndhu nica, Yozefu ku juruot pare giringo i Misiri.

Yehova ugam uyero ni dhanu ma giai yo Nyangu nia kud gidok yor i bang’ Herode. Kinde m’Herode unyang’ nia gibedwogo ngo, ng’eicwiny umake lee dit. Calu m’eromo nwang’u ngo kaka Yesu, eng’olo nia juneg awiya ceke mi Bethlehem ma oro migi rom ku pa Yesu. Ento Yesu ubedo agwoka bor i Misiri.

I ng’eye, Herode ugam utho. Yehova uyero ni Yozefu kumae: ‘Kawoni dong’ wucopo dok.’ Yozefu, Maria man Yesu gigam gidok i Israel, e gigiero ot migi i adhura mi Nazarethi.