Yehova ugwoko Yehocafath

Yehocafath m’ubimo mi Yuda unyotho pemlam pa Baal man ayi gin m’acwiya ceke kud i ng’om mi Yuda. Ebino yenyo nia dhanu ging’ey cik pa Yehova. Pieno, eoro judongo ma wijo ku Julawi giponj dhanu mi Yuda ceke ku cik pa Yehova.

Thek m’utwodo Yuda gibino ku lworo mi kiedo lwiny i dhu dhanu mi Yuda, pilembe ging’eyo nia Yehova ni karacelo kugi. Gibed gitero kadok giramiya ni ubimo Yehocafath. Ento nindo moko, nyithindho mi Moab, mir Amon man dhanu m’uai i ng’om mi Seir gibino pi nikiedo lwiny i dhu nyithindho mi Yuda. Yehocafath ugam ung’eyo nia etie ku yeny mi kony pa Yehova. E ecoko dhu jumaco, jumamon man awiya ceke karacelo i Yeruzalem. Ecungo i wang’gi man ekwayu Yehova kumae: ‘Yehova, m’umbe in, wacopo loyo ngo lwiny maeni. Ka copere, nyuth iwa lembe m’ukwayu watim.’

Yehova udwoko wang’ rwo pare kumae: ‘Lworo kud unegwu. Abikonyowu. Wucung kakewu, wucung ling’ man wunen ayi m’abibodho kowu.’ Yehova ubodhogi nenedi?

Urwonde kugweno, Yehocafath ung’iyo juruwer moko man eyero igi nia giwoth i wang’ juaskari. Giwotho niai i Yeruzalem nitundo i Tekoa kaka ma gibikiedo i iye lwiny.

Kinde ma juruwer maeno gibewer ku dwandgi ma tek pi nipaku Yehova, Yehova ukiedo pi dhanu pare: Ejebo wi nyithindho mir Amon man mi Moab. Pieno, gicaku negiri i kindgi man ng’atu moko acel de mbe m’uboth kud i kindgi. Ento Yehova ubodho nyithindho mi Yuda, juaskari man julam. Thek ceke mi ng’om m’utwodo Yuda giwinjo lembe ma Yehova utimo, e ginyang’ nia Yehova ubemedere asu nigwoko dhanu pare. Yehova bodho jutic pare i ayi ma nenedi? Ebodhogi i ayi ma tung’ tung’. Re pi nibodhogi, embe ku yeny mi kony pa dhanu.