Yosiya umaru Cik pa Mungu

Yosiya udoko ubimo mi Yuda kinde m’ebino ku oro abora. I saa maeno, dhanu gimondo i timo mir ajoga man gibed giworo ayi gin m’acwiya. Kinde ma Yosiya udoko ku oro 16, ecaku ponjo ning’eyo ayi m’atira m’ecopo woro ko Yehova. Saa m’edoko ku oro 20, ecaku nyotho ayi gin m’acwiya man pemlam mi mungu m’araga ceke kud i ng’om Yuda. Man kinde m’edoko ku oro 26, emaku yub kara juyik hekalu pa Yehova.

Hilkia ma Jalam ma dit unwang’u kithabu moko m’adola mi Cik pa Yehova i hekalu; copere nia ebino kithabu m’adola ma Musa ugam ugoro en. E Cafan ma jagor p’ubimo ukelo kithabu m’adolane i bang’ Yosiya man ecaku somo ire Cik m’i iye ku dwande ma tek. Kinde ma Yosiya uwinjo lembe m’i Cikne, enyang’ nia dhanu udaru weko niworo Cik pa Yehova pi oro ma dupa. Ubimo Yosiya uyero ni Hilkia kumae: ‘Yehova tie ku ng’eicwiny lee i kumwa. Wucidh wupenje kara enyuth iwa gin ma wacikara nitimo.’ Nikadhu kud i bang’ jabila moko ma dhaku ma nyinge Hulda, Yehova udwoko ire kumae: ‘Dhanu mi Yuda giweka. Abimiyo igi matira, ento abimiye ngo i saa mi bimobim pa Yosiya, pilembe ejwigere.’

Kinde m’ubimo Yosiya uwinjo lembe maeno, ecidho i hekalu man ecoko dhu dhanu mi Yuda karacelo. E esomo Cik pa Yehova ku dwande ma tek ni dhanu mi Yuda. Yosiya man dhanu ceke ging’olo nia gibiworo Yehova kud adundegi zoo.

Nwang’u dong’ dhanu mi Yuda gitimo ngo Kadhukuwijo pi oro ma dupa. Ento kinde ma Yosiya usomo i kithabu mi Cik nia jucikiri nitimo Kadhukuwijo kubang’ oro, eyero ni dhanu kumae: ‘Wabitimo Kadhukuwijo ni Yehova.’ Yosiya ugam uyikere pi nithiero lam ma tung’ tung’ man epangu bende ungu mi juruwer pi niwer i hekalu. E dhanu gitimo Kadhukuwijo, man i ng’eye gitimo Foc mi kwen ma thobi mbe i iye pi nindo abiro. Niai i kum jabila Samwel, nwang’u fodi jutimo ngo Kadhukuwijo ma kumeca. Yosiya umaru Cik pa Yehova andhandha. Nyo in de ibed imaru niponjo lembe iwi Yehova?