Mungu ucwiyo nico ku dhaku ma kwong’a

Yehova uyiko podho moko ma ber i kabedo ma julwong’o Eden. Podhone ubino ku thiwe, yen man lei dupa i iye. Mungu ugam ucwiyo Adamu ma tie nico ma kwong’a kud utur mi ng’om man ekudho lietho i ume. Nyo ing’eyo lembe m’udok utimere? Nicone udoko kwo! Yehova uwacu nia Adamu ugwok podho mir Eden, man ecak nying’ lei.

Yehova umiyo cik moko ma pire tek lee ni Adamu. Eyero ire kumae: ‘Icopo camu nying’ yen mange ceke, ento kud icam kum nying’ yen acel kende. Pilembe tek icame ibitho.’

I ng’eye Yehova uwacu kumae: ‘Abitimo jakony ni Adamu.’ E eketho nindo ma pek umaku Adamu, man ewodho wel ng’ete acel ecwiyo ko dhaku ni Adamu. Nying’ dhakune ubino Eva. Adamu giku Eva re ma gibino juruot ma kwong’a. Adamu uyero ang’o saa ma Mungu umiyo ire dhaku? Anyong’a unege lee mandha, man eyero kumae: ‘Kenen ng’atu ma Mungu ucwiyo ku wel ng’eta e! E ve an.’

Yehova uyero nia Adamu giku Eva ginyol awiya man gipong’ ng’om. Emito nia gitim tic karacelo pi niketho ng’om zoo udok ni paradizo, niwacu kabedo ma leng’ mandha calu podho mir Eden. Re lembe ugam uwotho ngo ve ma Mungu umito. Pirang’o? Ponji m’ulubo binyutho iwa.