Yehova umiyo tego ni Samson

Juisrael ma pol gicaku woro ayi gin m’acwiya kendo, e Yehova uwenjogi i cing’ Jufilisti. Ento Juisrael moko ubino nuti ma gimaru Yehova. Acel m’i kindgi ubino Manoa. Manoa giku min ot pare gibino mbe kud awiya. Nindo moko, Yehova uoro malaika pare i bang’ dhaku pa Manoa. Malaikane uyero ire kumae: ‘Ibinyolo nyathin ma nico. Ebibodho nyithindho mir Israel kud i cing’ Jufilisti. Nyathinne bibedo Janaziri.’ Nyo ing’eyo nia Junaziri gibino jukani? Gibino jutic ma segi pa Yehova. Junaziri gibed ginyaru ngo yuk wigi.

I ng’eye, nyathinne unyolere man Manoa ucaku nyinge Samson. Kinde ma Samson ubedongo, Yehova umiyo ire tego ma lee mandha. Ebino ku copo mi nego umvor ku cinge. Nindo acel, Samson unego Jufilisti 30 zoo eni kende. Jufilisti gigam gidage lee, man gicaku sayu ayi ma gicopo nege ko. Nindo moko kud uthieno, saa ma Samson ubenindo i adhura mi Gaza, Jufilisti gibino i dhugang’ mir adhurane pi nikure kara ginege kugweno. Ento ku diewor ma ling’, Samson ucidho i dhugang’ mir adhura, man emugo dhugola gang’ne cen. Ebielo dhugolane iwi goke man ewotho kude nitundo iwi got moko ceng’ini kud Hebron.

I ng’eye, Jufilisti gicidho i bang’ Delila ma tie nyaku ma Samson umito gamu, man giwacu ire kumae: ‘Kan ibidhe enyutho iri gin m’uketho etie ku tego, wabimiyo iri sente mi mola ma tar elufu abic ku dak abic. Wamito wamake man wabole i kol.’ Calu Delila umaru sente, eyiyo lembe maeno. Ku kwong’a, Samson ukwero ninyutho ire nia pirang’o etie ku tego ma lee. Ento erere asu nitundo etuco ire lembe mi cwinye. Samson uyero ire kumae: ‘Niai con junyaru ngo yuk wiya pilembe atie Janaziri. Ka junyaru yuk wiya ci, tego para bithum.’ M’umbe jiji, Samson utimo kosa ma lee dit nituco ire lembe mi cwinye.

Ndhu ndhu eca, Delila uyero ni Jufilisti kumae: ‘Ang’eyo gin m’uketho etie ku tego!’ Eketho Samson unindo iwi bambe, man ekwayu ng’atu moko unyar yuk wiye. Saa ma junyaru yuk wi Samson uthum, Delila ukok kumae: ‘Samson, Jufilisti gicoro i wii!’ E Samson uai malu, ento nwang’u dong’ tego pare uweke. Jufilisti gimake, giloyo wang’e man gibole i kol.

Nindo acel, Jufilisti elufu swa gicokiri i hekalu pa Dagon ma tie mungu m’araga migi, man gikok kumae: ‘Mungu mwa umiyo Samson i cingwa! Wucigam Samson kud i kol! Wukele ebin esemb iwa sosi.’ Giketho ecungo i kind mbegi ario mi ot, man ginyware. Samson ukwayu Yehova kumae: ‘E Yehova, akweyi, mii ira tego kendo wang’ acel maeni kende.’ Saa maeno nwang’u yuk wi Samson udongo. Ecwalu mbegi mir hekalu ku tego pare zoo, e hekalune urwombere; dhanu ceke m’ubino i iye githo man Samson de utho.