Yehova uoro Yeremia ucidh urwey

Yehova ugam ung’iyo Yeremia kara ebed jabila ni dhanu mi Yuda. Eng’olo ire nia erwey ni dhanu man emii igi cimowang’ ma nia kwayu giwek lembe ma reco ma gibetimo. Yeremia udwoko ire kumae: ‘E Yehova, an a nyathin. Ang’eyo ngo kite m’aromo weco ko ku dhanu.’ Yehova uyero ire kumae: ‘Lworo kud unegi. Abinyutho iri lembe m’ibiyero. Abikonyi.’

Yehova uyero ni Yeremia nia ecok judongo mi dhanu, erung agulu mir ulobo i wang’gi man ewac kumae: ‘Jubirungo Yeruzalem de kumeni.’ Kinde ma Yeremia utimo lembe ma Yehova uyero, kwinyo uopo i judongo. E jalam ma nyinge Pacur ugoyo Yeremia man eroyo tiende ku cinge i bau mi twiyo dhanu. Diewor traka, Yeremia romo yiko kume ngo nyanok de. Urwonde kugweno Pacur ugonye. Yeremia uyero kumae: ‘Abiromo ngo. Abejigo magwei nirweyo.’ Ento nyo andha cwinye utur? Ungo. Kinde ma Yeremia uparu pi lembene kendo, ewacu kumae: ‘Lembe pa Yehova ubedo calu mac yor i iya. Acopo weko ki ngo nirweyo.’ Yeremia umedere asu nimiyo cimowang’ ni dhanu.

I ng’ey oro moko, ubimo ma nyen ucaku bimo i Yuda. Julam man jubila mi ndra gigam gidagu lemkwenda ma Yeremia ubino twong’o. Giyero kumae ni judongo ma wijo: ‘Ng’atuni uromo ku tho.’ Yeremia udwoko igi kumae: ‘Tek wunega, nwang’u wunego ng’atu m’ukoso ngo. Kum abeyero lembe pa Yehova ento para gira ngo’. Kinde ma judongo ma wijo giwinjo lembuni, giyero kumae: ‘Ng’atuni uromo ngo ku tho.’

Yeremia umedere asu nirweyo, e kwinyo uopo ma rac i judongo ma wijo, uketho gikwayu nia ubimo uneg Yeremia cen. Ubimo wacu igi nia giromo timo gin moko ci ma gimaru i kum Yeremia. E gimaku Yeremia man gibole i vur ma thuc m’usabu n’i iye man gigeno nia eromo tho kuca. Yeremia ucaku mwony i usabu.

Jatic moko mi kal ma nyinge Ebed-melek uyero ni ubimo kumae: ‘Judongo ma wijo gibolo Yeremia i vur! Ka waweke keca ci, ebitho.’ Ubimo ung’olo ni Ebed-melek nia eting’ jumaco 30 ecidh kugi man gicidh giwodh Yeremia kud i vur. Wan de wacikara nibedo calu Yeremia m’uweko ngo gin moko ci ucere ku rweyo, kumeno ngo nia?