Yesu udoko ku oro apar ario

Yozefu giku Maria gibed gikwo i Nazarethi karacelo ku Yesu man awiya pagi mange ma co ku ma nyir. Yozefu ubed utimo tic mi bodho mi bau pi nigwoko juruot pare, man ebed eponjogi ku lembe iwi Yehova man iwi Cik pare. Juruot maeno gibed gicidho nja i sinagog pi niworo Mungu, man i Yeruzalem pi nitimo Kadhukuwijo ma kubang’ oro.

Kinde ma Yesu udoko ku oro 12, juruot pagi gigam giwotho woth ma bor pi nicidho i Yeruzalem calu ma naka. Dhanu m’ubino pi nitimo foc mi Kadhukuwijo gipong’o adhura bik. I ng’ey foc, Yozefu giku Maria gicoko woth pi nidok i pacu man gibino paru nia Yesu de utie i kind udul dhanu ma gibewotho kugi. Ento kinde ma gicaku saye i kind wedi migi, ginwang’e ngo.

E giloko kendo i Yeruzalem, man pi bang’ adek zoo gisayu wodgi kpe. I ng’eye, gicidho i hekalu. Giwok ginwang’u Yesu ubedo i kind juponji m’ebewinjogi cuu man ebepenjogi ku penji ma beco. Juponji gizungo Yesu lee dit, uketho gicaku penje ku penji dupa. Igi wang’ lii i kum jibu pare. E ginwang’u nia enyang’ i Cik pa Yehova.

Cwiny Yozefu giku Maria ubino pido lee mandha. E Maria uwacu ni Yesu kumae: ‘Woda, wadaru seyi kpe! Ibino kani re?’ Yesu udwoko kumae: ‘Wung’eyo ngo nia acikara nibedo keni i ot pa Vwa?’

E Yesu gigam gidok ku junyodo pare i Nazarethi. Yozefu uponjo Yesu ku tic mi bodho mi bau. Iparu nia Yesu ubino dhanu ma nenedi saa m’ebino aradu? Kinde ma Yesu ubedongo, rieko pare uwotho medere man enwang’u bero i wang’ Mungu man i wang’ dhanu bende.